ប្រជាពលរដ្ឋមួយចំនួននៅឃុំល្បើក និងឃុំត្រពាំងភ្លាំង ស្រុកឈូក ខេត្តកំពត បានតវ៉ាថា ពួកគាត់ត្រូវអាជ្ញាធររារាំងមិនឲ្យចូលរួមពិធីចែកប័ណ្ណកម្មសិទ្ធិដីនៅក្នុងតំបន់គាត់រស់នៅ។ ពួកគាត់បានចោទថា អាជ្ញាធរទំនងរើសយកតែអ្នកគាំទ្រគណបក្សប្រជាជនកម្ពុជា ទើបអាចមានឈ្មោះឲ្យចូលរួមក្នុងពិធីចែកប័ណ្ណកម្មសិទ្ធិដីនោះបាន។
ប្រជាពលរដ្ឋភូមិព្រៃពាយ សុំមិនប្រាប់ឈ្មោះថ្លែងថា គាត់ចង់ទទួលប័ណ្ណកម្មសិទ្ធិដីពីនាយករដ្ឋមន្ត្រីដោយផ្ទាល់ដៃ ក្នុងពេលដែលលោក ហ៊ុន សែន ចុះផ្ទាល់ដល់មូលដ្ឋានភូមិត្រពាំងស្តៅ ដើម្បីចែកប័ណ្ណកម្មសិទ្ធិដី។ ប៉ុន្តែអាជ្ញាធរដែនដីប្រហែលជារើសអើងប្រជាពលរដ្ឋគ្នាឯង ឬប្រកាន់គណបក្សនយោបាយ ទើបមិនចែកលិខិតឲ្យគាត់បានចូលស្ដាប់ និងឃើញមុខថ្នាក់ដឹកនាំផ្ទាល់៖ «គណបក្សណាក៏ខ្ញុំអត់ប្រកាន់ថាអ្នកនេះខុស អ្នកនោះត្រូវដែរ ប៉ុន្តែរឿងគាត់មកចង់ទៅជួបទៅឃើញដែរ តែគេអត់ឲ្យចូលឲ្យទៅ អន់ចិត្តដែរ»។
ប្រជាពលរដ្ឋភូមិស្រែលាវ ឈ្មោះ រាម បុត្រ ថ្លែងថា គាត់បានធ្វើប័ណ្ណកម្មសិទ្ធិរួចហើយ។ គាត់ចង់ទទួលបានប័ណ្ណដីនោះចែកឲ្យគាត់ផ្ទាល់ដៃនាយករដ្ឋមន្ត្រី។ ប៉ុន្តែមេភូមិប្រាប់ថា គេកំណត់មនុស្សតែ ៧០០នាក់ ឲ្យចូលរួមក្នុងពិធីចែកប័ណ្ណកម្មសិទ្ធិដីនោះ៖ «៧០០នាក់ហ្នឹងតាមមើលបែបសុទ្ធតែប្រកាន់តួនាទីជាគណបក្សនយោបាយអ៊ីចឹង»។
លោក ម៉ែន សុខខៃ មេឃុំល្បើក គណបក្សសិទ្ធិមនុស្ស និងលោក ទេព វ៉ាន ជំទប់ទី២ ឃុំល្បើកគណបក្ស សម រង្ស៊ី បដិសេធព័ត៌មានថា អ្នកទៅទទួលបានប័ណ្ណកម្មសិទ្ធិដីពីលោកនាយករដ្ឋមន្ត្រីរើសយកតែអ្នកគាំទ្រគណបក្សប្រជាជនកម្ពុជា គឺមិនពិតទេ ព្រោះនៅក្នុងឃុំល្បើក មានប្រជាពលរដ្ឋគ្រប់គណបក្សបានទទួលប័ណ្ណកម្មសិទ្ធិពីនាយករដ្ឋមន្ត្រី ហ៊ុន សែន នៅព្រឹកថ្ងៃពុធ ទី១០ ខែតុលា៖ «ប្រជាពលរដ្ឋវាមិនមែនថា សុទ្ធសាធតែប្រជាពលរដ្ឋខាងគណបក្សប្រជាជនទេ វាមានពីគ្រប់ទាំងអស់ក្នុងការវាស់វែងដី»។
មេភូមិព្រៃពាយ លោក ហេង សាន ថ្លែងថា ភូមិព្រៃពាយ មិនទាន់បានប័ណ្ណកម្មសិទ្ធិទេ ទើបតែបានវាស់ដី និងកាត់ចេញដីមួយចំនួនដែលប្រជាពលរដ្ឋកំពុងរស់នៅតែមានពាក់ព័ន្ធដីក្រុមហ៊ុនត្រូវប្រមុខរដ្ឋាភិបាលបញ្ជាឲ្យកាត់ចេញពីដីសម្បទានសេដ្ឋកិច្ច ដើម្បីប្រគល់សិទ្ធិជូនប្រជាពលរដ្ឋកាន់កាប់ដីវិញ។
លោកថា ពលរដ្ឋទទួលបានប័ណ្ណកម្មសិទ្ធិដីបានច្រើនប័ណ្ណគឺឃុំល្បើក ឯឃុំត្រពាំងភ្លាំង ទើបបានភូមិត្រពាំងភ្លាំង មួយទេ។ ចំពោះការអនុញ្ញាតឲ្យពលរដ្ឋចូលរួមក្នុងពិធីចែកប័ណ្ណកម្មសិទ្ធិដីនៅថ្ងៃពុធ ទី១០ ខែតុលា មានតែប្រជាពលរដ្ឋដែលមានឈ្មោះបិទផ្សាយកន្លងមក ទើបអាចទៅទទួលប័ណ្ណផ្ទាល់ដៃពីលោក ហ៊ុន សែន បាន។ ចំណែកអ្នកភូមិព្រៃពាយ បានចូលរួមក្នុងពិធីមានអាជ្ញាធរភូមិទាំង ២នាក់ប៉ុណ្ណោះ។
លោកថា ចែកប័ណ្ណកម្មសិទ្ធិដីនោះ រដ្ឋាភិបាលមិនរើសអើងប្រជាពលរដ្ឋនៅគណបក្សណាទេ ដីគ្រួសារណាដែលក្រុមនិស្សិតស្ម័គ្រចិត្តបានវាស់ដីជូនរួច ហើយមានកន្ទុយប័ណ្ណ និងបានថតរូបនៅពីមុខដីរបស់ខ្លួន និងមានឈ្មោះបិទប្រកាសលើកទី១ហើយនោះ គ្រួសារនោះត្រូវមានឈ្មោះទៅទទួលប័ណ្ណផ្ទាល់ពីនាយករដ្ឋមន្ត្រីនៅថ្ងៃ១០ ខែតុលា ឆ្នាំ២០១២៖ «គាត់អត់បានកម្មសិទ្ធិអ៊ីចឹងគាត់ភ័យខ្លាចអីចេះអីចុះ។ តាមគេនិយាយមាត់មួយមាត់ពីរថា ធ្វើប្លង់ហើយ វាស់វែងហើយយកវិញអី ក្រុមហ៊ុនយកវិញ មានក្រុមហ៊ុនមានអ៊ីចឹង ហើយឥឡូវសប្បាយចិត្តមែនទែន អរគុណសម្តេចដែលបានចុះមកចែកផ្ទាល់»។
ដីកសិកម្មនៅក្នុងស្រុកឈូក មានដីសម្បទានសេដ្ឋកិច្ចជាច្រើនដែលរដ្ឋាភិបាលបានប្រគល់ឲ្យក្រុមហ៊ុនមួយចំនួនកាន់កាប់ និងដាំដុះដំណាំកសិឧស្សាហកម្ម។ ការផ្តល់ដីសម្បទានសេដ្ឋកិច្ចនោះ បណ្ដាលឲ្យប៉ះទង្គិចការរស់នៅប្រកបអាជីវកម្មជាប់លាប់របស់ពលរដ្ឋក្នុងតំបន់។ ទោះជាយ៉ាងណា នាយករដ្ឋមន្ត្រីខ្មែរបានប្រកាសកាត់យកដីវិនិយោគ ឬឆ្វៀលចេញនូវដីណាដែលប្រជាជនកំពុងកាន់កាប់ និងរស់នៅ។
មេភូមិព្រៃពាយ លោក ហេង សាន ថ្លែងថា ភូមិព្រៃពាយ បានទទួលដីជាង ៣.០០០ហិកតារ ដែលរដ្ឋបានកាត់មកឲ្យប្រជាពលរដ្ឋពីដីសម្បទានសេដ្ឋកិច្ច។ ក្រុមនិស្សិតកំពុងចុះវាស់វែង។ លោកសង្ឃឹមថា នៅវគ្គទី២ នៃការបែងចែកប័ណ្ណកម្មសិទ្ធិដី លោកនាយករដ្ឋមន្រ្តី ហ៊ុន សែន នឹងចុះមកចែកទៀត សុំឲ្យប្រជាពលរដ្ឋកុំអាក់អន់ចិត្តនៅពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។