បុរសចំណាស់ឈ្មោះ ក្រូច ជុច ដែលអះអាងថាជាអាចារ្យវត្តអារញ្ញរង្សី ហៅវត្តត្រីញ័រ បានមានប្រសាសន៍កាលពីថ្ងៃអង្គារ ទី២ ខែកក្កដា ថាចៅអធិការវត្តព្រះនាម ដួន ឌុច ហៅលោកតារ៉េត បានហាមឃាត់គាត់និងយាយជីខ្លះមិនឲ្យចូលវត្តសុំសីលទៀតទេ បន្ទាប់ពីដឹងថាពួកគាត់គាំទ្រគណបក្សហ៊្វុនស៊ិនប៉ិច ។
លោក ក្រូច ជុច បានឲ្យដឹងថា ៖ «លោកហៅខ្ញុំ "ឃើញតាឯងទៅយកសារុងហ៊្វុនស៊ិនប៉ិច" ខ្ញុំទៅយកមែន "យកមែនហើយសារភាពទៅ បើតាឯងមិនសារភាពមិនឲ្យតាឯងចូលវត្តទេ"» ។
ក្រុមអ្នកភូមិបាននិយាយទៀតថា ចៅអធិការវត្តអង្គនោះបានហាមប្រាមគណបក្សផ្សេងៗមិនឲ្យយកខិត្តប័ណ្ណបិទតាមដើមឈើនៅក្រៅរបងវត្តទេ ក៏ប៉ុន្តែចំពោះខិត្តប័ណ្ណគណបក្សប្រជាជនកម្ពុជាគឺមានបិទក្នុងវត្ត ។ អ្នកភូមិអះអាងថាចៅអធិការវត្តអង្គនោះតែងនិមន្តទៅចូលរួមយុទ្ធនាការឃោសនារបស់គណបក្សប្រជាជនកម្ពុជា ។
ចៅអធិការវត្តអារញ្ញរង្សី ព្រះតេជគុណ ដួន ឌុច បានមានព្រះថេរដីកាទទួលស្គាល់ថាព្រះអង្គពិតជាបានហាមឃាត់អាចារ្យវត្តនិងដូនជីដែលគាំទ្រគណបក្សហ៊្វុនស៊ិនប៉ិចមិនឲ្យចូលវត្តសុំសីលមែន ពីព្រោះតែមន្ត្រីគណបក្សប្រជាជនកម្ពុជាប្រចាំឃុំស្រុកបានគាបសង្កត់ព្រះអង្គទៅរកបច្ច័យកសាងវត្តមិនបាន ។
ព្រះតេជគុណ ដួន ឌុច បានមានព្រះថេរដីកាថា ៖ «តាអាចារ្យអាត្មាគាត់ចូលទៅខាងគណបក្សហ៊្វុនស៊ិនប៉ិច អាត្មាឲ្យទៅសារភាពខាងគណបក្សប្រជាជនទៅ ។ គេខ្វល់ខ្វាយថាយើងមានអាចារ្យគណបក្ស ហើយអាត្មាទៅរកអីឲ្យរកវាមិនបានមកកសាង» ។
ក៏ប៉ុន្តែមេឃុំត្រពាំងធំ លោក ស៊ុន កេង បានបដិសេធថាគណបក្សប្រជាជនកម្ពុជាមិនដែលគាបសង្កត់ចៅអធិការវត្តអង្គនោះដូចអ្វីដែលព្រះអង្គបានអះអាងនោះឡើយ ។
លោក ស៊ុន កេង បានមានប្រសាសន៍ថា វត្តនោះគឺជាវត្តថ្មីដែលទើបតែមានព្រះសង្ឃ៦អង្គ ដោយមិនទាន់មានច្បាប់ត្រឹមត្រូវនៅឡើយ ប៉ុន្តែគណបក្សប្រជាជនកម្ពុជាទាំងថ្នាក់ឃុំក្ដីនិងស្រុកក្ដីកំពុងតែជួយជ្រោមជ្រែងក្នុងការកសាងវត្តនោះ ។
អ្នកសម្របសម្រួលអង្គការសិទ្ធិមនុស្សលីកាដូខេត្តសៀមរាប លោក នូ ពុទ្ធិ ដែលចុះស៊ើបអង្កេតបញ្ហានោះបានមានប្រសាសន៍ថា លោកបានរកឃើញថាចៅអធិការវត្តមានភាពលម្អៀងទៅលើគណបក្សនយោបាយ ។
លោក នូ ពុទ្ធិ បានមានប្រសាសន៍ថា ៖ «គណបក្សមួយគាត់បានដើរខិត្តប័ណ្ណនយោបាយនៃគណបក្សខ្លួន ហើយត្រូវបានព្រះតេជគុណហ្នឹងហាមឃាត់ ហើយចំណែកគណបក្សមួយផ្សេងទៀតនោះត្រូវបានព្រះតេជគុណលោកអនុញ្ញាតឲ្យរហូត» ។
ចំណែកនាយកប្រតិបត្តិអង្គការខុមហ្វ្រែល លោក គល់ បញ្ញា បានមានប្រសាសន៍ថាទង្វើរបស់ចៅអធិការវត្តអង្គនោះគឺខុសច្បាប់បោះឆ្នោត និងច្បាប់ស្តីពីគណបក្សនយោបាយ ដោយអ្នកបួសមិនអាចគាំទ្រឬប្រឆាំងគណបក្សនយោបាយណាមួយបានទេ ។
នៅខេត្តសៀមរាបក្រៅពីការរើសអើងគណបក្សនយោបាយមួយករណីនេះ មន្ត្រីគណបក្សសមរង្ស៊ីបាននិយាយថា សកម្មជនរបស់ខ្លួន៣នាក់មកហើយបានទទួលរងការជេរប្រមាថ ការយកអាយកូមបម្រុងវាយក្បាលនិងការកន្ត្រាក់ទាញដាច់សម្លៀកបំពាក់ ចាប់ពីការធ្វើយុទ្ធនាការឃោសនាបោះឆ្នោតកាលពីថ្ងៃទី២៧ ខែមិថុនា រហូតដល់ថ្ងៃទី៣ ខែកក្កដានេះ ៕