ស្ត្រីម្នាក់ក្នុងចំណោមអ្នកឃុំជីក្រែង ដែលកំពុងនាំគ្នាអង្គុយខាងក្រៅរបងផ្លូវចូលសាលាដំបូងរបស់ខេត្តសៀមរាប បានមានប្រសាសន៍កាលពីព្រឹកថ្ងៃអង្គារ ទី២៧ ខែកក្កដានេះថា ពួកគាត់បានលើកគ្នាមកនេះមិនមែនធ្វើបាតុកម្មប្រឆាំងណាមួយទេ គឺមានបំណងស្នើឲ្យតុលាការអនុញ្ញាតឲ្យពួកគាត់ទាំងអស់បានចូលស្ដាប់សវនាការ ដើម្បីឲ្យដឹងថា តើសវនាការជំនុំជម្រះលើសាច់ញាតិរបស់គេ ដែលកំពុងជាប់ចោទនោះមានភាពយុត្តិធម៌ដែរ ឬទេ?
ស្ត្រីអ្នកឃុំជីក្រែងម្នាក់ឲ្យដឹងថា ៖ «ខ្ញុំអត់មានមកបាតុកម្មអីទេ មកនេះអង្គុយស្ដាប់លោកបើកសវនាការចង់ដឹងថា គេកាត់ឲ្យត្រឹមត្រូវ ឬយ៉ាងម៉េច? សូមឲ្យរកយុត្តិធម៌ឲ្យប្រជាពលរដ្ឋ ហើយសូមដោះលែងក្មួយខ្ញុំទាំងអស់គ្នាដែលជាប់ពន្ធនាគារ ព្រោះក្មួយខ្ញុំអត់មានកំហុសទេ»។
នៅព្រឹកថ្ងៃអង្គារនេះ កម្លាំងកងរាជអាវុធហត្ថប្រមាណ ៤០នាក់ បានបញ្ជូនទៅការពារនៅក្នុងសាលាដំបូងរបស់ខេត្តសៀមរាប ដោយមិនអនុញ្ញាតឲ្យក្រុមអ្នកកាសែត និងប្រជាពលរដ្ឋចូលរួមស្ដាប់សវនាការជំនុំជម្រះទៅលើតំណាង ៩នាក់របស់អ្នកឃុំជីក្រែង ដែលសមត្ថកិច្ចបានចាប់ឃុំខ្លួនដោយសារទំនាស់ដីស្រែប្រាំងជាង ៩០ហិកតា ជាមួយអ្នកឃុំអន្លង់សំណរនោះទេ។
អ្នកស៊ើបអង្កេតរបស់អង្គការសិទ្ធិមនុស្សក្រៅរដ្ឋាភិបាល ដែលបានចូលស្ដាប់សវនាការនោះ បានឲ្យដឹងថា ព្រះរាជអាជ្ញានៃអង្គសវនាការបានចោទប្រកាន់តំណាងប្រជាពលរដ្ឋឃុំជីក្រែងទាំង ៩នាក់នោះ ពីបទប៉ុនប៉ងមនុស្សឃាត ពីបទប្លន់ និងពីបទបង្ខាំងមនុស្សខុសច្បាប់។
ទោះយ៉ាងណាសវនាការនៅព្រឹកថ្ងៃអង្គារនេះ ចៅក្រមជំនុំជម្រះទើបតែបានសាកសួរជនជាប់ចោទទាំង ៩នាក់ប៉ុណ្ណោះ ដោយមិនទាន់បានសួរសាក្សីជាច្រើននៅឡើយទេ ហើយតុលាការក៏បានផ្អាកសវនាការនោះ ដោយថា នឹងបន្តនៅថ្ងៃទី២ ខែសីហា ខាងមុខ៕