ប្រភពពីមន្រ្តីជាន់ខ្ពស់ក្រសួងការពារជាតិកម្ពុជា បានឲ្យដឹងថា រហូតមកដល់ពេលនេះ មានក្រុមហ៊ុនឯកជនធំៗជាផ្លូវការចំនួនជាង ៤០ហើយ បានមកចងសម្ព័ន្ធមេត្រីភាពជាមួយកងពលមួយចំនួននៃកងយោធពលខេមរភូមិន្ទកម្ពុជា ក្រោយពីលោក ហ៊ុន សែន ប្រមុខរដ្ឋាភិបាលកម្ពុជា បានប្រកាសឲ្យមានធ្វើដូច្នេះ កាលពីខែមីនា កន្លងទៅថ្មីៗនេះ ដើម្បីគាំទ្រផ្នែកសម្ភារៈ និងស្បៀងអាហារនានា ដល់កម្លាំងយោធានានា ដែលកំពុងតែឈរជើងការពារព្រំដែននៅជាប់នឹងព្រំដែនកម្ពុជា-ថៃ។
ឯកសារដែលវិទ្យុអាស៊ីសេរីទទួលបាន បានឲ្យដឹងថា មានក្រុមហ៊ុនឯកជនចំនួន ៤២ បូកជាមួយនឹងក្រសួង និងមន្ទីរនានារបស់រដ្ឋាភិបាល បានចងសម្ព័ន្ធមេត្រីភាពជាមួយគ្នា ដោយមិនទាន់បានគិតជាមួយនឹងអង្គភាព និងស្ថាប័នរដ្ឋចំនួន ២៤ទៀតនៅឡើយទេ។ ក្រុមហ៊ុនមិនផ្លូវការ ចំនួនជាង ៣០០ បានមកសុំចងសម្ព័ន្ធមេត្រីភាពដូចគ្នានេះ។
ក្រុមហ៊ុនធំៗទាំងនោះនៅក្នុងប្រទេសកម្ពុជា មានដូចជាក្រុមហ៊ុនចម្ការកៅស៊ូជប់ (Chup Rubber Plantation ) ក្រុមហ៊ុនទូរស័ព្ទ ម៉ូប៊ីថែល (Mobitel) សណ្ឋាគារខេមបូឌីយ៉ាណា (Cambodiana) ធនាគារកាណាឌីយ៉ា (Canadia) ក្រុមហ៊ុនហេងអភិវឌ្ឍន៍ (Heng Development) ក្រុមហ៊ុនចម្ការកៅស៊ូអណ្តូង (Andung Rubber Plantation) ក្រុមហ៊ុនម៉ែន សារ៉ុន (Men Sarun) និងក្រុមហ៊ុនអង្គរ ស៊ូហ្គើរ ទន្លេ (Angkor Surger Tunle) ក្រុមហ៊ុនស៊ូហ្គើរ ខេមបូឌា ខេម អែន វែលី (Surger Cambodia Cam and Vally) និងក្រុមហ៊ុនជាច្រើនទៀត ដែលបានជួយឧបត្ថម្ភជាប្រាក់ច្រើនពាន់ ច្រើនម៉ឺនដុល្លារអាមេរិក និងជួយឧបត្ថម្ភជាស៊ីម៉ងត៍ គ្រែ និងសាងសង់អគារមួយចំនួនទៀត។
មន្ត្រីអ្នកនាំពាក្យក្រសួងការពារជាតិកម្ពុជា លោកឧត្ដមសេនីយ៍ឯក ឈុំ សុជាតិ បានមានប្រសាសន៍អត្ថាធិប្បាយថា ៖ «ខ្ញុំគិតថា ជាចំណងសាមគ្គីភាពរឹងមាំរវាងសមរភូមិមុខ និងសមរភូមិក្រោយ។ រួមគា្នដោយស្ម័គ្រចិត្តក្នុងការរួមចំណែកការពារ ភារកិច្ចការពារជាតិមាតុភូមិ»។
កងពលយោធាដែលបានទទួលការចងសម្ព័ន្ធមេត្រីភាពនេះ មានដូចជា យោធភូមិភាគទី ១ កងពលអន្តរាគមន៍លេខ៩ កងការពារព្រំដែនលេខ ៤០៤ កងពលតូចថ្មើរជើងលេខ ៥៣ កងពលតូចថ្មើរជើងលេខ ៥២ វរសេនាតូច ៥០៨ នៃតំបន់ប្រតិបត្តិការសឹករងខេត្តពោធិ៍សាត់ កងពលអន្តរាគមន៍លេខ ១១ កងការពារព្រំដែនលេខ ៥០១ យោធភូមិភាគទី ៤ និងកងពល ព្រមទាំងវរសេនាតូចមួយចំនួនទៀត។
សេចក្ដីថ្លែងការណ៍របស់អង្គការឃ្លាំមើលបរិស្ថានពិភពលោកឈ្មោះ Global Witness ដែលមានមូលដ្ឋាននៅក្នុងទីក្រុងឡុងដ៍ (London) ប្រទេសអង់គ្លេស កាលពីថ្ងៃទី៥ ខែមីនា ថ្មីៗនេះ បានរិះគន់ និងចោទប្រកាន់ថា មានក្រុមហ៊ុនឯកជនមួយចំនួនបានប្រើប្រាស់យោធាទាំងនោះ មកការពារផលប្រយោជន៍ក្រុមហ៊ុន។
នាយកនៃយុទ្ធនាការអង្គការឃ្លាំមើលបរិស្ថានពិភពលោក លោក ហ្គាវិន ហេមែន (Gavin Hayman) បានមានប្រសាសន៍នៅក្នុងសេចក្ដីថ្លែងការណ៍នោះថា វាមិនអាចទទួលយកបានទេ សម្រាប់ក្រុមហ៊ុនឯកជននានា ជួយឧបត្ថម្ភលុយកាក់ដល់យោធាដែលមានឈ្មោះល្បីល្បាញជុំវិញអំពើពុករលួយ និងមានការពាក់ព័ន្ធនឹងអំពើខុសច្បាប់នានា និងការរំលោភសិទ្ធិមនុស្ស។
លោកឧត្ដមសេនីយ៍ឯក ឈុំ សុជាតិ បានប្រតិកម្មថា ក្រសួងការពារជាតិ មិនអាចទទួលយកបានទេចំពោះការចោទប្រកាន់បែបនេះ ៖ «ព្រោះថា ចងសម្ព័ន្ធមេត្រីភាពនេះ គ្រាន់តែធ្វើឲ្យប្រសើរឡើងវិញនូវការឧបត្ថម្ភគ្នារវាងសមរភូមិមុខ និងសមរភូមិក្រោយតែប៉ុណ្ណោះ»។
លោកបានបញ្ជាក់ថា ការចងសម្ព័ន្ធមេត្រីភាពនេះ គឺសម្រាប់រយៈពេលយូរអង្វែងទៅថ្ងៃអនាគត៕