មន្ត្រីស៊ើបអង្កេតជាន់ខ្ពស់នៃអង្គការសិទ្ធិមនុស្ស លីកាដូ បានថ្លែងឲ្យដឹងថា ក្នុងរយៈពេល ៤ខែ គឺចាប់ពីខែមករាដល់ខែមេសា ឆ្នាំ២០១០ តុលាការនៅតាមបណ្ដាខែត្រមួយចំនួនបានឃុំខ្លួនជនជាប់ចោទបណ្ដោះអាសន្នលើសនីតិវិធីចំនួន ៩២ករណី ក្នុងនោះមានបុរស ៨៨នាក់ និងស្ត្រី ៤នាក់។
លោក អំ សំអាត ប្រធានបច្ចេកទេសស៊ើបអង្កេតនៃអង្គការ លីកាដូ បានមានប្រសាសន៍ថា ការឃុំខ្លួនជនជាប់ចោទបណ្ដោះអាសន្នលើសនីតិវិធីនេះជាការខុសច្បាប់ និងរំលោភទៅលើសិទ្ធិមនុស្ស។
លោក អំ សំអាត បានបញ្ជាក់ទៀតថា មានពិរុទ្ធជនមួយចំនួនត្រូវបានតុលាការឃុំខ្លួនរហូតដល់ជាង ២ឆ្នាំក៏មាន ដែលគេមិនបានយកសំណុំរឿងមកកាត់ទោស ៖ «ខ្ញុំមើលឃើញពីឆ្នាំទៅ ច្រើនតែរកកំហុសគាត់មិនឃើញ។ គាត់គ្មានបានប្រព្រឹត្ត អ៊ីចឹងទៅគាត់ជាប់ពន្ធនាគាររយៈពេលវែងដោយគ្មានកំហុសអីសោះ! គាត់ត្រូវបាត់បង់ការរកស៊ីចិញ្ចឹមគ្រួសារ។ អ៊ីចឹងយើងឃើញថា គាត់ត្រូវប៉ះពាល់ធ្ងន់ធ្ងរសម្រាប់សិទ្ធិសេរីភាពសម្រាប់ជនជាប់ចោទហ្នឹង»។
លោក អំ សំអាត បានអះអាងទៀតថា ការឃុំខ្លួនលើសនីតិវិធីនេះ ខាងមន្ត្រីតុលាការបានបញ្ជាក់ថា មកពីការផ្លាស់ប្ដូរប្រធានតុលាការ ព្រះរាជអាជ្ញា និងចៅក្រម ដែលគេធ្វើការផ្លាស់ប្ដូរពីខែត្រមួយទៅខែត្រមួយក្នុងរយៈពេល ៥ឆ្នាំម្ដង និងបញ្ហាខ្វះមេធាវីការពារជនជាប់ចោទ។
របាយការណ៍របស់អង្គការសិទ្ធិមនុស្ស លីកាដូ បានបង្ហាញថា ការឃុំខ្លួនជនជាប់ចោទចោទលើសនីតិវិធីនេះ មានអាយុពី ១៨ឆ្នាំឡើងទៅ ដូចជាខែត្រព្រះសីហនុ មាន ៤ករណី ខែត្រកំពង់ស្ពឺ ២២ករណី កំពង់ឆ្នាំង ១៩ករណី កំពង់ធំ ៤ករណី ពោធិ៍សាត់ ៤១ករណី និងខែត្រស្វាយរៀង ២ករណី។
ព្រះរាជអាជ្ញាខែត្រកំពង់ធំ លោក ប៉ែន សារ៉ាត់ បានបដិសេធថា នៅក្នុងខែត្រកំពង់ធំពុំមានករណីឃុំខ្លួនជនជាប់ចោទលើសនីតិវិធីទេ ប៉ុន្តែលោកបានបញ្ជាក់ថា បើសិនជាមានករណីតុលាការឃុំខ្លួនលើសនីតិវិធីមែននោះ ជនជាប់ចោទអាចដាក់ពាក្យបណ្ដឹងបានអំពីករណីនេះ ៖ «កាលណាឃុំខ្លួនលើស យើងអាចប្ដឹងបាន ប្ដឹងទៅសាលាឧទ្ធរណ៍បានតើ!»។
មេធាវីនៃក្រុមអ្នកច្បាប់ការពារសិទ្ធិកម្ពុជា និងជាមេធាវីការពារជនរងគ្រោះនៃសាលាក្ដីកាត់ទោសអតីតមេដឹកនាំខ្មែរក្រហម លោក ហុង គឹមសួន បានពន្យល់ថា ចំពោះបទឧក្រិដ្ឋ ចៅក្រមស៊ើបសួរធ្វើការឃុំខ្លួនជនជាប់ចោទបណ្ដោះអាសន្ន ៦ខែ ប៉ុន្តែបើសិនជាការស៊ើបអង្កេតមិនទាន់បញ្ចប់ ចៅក្រមមានសិទ្ធិបន្តឃុំខ្លួនបណ្ដោះអាសន្នចំនួន ២ដងទៀត សរុបចំនួន ១៨ខែ ហើយការឃុំខ្លួននោះត្រូវមានដីកាបន្តឃុំខ្លួន និងមូលហេតុច្បាស់លាស់ រីឯបទមជ្ឈិមអាចឃុំខ្លួនបានតែពី ៤ខែទៅ ៦ខែទេ។
លោក ហុង គឹមសួន បានបញ្ជាក់ថា ៖ «បើសិនជាមើលទៅឃើញថាជាកំហុសចៅក្រមស៊ើបអង្កេតគាត់ភ្លេចខ្លួន គាត់អត់អើពើទេ អាហ្នឹងជាកំហុសចៅក្រម ទី១។ ទី២ទៀត សិទ្ធិព្រះរាជអាជ្ញាដែលទទួលបន្ទុកគ្រប់គ្រងជនជាប់ចោទហ្នឹង គឺគាត់ដាច់ខាតត្រូវតែមើលបញ្ជីឈ្មោះនៃការឃុំខ្លួនជារៀងរាល់ខែ កុំឲ្យមានការឃុំខ្លួនលើស»។
លោក អំ សំអាត បានលើកឡើងថា ការឃុំខ្លួនជនជាប់ចោទលើសនីតិវិធីនេះធ្វើឲ្យពន្ធនាគារចង្អៀត និងចំណាយថវិការដ្ឋកាន់តែច្រើនក្នុងមួយឆ្នាំៗ។
មន្ត្រីគ្រប់គ្រងពន្ធនាគារព្រៃសបានលើកឡើងនៅក្នុងទិវាកុមារអន្តរជាតិលើកទី៦១ កាលពីថ្ងៃទី១ មិថុនា ដោយអំពាវនាវស្វែងរកជំនួយនានា រាប់ទាំងថ្នាំពេទ្យសម្រាប់ព្យាបាលអ្នកទោស និងបានត្អូញត្អែរថា មានអ្នកទោសកាន់តែច្រើនលើសចំណុះ នៅគ្រាដែលបន្ទប់ឃុំឃាំងកំពុងតែចង្អៀតណែនខ្លាំងនាពេលបច្ចុប្បន្ននេះ៕