អាជ្ញាធរក្រុងភ្នំពេញរារាំងការឃោសនារបស់បក្សខ្មែរឈប់ក្រ
ដោយ ជា មករា
2008-07-04
គណបក្សនយោបាយមួយដែលមានខ្មែរមកពីសហរដ្ឋអាមេរិកដឹកនាំត្រូវអាជ្ញាធរមូលដ្ឋានក្នុងរាជធានីភ្នំពេញរារាំងកាលពីព្រឹកមិញមិនឲ្យមានការឃោសនាតាមកន្លែងដែលបានកំណត់នោះឡើយ ។
អ្នកយកព័ត៌មានវិទ្យុអាស៊ីសេរីសម្ភាសប្រធានគណបក្សខ្មែរឈប់ក្រ លោក ក្រវ៉ាន់ ដារ៉ន (ឆ្វេង) កាលពីថ្ងៃទី៤ ខែកក្កដា ឆ្នាំ២០០៨ ។
គណបក្សឈ្មោះខ្មែរឈប់ក្រ បានឲ្យដឹងថាគេគ្រោងនឹងដាក់ពាក្យប្តឹងទៅគណៈកម្មាធិការជាតិរៀបចំការបោះឆ្នោតចំពោះការរារាំងនោះ ។
គណបក្សខ្មែរឈប់ក្រដែលមានលេខរៀងលំដាប់ទី៥បានឲ្យដឹងថា ដំណើរការឃោសនាយុទ្ធនាការលើកដំបូងរបស់ខ្លួននៅក្នុងរាជធានីភ្នំពេញ បានរងការរំខានរារាំងពីក្រុមអាជ្ញាធរ ។
ក្រុមឃោសនាដែលមានមនុស្សចូលរួមប្រមាណ១០០នាក់ ដែលពាក់អាវសរសេរសន្យាថានឹងផ្តល់ជិវិតថ្មីបែបអាមេរិក បើសិនជាប្រធានគណបក្សនឹងបានជាប់ឆ្នោតជ្រើសជាមេដឹកនាំប្រទេស បានប្រញាប់រើសម្ភារៈចាកចេញពីទីឃោសនាមុខវត្តបទុមវតី ក្រោយពេលដែលមានការត្អូញត្អែរថាអាជ្ញាធរមូលដ្ឋានបានរារាំងមិនឲ្យធ្វើនៅទីនោះទេ ។
ប្រធានគណបក្សខ្មែរឈប់ក្រ លោក ក្រវ៉ាន់ ដារ៉ន ពីរដ្ឋវ៉ាស៊ីនតោនស្តេត បានមានប្រសាសន៍នៅគ្រាដែលសមាជិកខ្លះកំពុងតែរើសម្ភារៈឃោសនាចេញពីបរិវេណមុខវត្តបទុមវតីយ៉ាងដូច្នេះថា ៖ «ខ្ញុំមិនដឹងថាច្បាប់ហ្នឹងវាច្បាស់លាស់ប៉ុណ្ណា មិនច្បាស់លាស់ប៉ុណ្ណាទេ ។ អានេះដូចថាជាការគំរាមមួយយ៉ាងធំណាស់ ពីព្រោះអស់លោកគេបាននិយាយរួចហើយ គេថាការដង្ហែក្បួនកន្លែងមានតែមួយគត់គឺកន្លែងស្តូបកម្ពុជាវៀតណាម ។ កន្លែងហ្នឹងទេដែលឲ្យយើងជួបជុំប្រមូលផ្ដុំគ្នា គេលើកលែងតែកន្លែងហ្នឹងមួយ ។ ដល់យើងមកធ្វើកន្លែងហ្នឹងបែរជាគេមកហាមឃាត់អ៊ីចេះហាមឃាត់អ៊ីចុះ គឺថាខ្ញុំត្រូវខូចកម្មវិធីទាំងអស់ គឺថាខ្ញុំមានការមិនសប្បាយចិត្តចំពោះការធ្វើរបៀបនេះមកលើគណបក្សយើង ព្រោះយើងមានសិទ្ធិក្នុងការធ្វើ» ។
ឃោសនិកជាស្ត្រីម្នាក់បានឲ្យដឹងថា នៅយប់មុនការឃោសនាគ្រាដែលក្រុមអ្នកគាំទ្រកំពុងតែត្រៀមរៀបចំចែកខិត្តប័ណ្ណឃោសនាដល់អ្នកដំណើរ ស្រាប់តែមានមនុស្សស្លៀកសម្លៀកបំពាក់ប៉ូលិសគំរាម ។
ឃោសនិកដដែលបានឲ្យដឹងថា ៖ «ស្លៀកខោអាវប៉ូលិស២នាក់ហ្នឹងមកដល់ពួកខ្ញុំកំពុងតែចែកខិត្តប័ណ្ណឲ្យបងៗអ្នកលក់នៅទីនេះ ។ រួចទៅគាត់ថា "គណបក្សខ្មែរឈប់ក្រអីមួយដៃកណ្ដាលមុខឥឡូវហ្នឹង" គឺគាត់និយាយអ៊ីចឹង ពួកខ្ញុំក៏គេចទៅ ។ ហើយឃើញច្រងេងច្រងាងបោកពងទាបោះចុះបោះឡើងរបស់គេអ៊ីចឹងទៅ» ។
មន្ត្រីរៀបចំការបោះឆ្នោតក្រុងភ្នំពេញ លោក ប៉ាង សុខា បានមានប្រសាសន៍ថាមានការយល់ច្រឡំគ្នាចំពោះបញ្ហានោះ ។
លោក ប៉ាង សុខា បានបញ្ជាក់ថា ៖ «ទី១គណបក្សហ្នឹងគាត់ទៅសុំខាងអាជ្ញាធរសង្កាត់ ដល់ពេលសុំទៅអាជ្ញាធរគេហ្នឹងចារថា ឲ្យសុំសាលាក្រុង... ខ្ញុំមិនដឹងគាត់ទៅឬមិនទៅសាលាក្រុងទេ ។ ...ខ្ញុំថាខ្ញុំអត់ហ៊ានថាម៉េចទេ ព្រោះលោកដាក់ក្នុងលិខិតថាធ្វើប៉ុស្តិ៍សុំចតពេលថ្ងៃត្រង់ទេ មិនមែនថាមកធ្វើឃោសនាទេ» ។
បើយោងទៅតាមសេចក្តីរាយការណ៍របស់គណៈកម្មាធិការជាតិរៀបចំការបោះឆ្នោតបានឲ្យដឹងថា ក្នុងរយៈពេលឃោសនាជាង១សប្តាហ៍កន្លងមកនេះ មានករណីវិវាទស្រដៀងគ្នានេះយ៉ាងហោចណាស់ក៏ចំនួន៤ខេត្តដែរ ហើយការសម្រុះសម្រួលបានធ្វើជាប់ជាហូរហែ ។
ប្រធានគណបក្សខ្មែរឈប់ក្រ លោក ក្រវ៉ាន់ ដារ៉ន ដែលចោទថាមានការរារាំងក្រុមឃោសនិករបស់លោកកាលពីព្រឹកមិញបានថ្លែងថា លោកគ្រោងនឹងដាក់ពាក្យបណ្ដឹងជុំវិញបញ្ហានេះទៅគណៈកម្មាធិការជាតិរៀបចំការបោះឆ្នោត ៕
ឧបករណ៍រឿង
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
គណៈកម្មការសិទ្ធិមនុស្សអាស៊ីសុំឲ្យរដ្ឋាភិបាលខ្មែរបង្ហាញភាពមិនប្រក្រតីនៃការបោះឆ្នោត
គណបក្សសមរង្ស៊ីសុំចូលគាល់ព្រះមហាក្សត្រដើម្បីបង្ហាញជំហរបក្សប្រឆាំង
បក្សសមរង្ស៊ីនិងបក្សសិទ្ធិមនុស្សបដិសេធលទ្ធផលផ្លូវការនៃការបោះឆ្នោត
លទ្ធផលផ្លូវការនៃការបោះឆ្នោតអាណត្តិទី៤ ត្រូវបានប្រកាស
សំណង់សាលារៀនមួយនៅស្រុកបារាយណ៍ត្រូវផ្អាកដោយសារបក្សប្រជាជនចាញ់ឆ្នោតនៅទីនោះ
បក្សប្រឆាំង៖ ការបញ្ចប់ថ្ងៃតវ៉ាពីការបោះឆ្នោតជាការបង្ហាញនូវភាពអយុត្តិធម៌
គណៈកម្មការជំនាញទាំង៩របស់រដ្ឋសភាថ្មីនឹងត្រូវកាន់កាប់ដោយបក្សប្រជាជន
បក្សសមរង្ស៊ីនិងបក្សសិទ្ធិមនុស្សបញ្ជាក់ជំហរមិនចូលស្បថស្បែបង្កើតសភាថ្មី
បក្សសមរង្ស៊ីស្នើសុំឲ្យគ.ជ.ប.បង្ហាញភស្តុតាងពីការលុបឈ្មោះអ្នកបោះឆ្នោត
បក្សសមរង្ស៊ី៖ អ្នកសង្កេតការណ៍ជប៉ុនមិនបានតាមដានការបោះឆ្នោតដិតដល់
