ស្រ្តីម្នាក់តំណាងអាជីវករជាច្រើនរយនាក់រស់នៅក្នុងទីក្រុងភ្នំពេញ បានមានប្រសាសន៍ត្អូញត្អែរប្រាប់វិទ្យុអាស៊ីសេរីថា លោកស្រីមានរថយន្តប្រភេទ Pick-Up ដឹកទំនិញចំនួន៣គ្រឿង សម្រាប់ប្រើប្រាស់ ប៉ុន្តែលោកស្រីកំពុងតែជួបប្រទះនឹងការលំបាក ៖ «មានអ្នកតំណាង អ្នកដែលគេមានឡាន ២តោនកន្លះ គាត់កើតទុក្ខមិនសុខចិត្តដោយសារសាលាក្រុងចេញច្បាប់ ឲ្យសុំច្បាប់បើកបរលើផ្លូវហ្នឹង មួយខែបង់ ២០ដុល្លារ ហើយមួយខែសុំម្ដងៗ។ ២០ថ្ងៃ ត្រូវតែសុំច្បាប់ ដល់អ៊ីចឹងវាយ៉ាប់យ៉ឺនមែនទែន ហើយគេមិនសុខចិត្ត។ បង់ផ្លូវមួយឆ្នាំ អស់តែ ២៥ម៉ឺនទេ សាលាក្រុងចេញច្បាប់មក ឲ្យបង់មួយខែ ២០ដុល្លារ ហើយមួយខែសុំច្បាប់ម្ដង បើមិនអ៊ីចឹងទេចាប់ ចាប់ផាកម្ដង ៨ម៉ឺន ១០ម៉ឺន។ គេទើបចាប់ផ្ដើមចាប់ ២-៣ខែហ្នឹងទេ ហើយខ្ញុំ ក៏ទើបចាប់ផ្ដើមបង់តាំងពីខែ៦»។
ទាក់ទងនឹងបញ្ហាដូចគ្នាខាងលើនេះ លោក សុខ ហ៊ុយ តំណាងអាជីវករដែលមានរថយន្តប្រភេទ pick-up សម្រាប់ជួលផងដែរនោះ បានមានប្រសាសន៍ថា លោកមានរថយន្តចំនួន២គ្រឿង លោកកំពុងតែមានបញ្ហាលំបាកក្នុងការបង់ប្រាក់សុំការអនុញ្ញាតបើកបរក្នុងទីក្រុងភ្នំពេញ។
លោក សុខ ហ៊ុយ ថ្លែងដូច្នេះថា ៖ «ទារឲ្យបង់ ២០ដុល្លារហើយ មួយខែបង់ម្ដងទៀត។ រវល់តែបង់អាហ្នឹង មិនបាច់រកស៊ីអីទេ រវល់តែបង់អាហ្នឹង។ បើមួយឆ្នាំសុំម្ដងអីទៅ ឬមួយក៏លុបអាហ្នឹងចោលទៅ ឡានតូចដែរ មិនមែនឡានធំ បើសិនជាឡានធំដឹកដី តម្រូវឲ្យបង់ មិនថាអីទេ»។
លោក ម៉ាន់ ឈឿន អភិបាលរងនៃសាលាក្រុងភ្នំពេញ បានមានប្រសាសន៍ថា លោកសុំមិនធ្វើអត្ថាធិប្បាយជុំវិញបញ្ហាខាងលើនេះទេ ពីព្រោះមានលោក ឈាង សុផាន ជាអភិបាលរងម្នាក់ទៀតទទួលបន្ទុកបញ្ហានេះ។
វិទ្យុអាស៊ីសេរីមិនអាចទាក់ទងលោក ឈាង សុផាន ដើម្បីសុំសេចក្តីបំភ្លឺឬសេចក្តីអត្ថាធិប្បាយបានភ្លាមៗទេ នៅថៃ្ងចន្ទនេះ ជុំវិញការតវ៉ាខាងលើនេះ។
លោក អឹង ជុនហួរ អគ្គនាយកនៃអគ្គនាយកដ្ឋានរបស់ក្រសួងសាធារណការនិងដឹកជញ្ជូនក្នុងប្រទេសកម្ពុជា បានមានប្រសាសន៍សម្ដែងការព្រួយបារម្ភអំពីកំណើនរបស់រថយន្តនិងម៉ូតូប្រើប្រាស់ក្នុងប្រទេសកម្ពុជាថា ៖ «ព្រួយខ្លាំងមែនទែន ព្រោះឥឡូវហ្នឹង កាន់តែចង្អៀតទៅៗ ហើយផ្លូវយើងនៅដដែល ស្ទះចរាចរណ៍ស្ទះខ្លាំង»។
លោកបានបញ្ជាក់ឲ្យដឹងថា នៅក្នុងប្រទេសកម្ពុជានាពេលបច្ចុប្បន្ននេះ មានមធ្យោបាយធ្វើដំណើរដូចជាម៉ូតូចំនួនជាងកន្លះលានគ្រឿងនិងរថយន្តគ្រប់ប្រភេទចំនួនជាង ១០ម៉ឺនគ្រឿង កំពុងតែធ្វើចរាចរណ៍ក្នុងប្រទេសកម្ពុជា ជារៀងរាល់ថ្ងៃ។
លោកប៉ាន់ស្មានថា មធ្យោបាយធ្វើដំណើរទាំងនោះ នឹងមានការកើនទើ្បងថែមទៀត ដោយសារការហូរចូលពីប្រទេសជិតខាង៕