ក្រុមគ្រួសារជាអាណាព្យាបាលសិស្សមធ្យមសិក្សានៅក្នុងស្រុកបាភ្នំ ខេត្តព្រៃវែង បានសម្ដែងការស្វាគមន៍និងត្រេកអរ នៅគ្រាដែលមានកិច្ចអន្តរាគមន៍ដោះស្រាយមួយ ក្នុងការបញ្ឈប់ការទារប្រាក់ពីសិស្សជារៀងរាល់ថៃ្ងក្នុងម្នាក់ៗ១០០រៀលសម្រាប់កង់មួយ និង២០០រៀលសម្រាប់ម៉ូតូមួយ នៅខណៈដែលក្រុមគ្រួសាររបស់សិស្សជាង២.០០០នាក់ នៅតាមជនបទកំពុងតែមានជីវភាពក្រីក្រនោះ។
ប្រជាពលរដ្ឋដែលជាអាណាព្យាបាលសិស្សចំនួន៣នាក់ រៀននៅវិទ្យាល័យបាភ្នំ ស្រុកបាភ្នំ ខេត្តព្រៃវែង បានថែ្លងថា សិស្សសាលានានាជាង២.០០០នាក់ឈប់បង់ប្រាក់ក្នុងការផ្ញើកង់និងម៉ូតូទៀតហើយ គឺវិលត្រទ្បប់ទៅសភាពដើមវិញដូចកាលមុន។
អាណាព្យាបាលសិស្សមិនបញ្ចេញឈ្មោះបានថ្លែងដូច្នេះ ៖ «ខ្ញុំបានចូលរួមធ្វើការតវ៉ាដល់នាយកសាលា វ៉ា សារុន នៅវិទ្យាល័យបាភ្នំ ដែលគាត់បានដាក់ឲ្យឈ្មួញរយៈពេលមួយឆ្នាំ៨លានរៀល ឲ្យយកពីកូនសិស្សម្នាក់ពីរបីរយ ឥឡូវលែងយកហើយ រយៈពេលពីរថ្ងៃហើយ ដែលមាតាបិតាសិស្សបានរាយការណ៍ ហើយខ្ញុំក៏តាមដានមើល។ គាត់មានការសប្បាយចិត្ត គាត់អរគុណវិទ្យុអាស៊ីសេរីហើយ ដែលបានផ្សាយឲ្យគេដឹងឮ ជាពិសេសអាជ្ញាធរស្រុក អាជ្ញាធរខេត្ត រហូតនាយករដ្ឋមន្រ្តី គេឮទូទាំងប្រទេសទៅគាត់លែងហ៊ានយក។ គាត់ថា អាស៊ីសេរីផ្សាយឮដល់មេគាត់ គាត់លែងហ៊ានយកហើយ»។
ប្រជាពលរដ្ឋជាអាណាព្យាបាលសិស្សម្នាក់ទៀត នៅក្នុងភូមិកន្រ្ទាន ឃុំរោងដំរី ស្រុកបាភ្នំ ខេត្តព្រៃវែង ដែលមានកូនស្រីរៀននៅវិទ្យាល័យបាភ្នំនោះ បានថែ្លងថា លោកនឹងកូនស្រីមានការរីករាយនឹងការបញ្ឈប់យកប្រាក់ពីសិស្សសាលានេះ ៖ «មិនយកលុយដោយសារសិស្សធ្វើពហិការមិនចូលផ្ញើច្រើនដែរ ប្រហែលជា៤០% គេផ្ញើតាមផ្ទះប្រជាពលរដ្ឋ គេមិនយកចូលទាំងអស់គ្នាទេ អ្នកចូលនិងអ្នកមិនចូលសឹងពាក់កណ្ដាលម្នាក់។ ចំពោះអាណាព្យាបាលរីករាយណាស់ ព្រោះអីទាំងគេទាំងអស់វាមិនមែនថា អត់លុយ១០០ផ្ញើទេ ប៉ុន្តែវាប៉ះពាល់ពេលចេញពីរៀនមក ទម្រាំយកកង់បានវាប្រើរយៈពេលយូរ។ គេលែងយកលុយហើយ ផ្ញើគេលែងដាក់សំបុត្រអីទេ យើងដាក់តាមដំណើររបស់យើងដូចពីមុនមកអ៊ីចឹង»។
លោក វ៉ា សារុន ជានាយកសាលានៃវិទ្យាល័យបាភ្នំ ខេត្តព្រៃវែង បានមានប្រសាសន៍ទំនងជាមិនសប្បាយចិត្តថា មានការបាត់កង់របស់សិស្ស ក្រោយពីបានបញ្ឈប់ការទារប្រាក់ថ្មីៗនេះ ៖ «ឥឡូវវាបាត់កង់មួយសូមជួយមកសងគេផង»។
ការបញ្ឈប់ការទារប្រាក់ពីសិស្សសាលារយៈពេលពីរឬបីថៃ្ងថ្មីៗនេះ គឺក្រោយពីមន្រ្តីម្នាក់នៃក្រសួងអប់រំយុវជននិងកីទ្បា បានសន្យាថា នឹងពិនិត្យមើលរឿងនេះ និងបន្ទាប់ពីផ្សាយឲ្យបានដឹងឮពីការតវ៉ារបស់គ្រួសារអាណាព្យាបាលសិស្សជាសាធារណៈ។
កាលពីថៃ្ងទី១៥ ខែតុលា កន្លងទៅថ្មីៗនេះ ក្រុមគ្រួសារអាណាព្យាបាលសិស្សមួយចំនួន នៅក្នុងចំណោមគ្រួសារនៃសិស្សសាលាជាង២.០០០នាក់ នៃវិទ្យាល័យបាភ្នំ ខេត្តព្រៃវែង បានតវ៉ានិងបានទម្លាយរឿងការទារប្រាក់ពីសិស្សសាលាជារៀងរាល់ថៃ្ង រវាង១០០រៀលនិង២០០រៀល សម្រាប់ការផ្ញើកង់និងម៉ូតូនៅក្នុងសាលារៀនចាប់ពីខែតុលានេះ ដែលមិនធ្លាប់មានកន្លងមក។
ការចំណាយប្រាក់បន្តិចបន្តួចជាប្រចាំថៃ្ងខាងលើនេះ គឺនៅមិនទាន់គិតដល់ការចំណាយប្រចាំថៃ្ងផ្សេងៗទៀតនៅទ្បើយ ក្នុងការទិញមេរៀនពីគ្រូបង្រៀន ក្រដាស និងការរៀនគួរក្រៅម៉ោង ដើម្បីទទួលបានពិន្ទុល្អនៅក្នុងការប្រឡង៕