យុវជនក្មេងៗខ្លះ នៅក្នុងពេលគោរពព្រះវិញ្ញាណក្ខន្ធនោះ បានស្ម័គ្រចិត្តកោរសក់របស់ខ្លួន ដើម្បីកាន់ព្រះបរមមរណទុក្ខ និងបួសមុខភ្លើងថ្វាយព្រះករុណា ព្រះមហាវីរក្សត្រ នៅពេលដែលទ្រង់បានសោយទិវង្គត។
សំឡេងសូត្រធម៌ បង្សុកូល របស់ព្រះសង្ឃ និងពុទ្ធបរិស័ទស្រីប្រុសច្រើននាក់ ថ្វាយព្រះបរមសពរបស់សម្ដេចឪ ព្រះបិតាឯករាជ្យជាតិ បន្លឺឡើងយ៉ាងកងរំពងនៅពីមុខព្រះបរមរាជវាំង។
កុមារអាយុក្រោម ១៥ឆ្នាំ ប្រុសស្រី ៦នាក់ មកពីខេត្តផ្សេងៗ បានស្លៀកពាក់ខោ និងសំពត់ខ្មៅ អាវស និងមានខ្ទាស់បូខ្មៅកាន់ទុក្ខ បានយកផ្កាទៅដាក់លើតុមួយ ពីមុខព្រះឆាយាល័ក្ខណ៍ ព្រះមហាវីរក្សត្រ និងបានអុជធូបបួងសួងសុំព្រះវិញ្ញាណក្ខន្ធ ព្រះមហាវីរក្សត្រ យាងទៅកាន់ឋានសួគ៌។
កុមារី ស្រីរ័ត្ន អាយុ ១៣ឆ្នាំ ជាសិស្សសាលាសុភមង្គល ក្នុងខណ្ឌពោធិ៍សែនជ័យ ថ្លែងនៅថ្ងៃសុក្រ ទី១៩ ខែតុលា ឆ្នាំ២០១២ ថា គាត់មកគោរពព្រះបរមសព សម្ដេចតា ព្រោះព្រះអង្គបានជួយប្រជានុរាស្ត្រទទួលបានសេចក្តីសុខ ទើបរូបគាត់មកចូលរួមបួងសួងនៅមុខព្រះឆាយាល័ក្ខណ៍របស់ព្រះអង្គនេះ៖ «ចង់ធ្វើបុណ្យឲ្យគាត់ ទៅឡើងឋានសួគ៌»។
កុមារី ស្រី ម៉ៅ អាយុ ១២ឆ្នាំ មកពីស្រុកអូររាំងឪ ខេត្តកំពង់ចាម បានថ្លែងថា ពួកគេគឺជាកុមារក្រីក្រ ធ្លាប់ទទួលអំណោយពីសម្ដេចតា។ នៅពេលព្រះអង្គសោយទិវង្គត ពួកគេមកបន់ស្រន់សុំឲ្យព្រះអង្គកើតទៅជាស្ដេច គ្រប់គ្រងផែនដីបន្តទៀត៖ «ដើម្បីបួងសួងឲ្យគាត់មានសេចក្តីសុខ កើតជាតិណាៗ ឲ្យគាត់ក្លាយជាព្រះអង្គដូចដើម»។
កុមារា ជាន អាយុ ១៤ឆ្នាំ មកពីស្រុកកំពង់លាវ ខេត្តព្រៃវែង ថ្លែងថា ពួកគេមកគោរពព្រះបរមសព សម្ដេចតា ព្រោះទ្រង់បានផ្តល់ភាពកក់ក្តៅដល់រូបគេ និងកុមារក្រីក្រ។ ព្រះមហាវីរក្សត្របានផ្តល់អាហារ សម្ភារៈសិក្សា សម្ភារៈរស់នៅ និងថវិកាដល់រូបគាត់។ នៅពេលសម្ដេចតាសោយទិវង្គត រូបគាត់មកបន់ស្រន់សុំឲ្យព្រះវិញ្ញាណក្ខន្ធរបស់ព្រះអង្គ យាងទៅកាន់ឋានសួគ៌៖ «ព្រោះកាលគាត់នៅរស់ គាត់បានជួយសង្គ្រោះប្រជាជនខ្មែរយើង»។
យុវសិស្ស យាង វីរបុត្រ អាយុ ១៥ឆ្នាំ រស់នៅខណ្ឌពោធិ៍សែនជ័យ កំពុងសុំឲ្យព្រះសង្ឃកោរសក់នៅមុខព្រះឆាយាល័ក្ខណ៍ ព្រះមហាវីរក្សត្រ ថ្លែងថា គេចង់បួសមុខភ្លើង បូជាភាពយុវវ័យរបស់គេ ថ្វាយព្រះវិញ្ញាណក្ខន្ធសម្ដេចតា៖ «ព្រោះគាត់បានមើលថែប្រជាជនអី ជួយប្រទេសជាតិ ឲ្យរួចផុតពីអាណានិគមបារាំង»។
ក្រៅពីក្រុមកុមារ ស្ត្រីវ័យ ៥៦ឆ្នាំ ឈ្មោះ ចាន់ សូម៉ា ជាមន្ត្រីអង្គការស៊ីម៉ាក់ ថ្លែងថា ព្រះមហាវីរក្សត្រទ្រង់ធ្លាប់ប្រទានក្រណាត់សង្គមរាស្ត្រនិយមដល់គាត់ តាំងពីគាត់នៅជាកុមារភាព អាយុ ១០ឆ្នាំ៖ «សកម្មភាពរបស់ព្រះអង្គនៅក្នុងការជួយជាតិ ផ្សះផ្សាជាតិ ដោយច្បាំងនឹងវិហារដោយមិនបាច់ប្រើគ្រាប់កាំភ្លើង គឺបានជ័យជំនះ ដើម្បីទាមទារបានទឹកដីត្រឡប់យកមកវិញ គឺថាមានតែព្រះអង្គទេ ជាវីរ មហាវីរក្សត្រ»។
នៅថ្ងៃទី១៩ ខែតុលា ឆ្នាំ២០១២ ជាថ្ងៃទី៣ នៃព្រះបរមសព ព្រះករុណា ព្រះបាទសម្ដេចព្រះ នរោត្តម សីហនុ យាងនិវត្តមកដល់ប្រទេសកម្ពុជា វិញ។ ប្រជារាស្ត្រជាច្រើន មានបំណងប្រាថ្នាចង់ទៅគោរពព្រះវិញ្ញាណក្ខន្ធ ព្រះបរមសព នៅក្នុងព្រះបរមរាជវាំងផ្ទាល់ ប៉ុន្តែពួកគាត់មិនអាចមានលទ្ធភាពចូលទៅក្នុងបានឡើយ។ រហូតមកដល់ពេលនេះ ពួកគាត់បានត្រឹមតែគោរពព្រះវិញ្ញាណក្ខន្ធនៅពីក្រៅរបងព្រះបរមរាជវាំងប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។