សេចក្តីប្រកាសព័ត៌មានស្ថានទូតអាមេរិកប្រចាំទីក្រុងភ្នំពេញបានឲ្យដឹងថា អ្នកស្ម័គ្រចិត្តភីខបស៍ ១ក្រុមថ្មីនេះជាក្រុមទី៥ នឹងប្រារព្ធពិធីសច្ចាប្រណិធានចូលបំពេញការងារក្នុងប្រទេសកម្ពុជា នៅរសៀលថ្ងៃច័ន្ទ ទី៣ ខែតុលា ដែលរហូតមកដល់ពេលនេះ មានអ្នកស្ម័គ្រចិត្តទីភ្នាក់ងារភីខបស៍ជាង ១រយនាក់ បានចុះតាមខេត្តក្រុងចំនួន១៥ ក្នុងប្រទេសកម្ពុជា។
ស្ថានទូតអាមេរិកបានឲ្យដឹងថា អ្នកស្ម័គ្រចិត្តអាមេរិកក្នុងក្រុមភីខបស៍នឹងធ្វើការជាមួយសមភាគីកម្ពុជា ក្នុងគម្រោងនានាក្នុងសហគមន៍ រួមមាន គម្រោងអប់រំបរិស្ថាន ការការពារអំពើហិង្សាក្នុងគ្រួសារ ការអភិវឌ្ឍជំនួញខ្នាតតូច និងជំនាញក្នុងការដឹកនាំសម្រាប់ក្មេងស្រី ជាដើម។
ពិធីសច្ចាប្រណិធានរបស់ភ្នាក់ងារស្ម័គ្រចិត្តភីខបស៍នឹងប្រារព្ធធ្វើនៅរសៀលថ្ងៃទី៣ ខែតុលា នាមជ្ឈមណ្ឌលព័ត៌មានវប្បធម៌ ទេសចរណ៍ និងពាណិជ្ជកម្មភ្នំពេញ ឬមជ្ឈមណ្ឌលវប្បធម៌កូរ៉េ។
ពិធីនេះក៏មានលោក ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជា និងលោក Jeff Daigle ភារធារីស្ថានទូតសហរដ្ឋអាមេរិក ប្រចាំនៅកម្ពុជា នឹងអញ្ជើញចូលរួមថ្លែងសុន្ទរកថានៅក្នុងកម្មវិធីនោះដែរ។
ស្ថានទូតអាមេរិកបានឲ្យដឹងថា ទីភ្នាក់ងារភីខបស៍បានបង្កើតឡើងដោយអតីតប្រធានាធិបតីអាមេរិក ចន កេណ្ឌឺឌី (John F. Kennedy) ក្នុងឆ្នាំ១៩៦១ ដើម្បីលើកកម្ពស់សន្តិភាពពិភពលោក និងមិត្តភាព។ គោលដៅរបស់ទីភ្នាក់ងារភីខបសស៍ គឺផ្ដល់ការបណ្ដុះបណ្ដាល និងការអប់រំដល់បុរសស្ត្រី នៅតាមបណ្ដាប្រទេស ដែលមានការចាប់អារម្មណ៍ និងដើម្បីលើកកម្ពស់ការយល់គ្នាទៅវិញទៅមក រវាងសហរដ្ឋអាមេរិក និងប្រទេសដទៃទៀត។
នៅឆ្នាំ២០១១ នេះ ទីភ្នាក់ងារភីខបស៍បានប្រារព្ធខួបលើកទី៥០ របស់ខ្លួន ដោយចាប់តាំងពីឆ្នាំ១៩៦១ មក មានអ្នកស្ម័គ្រចិត្តចំនួនជាង ២សែននាក់ បានបម្រើការងារក្នុងទីភ្នាក់ងារនេះ នៅតាមប្រទេសចំនួន១៣៩ ក្នុងពិភពលោក៕