ពលរដ្ឋបារម្ភពីការឆ្លងរាតត្បាតនៃគ្រុនផ្ដាសាយA(H1N1)នៅកម្ពុជា

ដោយ ហ្សាការីយ៉ា

2009-10-08

ប្រជាពលរដ្ឋខ្មែរភាគច្រើនបានសម្ដែងនូវក្តីព្រួយបារម្ភចំពោះការឆ្លងជំងឺគ្រុនផ្តាសាយថ្មី A(H1N1) ដែលបានរាតត្បាតឆ្លងមកដល់ប្រទេសកម្ពុជាក្នុងពេលថ្មីៗ និងបណ្តាលឲ្យប្រជាពលរដ្ឋស្លាប់ចំនួន៣នាក់ហើយនោះ។

AFP Photo

អ្នកធ្វើដំណើរពាក់ម៉ាសដើម្បីការពារការឆ្លងជំងឺគ្រុនផ្ដាសាយជ្រូកនៅឯព្រលានយន្តហោះអន្តរជាតិ Los Angeles សហរដ្ឋអាមេរិក កាលពីថ្ងៃ២៩ មេសា ២០០៩។

ប្រជាពលរដ្ឋមួយចំនួនបានឲ្យដឹងថា ពួកគេមានការភ័យខ្លាចអំពីការឆ្លងជំងឺផ្តាសាយប្រភេទថ្មីនេះ ដោយសារពួកគេភាគច្រើនជាកសិករក្រីក្រ គ្មានលទ្ធភាពនឹងព្យាបាល បើសិនជាកើតមានដល់គ្រួសាររបស់ពួកគេ។ ជាមួយគ្នានេះ ប្រជាពលរដ្ឋមួយចំនួនទៀតមិនទាន់បានដឹងអំពីវិធីការពារ និងមិនទាន់បានដឹងពីជំងឺនេះបានឆ្លងនៅកម្ពុជានៅឡើយទេ។

ស្ត្រីម្នាក់នៅភូមិត្រពាំងព្រះទី១ ខែត្រព្រៃវែង បានឲ្យដឹងថា អ្នកស្រីក៏ដូចជាអ្នកភូមិដទៃទៀត មានការព្រួយបារម្ភនិងភ័យខ្លាចជំងឺគ្រុនផ្តាសាយថ្មីប្រភេទ A(H1N1) ឆ្លងមកដល់អ្នកភូមិដែលជាប្រជាពលរដ្ឋក្រីក្រ កុំថាឡើយជំងឺគ្រុនផ្តាសាយថ្មីដែលពិបាកព្យាបាល សូម្បីតែក្នុងគ្រួសាររបស់គាត់មានជំងឺទូទៅ ក៏គ្មានលុយទៅព្យាបាលនៅមន្ទីរពេទ្យដែរ។

អ្នកស្រីបន្តថា បើសិនជាអ្នកមានគេមិនសូវព្រួយបារម្ភទេ ព្រោះគេអាចទៅរកមន្ទីរពេទ្យឯកជនល្អៗដើម្បីព្យាបាល ទោះបីជាជំងឺអ្វីក៏ដោយ ៖ «ដឹងខ្លះ ដូចថា គេឲ្យការពារ ពាក់ម៉ាស់ ហើយបើមានអ្នកជំងឺឈឺ កុំឲ្យកុមារទៅជិត មិនឲ្យនិយាយ ទាក់ទងតាមទូរស័ព្ទបាន មិនឲ្យសួរសុខទុក្ខដោយផ្ទាល់។ ខ្ញុំព្រួយបារម្ភដែរ ព្រោះខ្ញុំមានកូនតូចៗ។ ដឹងមិនច្បាស់ដែរ ខ្ញុំចង់ដឹងពីវិធីការពារ»។

ប្រជាពលរដ្ឋមួយរូបទៀតឈ្មោះ ចាន់ សារី មានប្រសាសន៍ថា លោកគ្រាន់តែឮគេនិយាយតៗគ្នាប៉ុណ្ណោះ ថាជំងឺផ្តាសាយថ្មីងាយនឹងឆ្លងពីមនុស្សម្នាក់ទៅមនុស្សម្នាក់ ប៉ុន្តែលោកមិនទាន់បានដឹងផ្ទាល់ពីមន្ត្រីសុខាភិបាលប្រកាសប្រាប់ដល់ប្រជាពលរដ្ឋនៅតាមជនបទដាច់ស្រយាលនោះទេ ថាតើត្រូវការពារតាមវិធីណានោះ។ លោកបញ្ជាក់ថា បើសិនជាជំងឺនេះឆ្លងដល់តំបន់ជនបទនៃប្រទេសកម្ពុជា គឺងាយស្រួលឆ្លងពីម្នាក់ទៅម្នាក់ដោយងាយ ពីព្រោះប្រជាពលរដ្ឋនៅតំបន់ជនបទមានការយល់ដឹងតិចតួច អំពីការថែទាំសុខភាពនិងវិធីការពារ។

លោក ចាន់ សារី មានប្រសាសន៍ដូច្នេះ ៖ «មិនសូវដឹង ឮតែគេថា ឲ្យប្រើម៉ាស់ការពារ កាលគេផ្សាយក្នុងទូរទស្សន៍ហ្នឹង។ សូមឲ្យរដ្ឋាភិបាលជួយទប់ស្កាត់រោគហ្នឹងកុំឲ្យឆ្លង»។

ប្រជាពលរដ្ឋឈ្មោះ ប៊ុន ធឿន នៅខែត្រកណ្តាល បានឲ្យដឹងដែរថា ប្រជាពលរដ្ឋនៅភូមិរបស់លោកខ្លះមិនជឿថាមានជំងឺគ្រុនផ្តាសាយថ្មីប្រភេទ A(H1N1) ឆ្លងមកដល់កម្ពុជានោះទេ។ ប៉ុន្តែមួយចំនួនទៀតបានដឹងតាមរយៈការស្តាប់វិទ្យុនិងមើលទូរទស្សន៍។ លោកបន្តថា លោកមានការភ័យខ្លាចជំងឺនេះឆ្លងដល់សាច់ញាតិរបស់លោកដោយមិនដឹងខ្លួន ព្រោះថា ពេទ្យនៅខែត្រការព្យាបាលមិនដូចពេទ្យនៅក្នុងរាជធានីភ្នំពេញនោះឡើយ។

លោក ប៊ុន ធឿន បានឲ្យដឹងដូច្នេះ ៖ «ការកើតហ្នឹងគេអត់ទាន់ជឿ ប៉ុន្តែគេប្រាប់ ផ្សាយតាមទូរទស្សន៍ វិទ្យុ គេឲ្យប្រយ័ត្ន ម្ល៉ោះហើយអ្នកស្រុកហ្នឹងចេះតែប្រយ័ត្នទៅ។ គេឮតាមហ្នឹង ប៉ុន្តែឃើញផ្ទាល់អត់ទាន់មាន»។

អាជីវករមួយរូបក្នុងរាជធានីភ្នំពេញ ឈ្មោះ ទុយ មានប្រសាសន៍ថា លោកមិនបានគិតអំពីគ្រុនផ្តាសាយថ្មីនេះទេ លោកគិតតែអំពីការលក់ដូររបស់លោកតែប៉ុណ្ណោះ ព្រោះស្របពេលដែលសេដ្ឋកិច្ចពិភពលោកធ្លាក់ចុះ គឺប៉ះពាល់ដល់ការលក់ដូររបស់លោកដែរ បើខំលក់ដូរទេកូនៗរបស់លោកនឹងគ្មានថវិកាទៅរៀន។ ប៉ុន្តែយ៉ាងនេះក្តី លោកតែងតែមានការប្រុងប្រយ័ត្នដែរ នៅពេលធ្វើដំណើរទៅណាមកណា។

មន្ត្រីនគរបាលមួយរូបសុំមិនបញ្ចេញឈ្មោះមានប្រសាសន៍ថា លោកក៏ដូចជាប្រជាពលរដ្ឋទូទៅដែរ គឺមានការព្រួយបារម្ភអំពីការឆ្លងជំងឺគ្រុនផ្តាសាយថ្មីនេះ ដោយសារជំងឺនេះពិបាកនឹងព្យាបាល ហើយម្យ៉ាងទៀតប្រាក់បៀវត្សរ៍មានតិច ទោះបីទៅព្យាបាលនៅមន្ទីរពេទ្យសាធារណៈក៏ត្រូវចំណាយថវិកាច្រើនដែរ នៅពេលចូលទៅព្យាបាលជំងឺ។

មន្រ្តីនគរបាលសុំមិនបញ្ចេញឈ្មោះមានប្រសាសន៍ដូច្នេះ ៖ «ចំពោះបញ្ហានេះ ខ្ញុំសូមអំពាវនាវដល់រាជរដ្ឋាភិបាលទាំងអស់ សូមជួយការពារនិងជួយទប់ស្កាត់ឲ្យបាន ជួយដល់ប្រជាពលរដ្ឋដែលក្រីក្រផង»។

រហូតមកទល់ពេលនេះ គឺមានប្រជាពលរដ្ឋខ្មែរបានឆ្លងជំងឺគ្រុនផ្តាសាយថ្មីប្រភេទA(H1N1) ចំនួន១២០នាក់ហើយ ក្នុងនោះបានស្លាប់ចំនួន៣នាក់ គឺស្រី២នាក់ប្រុសម្នាក់ ដោយការស្លាប់លើកទី១ ដោយសារឆ្លងជំងឺគ្រុនផ្តាសាយថ្មីនេះ កាលពីថ្ងៃទី២៧ កញ្ញា កន្លងទៅ ទី២ គឺបុរសម្នាក់បានស្លាប់កាលពីថ្ងៃទី៥ តុលា និងករណីទី៣ គឺស្ត្រីមានផ្ទៃពោះម្នាក់បានស្លាប់នៅថ្ងៃទី៦ តុលា ប៉ុន្តែទារិកាក្រុមគ្រូពេទ្យបានសង្គ្រោះបានដោយសុវត្ថិភាព។ ជនរងគ្រោះខាងលើបានស្លាប់ក្នុងមន្ទីរពេទ្យកាល់ម៉ែត ដែលមានអាសយដ្ឋាននៅខណ្ឌចំការមនដូចគ្នា។

មន្ត្រីឯកទេសខាងសុខភាពសាធារណៈនៃអង្គការសុខភាពពិភពលោក វេជ្ជបណ្ឌិត នីម៉ា អាសហ្គារី បានឲ្យដឹងថា ថ្វីត្បិតតែចំនួនអ្នកស្លាប់ដោយសារជំងឺគ្រុនផ្តាសាយថ្មីនេះ មិនទាន់ខ្ពស់នៅឡើយនៅកម្ពុជា ប៉ុន្តែបើប្រៀបធៀបទៅនឹងប្រទេសដែលកំពុងអភិវឌ្ឍន៍ដូចគ្នានេះ គេត្រូវតែឲ្យប្រជាពលរដ្ឋប្រុងប្រយ័ត្នពីបញ្ហានេះ ដូចជាការក្អកត្រូវខ្ទប់មាត់ សម្អាតដៃជើងនឹងសាប៊ូ ហើយសម្រាកនៅផ្ទះនៅពេលឈឺ និងមិនត្រូវចម្លងមេរោគឲ្យអ្នកដទៃទៀតនោះទេ។

រដ្ឋមន្ត្រីក្រសួងសុខាភិបាល លោកវេជ្ជបណ្ឌិត ម៉ម ប៊ុនហេង បានបញ្ជាក់ថា ក្រសួងសុខាភិបាលបានបង្កើតកន្លែងព្យាបាលចំនួនពីរកន្លែងរួចហើយ គឺនៅមន្ទីរពេទ្យកាល់ម៉ែតនិងមន្ទីរពេទ្យរុស្ស៊ី សម្រាប់ព្យាបាលអ្នកឆ្លងជំងឺគ្រុនផ្តាសាយថ្មី។ លោកក៏បានតម្រូវឲ្យគ្រប់មន្ទីរព្យាបាលឯកជនទាំងអស់ ត្រូវបញ្ជូនមកមន្ទីរពេទ្យរដ្ឋជាបន្ទាន់ពេលមានករណីសង្ស័យ។

យ៉ាងនេះក្តី ប្រជាពលរដ្ឋមួយចំនួនក៏បានព្រួយបារម្ភអំពីការព្យាបាលនៅមន្ទីររដ្ឋ ដែលក្រុមគ្រូពេទ្យបានទាមទារថវិកាច្រើនក្នុងពេលព្យាបាលផងដែរ។

របាយរការណ៍របស់អង្គការសុខភាពពិភពលោកបានឲ្យដឹងថា ជំងឺគ្រុនផ្តាសាយថ្មីប្រភេទ A(H1N1) បានរាតត្បាតនៅក្នុងពិភពលោក ដោយមានអ្នកជំងឺសរុបចំនួន ៣៤០.០០០ករណី ក្នុងនោះបានស្លាប់ជាង៤.១០០នាក់ របាយការណ៍នេះគិតត្រឹមថ្ងៃទី២ តុលា ឆ្នាំ២០០៩។

ប្រទេសកម្ពុជាបានកត់ត្រាករណីជំងឺគ្រុនផ្តាសាយថ្មី ដែលត្រូវបានអះអាងឡើងជាលើកដំបូងរបស់ខ្លួន កាលពីចុងខែមិថុនា ក្រោយពីលទ្ធផលធ្វើតេស្តមួយចំនួនលើទេសចរជនជាតិអាមេរិកម្នាក់ អាយុ១៦ឆ្នាំ បានបង្ហាញថាវិជ្ជមាននោះមក៕

បោះពុម្ព អ៊ីម៉េល