លោក ផៃ ស៊ីផាន បានមានប្រសាសន៍ថា ៖ «និយាយដោយខ្លីៗគឺករណីពីរហ្នឹងយើងចែកគ្នាឲ្យដាច់។ ករណីទី១ គឺករណីអធិបតេយ្យរបស់កម្ពុជា ហើយករណីឯករាជ្យរបស់កម្ពុជា និងករណីស្វ័យសម្រេចរបស់កម្ពុជា ដែលយើងបានថ្លែងនិងបានពន្យល់នៅក្នុងសេចក្ដីថ្លែងការណ៍របស់រាជរដ្ឋាភិបាលកម្ពុជាពីរដង។ ជាពិសេសចុងក្រោយនេះ គឺឆ្លើយតបនូវអគ្គព្រះរាជអាជ្ញារបស់ថៃដែលចង់ឲ្យយើងពន្យល់ប្រាប់ថា ហេតុផលអ្វីបានកម្ពុជាមានគោលជំហរមិនបញ្ជូន ថាក់ស៊ីន ដែលជាអតីតនាយករដ្ឋមន្ត្រីថៃ ដែលធ្លាក់ពីតំណែងដោយសាររដ្ឋប្រហារ យើងបាននិយាយប្រាប់ហើយថា នៅក្នុងអធិបតេយ្យរបស់កម្ពុជា នៅក្នុងប្រទេសកម្ពុជាដែលជារដ្ឋឯករាជមួយ យើងបានប្រាប់យ៉ាងច្បាស់លាស់ គឺយើងមានសិទ្ធិមិនបញ្ជូន ដោយសារការអនុវត្តទៅលើស្មារតីនៃកិច្ចព្រមព្រៀងឬក៏សន្ធិសញ្ញាបត្យាប័នរវាងកម្ពុជា-ថៃ»។
តាមកាសែតបាងកកប៉ុស្តិ៍ នៅថ្ងៃអង្គារ អ្នកនាំពាក្យរដ្ឋាភិបាលថៃ លោក ប៉ានិតាន់ វឌ្ឍនាយ៉ាគន ថ្លែងថា គណៈរដ្ឋមន្រ្តីថៃបានសម្រេចលុបចោលកិច្ចព្រមព្រៀងរាវរកប្រេងកាតនិងឧស្ម័នធម្មជាតិដែលចុះហត្ថលេខាក្នុងពេលលោក ថាក់ស៊ីន ធ្វើជានាយករដ្ឋមន្រ្តីនោះហើយ។
កាសែត The Nation ផ្សាយថា អាជ្ញាធររាជធានីបាងកកបានសម្រេចព្យួរគម្រោងអភិវឌ្ឍន៍ទីក្រុងភ្លោះជាមួយរាជធានីភ្នំពេញរហូតដែរ។ សកលវិទ្យាល័យ រ៉ាមកាំហែង កំពុងពិចារណាថាតើគួរដកហូតសញ្ញាបត្របណ្ឌិតកិត្តិយសពីលោក ហ៊ុន សែន វិញឬយ៉ាងណា?
អ្នកជំនាញផ្នែកកិច្ចការនយោបាយថៃ លោក ផូល ឆេមបឺរស៍ (Paul Chambers) នៃសកលវិទ្យាល័យ Heidelberg ប្រទេសអាល្លឺម៉ង់ ប្រាប់ទីភ្នាក់ងារព័ត៌មាន អាអេហ្វប៉េ (AFP) នៅថ្ងៃ១០ វិច្ឆិកា ថា ស្ថានការណ៍ថ្មីនេះបានជំរុញប្រទេសទាំងពីរឲ្យកាន់តែខិតជិតដល់វិបត្តិធំហើយ ពោលគឺសង្រ្គាម។
អ្នកការទូតនៅភ្នំពេញម្នាក់ពោលថា បើមាននរណាមួយបញ្ឆេះកំហឹងថៃ គឺមានលោក ថាក់ស៊ីន ឬមួយមានលោក ហ៊ុន សែន។ បញ្ញវន្តវិភាគនយោបាយម្នាក់ទៀតពីសកលវិទ្យាល័យ ចុល្លាឡុងកន ធីទីណាន់ ពង្សសុទ្ធារៈ និយាយថា ទំនាក់ទំនងរវាងលោក ហ៊ុន សែន និងលោក ថាក់ស៊ីន គឺមានប្រយោជន៍ជាមួយគ្នាទៅវិញទៅមក ហើយរៀបចំយ៉ាងណាឲ្យរដ្ឋាភិបាលក្រុងបាងកកគ្មានស្ថិរភាព។
ក្នុងពេលប្រជាប្រិយភាពនាយករដ្ឋមន្រ្តីថៃ អាភីស៊ិត វេតឆាឈីវ៉ាក់ (Abhisit Vejjajiva) ឡើងជិត៧០% នៅទូទាំងប្រទេសថៃ ហើយប្រជាប្រិយភាពលោក ថាក់ស៊ីន មានត្រឹមតែ២១%នោះ អ្នកវិភាគ ម៉ៃឃើល ម៉ុងតេសាណូ (Michael Montesano) នៃវិទ្យាស្ថានសិក្សាអាស៊ីអាគ្នេយ៍ នាក្រុងសិង្ហបុរី ថ្លែងថា រឿងច្បាំងឬមិនច្បាំងអាស្រ័យលើសេចក្តីអំណត់របស់នាយករដ្ឋមន្រ្តីថៃ។ ក្នុងពេលជាមួយគ្នានេះថៃបានស្នើដល់ប្រទេសក្នុងអាស៊ាន រួមនឹងប៉ូលិសអន្តរជាតិ (Interpol) ឲ្យជួយចាប់លោក ថាក់ស៊ីន តាមរយៈសំណើដូចដែលថៃបានធ្វើទៅកាន់ប្រទេស អារ៉ាប់រួម អ៊ីមីរ៉ាត, នីការ៉ាហ្គា និងហ្វ៊ីជី ជាដើម៕