មណ្ឌលកុមារកំព្រានៅកំពង់ស្ពឺប្រឈមនឹងបញ្ហាខ្វះថវិកា
ដោយ សុខ សេរី
2010-02-08
មជ្ឈមណ្ឌលកុមារកំព្រាមួយនៅតំបន់ដាច់ស្រយាលក្នុងខេត្តកំពង់ស្ពឺ ដែលមានកុមារជាង៥០នាក់កំពុងស្នាក់នៅនិងរៀនជំនាញ បានជួបការខ្វះខាតថវិកាក្នុងការដំណើរការជាច្រើនខែមកហើយ។
៧-កុម្ភៈ-១០: កុមារកំព្រាដែលរស់នៅក្នុងមណ្ឌលសមាគមនៃក្ដីសង្ឃឹមរបស់ជនក្រីក្រនៅកំពង់ស្ពឺ នាំគ្នាតម្រង់ជួរចូលថ្នាក់រៀន។
មណ្ឌលសមាគមនៃក្តីសង្ឃឹមរបស់ជនក្រីក្រនៅក្នុងតំបន់ដាច់ស្រាយាលមួយនៅក្នុងខេត្តកំពង់ស្ពឺ ដែលកំពុងតែចិញ្ចឹមកុមារកំព្រាក្រីក្រជាង៥០នាក់ឲ្យទទួលការរៀនសូត្រ និងរៀនភ្លេងបុរាណខែ្មរផងដែរនោះ កំពុងតែខ្វះខាតថវិកាយ៉ាងធ្ងន់ធ្ងរជាច្រើនខែមកហើយដើម្បីបន្តដំណើរការមណ្ឌលនេះទៅមុខទៀត។ ជាមួយគ្នានេះ តំណាងនៃមណ្ឌលនិងកុមារកំពា្រដោយសារតែឪពុកម្តាយបានស្លាប់ចោលដោយសារជំងឺអេដស៍បានទទូចសុំឲ្យមានការគាំទ្រថវិកាពីសប្បុរសជននានា។
លោក នៅ សារ៉ាត់ ជាប្រធានគ្រប់គ្រងនៃមណ្ឌលសមាគមនៃក្តីសង្ឃឹមរបស់ជនក្រីក្រនៅក្នុងភូមិព្រៃជុំ ឃុំយុទ្ធសាមគ្គី ស្រុកឧត្តុង្គ ខេត្តកំពង់ស្ពឺ បានមានប្រសាសន៍ប្រាប់វិទ្យុអាស៊ីសេរីនៅក្នុងមណ្ឌលនោះថា លោកត្រូវការថវិកាចំនួនជាង៨០០ដុល្លារអាមេរិកជារៀងរាល់ខែដើម្បីដំណើរការមណ្ឌលនេះទៀត។
លោក នៅ សារ៉ាត់ បានឲ្យដឹងថា ៖ «រាល់ថ្ងៃមានការខ្វះខាត ដូចជាសម្ភារៈ អង្ករ និងឧបករណ៍ផ្សេងៗសម្រាប់ប្រើប្រាស់ហ្នឹង ហើយសំខាន់បំផុតគឺខ្ញុំដែលរៀបចំគោលដៅឲ្យពួកគេ គឺដើម្បីឲ្យសិក្សារៀនសូត្រ ដូចជារៀនភាសាខ្មែរ ភាសាអង់គ្លេសនិងបណ្ដុះបណ្ដាលវិជ្ជាជីវៈ ដូចជាការគូរគំនូរអីផ្សេងៗ។ កុមារនៅទីនេះមានចំនួនសរុប៥៥នាក់។ កន្លងមកខ្ញុំសុំសប្បុរសជន តែកន្លងមកគាត់មិនអាចឲ្យយើងតាមតម្រូវការបានទេ មានការខ្វះខាតច្រើន»។
មណ្ឌលនេះមានបន្ទប់តូចៗចំនួន២ សម្រាប់ឲ្យកុមារតូចៗមានស្រីមានប្រុសចំនួនជាង៥០នាក់រស់នៅជាមួយគ្នា។ កុមារមួយចំនួនបានកំព្រាដោយសារឪពុកម្តាយបានស្លាប់ដោយសារជំងឺអេដស៍ និងមួយចំនួនទៀតឪពុកម្តាយបំបរបង់ចោលដោយសារលែងលះគ្នានិងគ្មានលទ្ធភាពចិញ្ចឹម។ មានបុគ្គលិកស្ម័គ្រចិត្តចំនួនជាង១០នាក់ គ្រូបង្រៀនចំនួន៣នាក់ក្នុងការបង្រៀនភាសាខែ្មរកម្រិតបឋមសិក្សានិងអនុវិទ្យាល័យ រៀនភាសាអង់គ្លេសនិងរៀនភ្លេងខែ្មរផងដែរ។ មណ្ឌលនេះមានទីតាំងនៅក្បែរវត្តមួយឈ្មោះវត្តព្រៃជុំ នៅក្នុងភូមិព្រៃជុំ ឃុំយុទ្ធសាមគ្គី ស្រុកឧត្តុង្គ ខេត្តកំពង់ស្ពឺ។
កុមារឈ្មោះ ឆែម គុយសេង អាយុ១៥ឆ្នាំ កំពា្រឪពុកម្តាយស្លាប់ដោយសារជំងឺអេដស៍ នៅក្នុងមណ្ឌលនេះចំនួន៣ឆ្នាំមកហើយ បានថែ្លងថា ៖ «ខ្វះខាតដែរអាហារហូបចុក»។
សុខ សេរី ៖ ចង់បានអនាគតភ្លឺស្វាងទេនៅពេលខាងមុខ? ឆែម គុយសេង ៖ ចង់បាន។ សុខ សេរី ៖ តើមានសំណូមពរយ៉ាងម៉េចដែរទៅសប្បុរសជនអីហ្នឹង? ឆែម គុយសេង ៖ ខ្ញុំសូមឲ្យសប្បុរសជនទាំងអស់ជួយដល់កុមារកំព្រានៅកន្លែងខ្ញុំបាទផង។
កុមារម្នាក់ទៀតឈ្មោះ គង្គា អាយុ១១ឆ្នាំ កំព្រាដោយសារតែឪពុកម្តាយបានស្លាប់ដោយសារជំងឺអេដស៍ផងដែរ បានថែ្លងថា ៖ «សំណូមពរឲ្យសប្បុរសជនជួយខ្ញុំទាំងអស់គ្នា សម្ភារៈសិក្សា ជួយម្ហូបអាហារ»។
មណ្ឌលនេះបានចាប់ដំណើរការតាំងពីឆ្នាំ២០០៤កន្លងមក បង្កើតទ្បើងដោយលោក នៅ សារ៉ាត់ ជាអតីតព្រះសង្ឃនៅវត្តព្រៃជុំនោះ ដែលបានដំណើរការមណ្ឌលនេះបានដោយសារតែថវិការបស់សប្បុរសជនតែប៉ុណ្ណោះ ពីក្រៅប្រទេសនិងក្នុងប្រទេស។ គេនៅមិនទាន់មានសញ្ញាណាមួយក្នុងការសង្គ្រោះមណ្ឌលនេះពីសំណាក់រដ្ឋាភិបាលនៅឡើយទេ៕
អត្ថបទដែលទាក់ទង
សិស្សបោះបង់ការសិក្សានៅកោះកុងកើនឡើងក្នុងឆ្នាំ២០០៩
អ្នកភូមិនៅស្ទឹងត្រែងអំពាវនាវសុំជំនួយបន្ទាប់ពីភ្លើងឆេះផ្ទះ
បញ្ហាសិក្សារបស់យុវជននៃគ្រួសារអ្នកនេសាទនៅខេត្តកោះកុង
បុរសម្នាក់ធ្វើអត្តឃាតដោយសារជីវិតក្រីក្រ
វៀតណាមបញ្ជូនអ្នកសុំទានខ្មែរ៨៩៨នាក់មកកម្ពុជាវិញ
វៀតណាមបញ្ជូនអ្នកសុំទានខ្មែរ១០៣នាក់មកកម្ពុជាវិញ
អាជ្ញាធរខែត្រសៀមរាបចែកអង្ករជូនអ្នកភូមិជាង៧០០គ្រួសារ
អ្នកភូមិដងរ៉ែកក្នុងខែត្របន្ទាយមានជ័យជួបប្រទះនឹងកង្វះស្បៀង
ពលរដ្ឋនៅកំពង់ឆ្នាំងប្រឈមបញ្ហាដាច់ស្បៀងបន្ទាប់ពីទឹកជន់លិចភូមិ
