តំណាងប្រជាពលរដ្ឋចំនួនជាង ៣០គ្រួសារ នៃតំបន់បុរីកីឡាដែលផ្ទុកមេរោគអេដស៍ កំពុងតែព្រួយបារម្ភយ៉ាងខ្លាំងនៅពេលនេះ ដោយសារតែអាជ្ញាធររាជធានីភ្នំពេញ បានបណ្ដេញពួកគាត់ចេញពីបុរីកីឡា ទៅឆ្ងាយពីមណ្ឌលថែទាំសុខភាព និងឆ្ងាយពីទីកន្លែងទទួលថ្នាំព្យាបាលពន្យារជីវិត។
លោកស្រី ខន ម៉ាលីន អាយុ ៤៦ឆ្នាំ ត្រូវជាម្ដាយចិញ្ចឹមរបស់កុមារីម្នាក់ ដែលផ្ទុកមេរោគអេដស៍ឆ្លងពីម្ដាយ បាននិយាយប្រាប់អ្នកកាសែតនៅក្រៅសភាជាតិ នៅថ្ងៃទី២៥ ខែមករា ថា តំលៃធ្វើដំណើរពីភ្នំបាត មករាជធានីភ្នំពេញ ជាង ៤៥គីឡូម៉ែត្រ ដើម្បីទទួលសេវាថែទាំសុខភាព គឺអស់ ២ម៉ឺនរៀលក្នុងមួយថ្ងៃ។ ចំណែកឯថ្នាំពន្យារជីវិត នឹងអស់ឆាប់ៗនេះ។
អ្នកស្រី ខន ម៉ាលីន៖ «សុំទទូចអង្វរដល់រដ្ឋាភិបាល ក៏ដូចជាក្រុមហ៊ុនផានអ៊ីម៉ិច សុំឲ្យអភិវឌ្ឍន៍ថែម ២អគារទៀតឲ្យខ្ញុំទៅ ព្រោះនេះជាកិច្ចសន្យាដែលគាត់បានសន្យាជាមួយខ្ញុំ។ ខ្ញុំមិនអាចទទួលយកបានសម្ដីរបស់គាត់ (អ្នកស្រី ស៊ុយ សុផាន ) ថាក្ស័យធនទេ។ សំខាន់បើគាត់មិនយោគយល់ខ្ញុំ សុំឲ្យគាត់យោគយល់កូនខ្ញុំ វារៀនថ្នាក់ទី៩ ទី១០ មិនអាចទៅរស់នៅឆ្ងាយបានទេ»។
កុមារីអាយុ ១៣ឆ្នាំដែលផ្ទុកមេរោគអេដស៍តាំងពីឆ្នាំ១៩៩៩ បាននិយាយថា នាងជាក្មេងកំព្រា ពីព្រោះឪពុក និងម្ដាយបានស្លាប់អស់ហើយ ដោយសារជំងឺអេដស៍ នាងត្រូវការរស់នៅក្បែរមណ្ឌលថែទាំសុខភាព ដើម្បីទទួលបានថ្នាំពន្យារជីវិតឲ្យបានទៀតទាត់។
តំណាងរាស្ត្រគណបក្ស សម រង្ស៊ី អ្នកស្រី មូរ សុខហួរ ដែលចេញមុខសុំឲ្យលោកនាយករដ្ឋមន្រ្តី ហ៊ុន សែន និងសាលាក្រុងភ្នំពេញ អន្តរាគមន៍ដោះស្រាយបញ្ហាប្រឈមមុខនេះ បានមានប្រសាសន៍ថា អ្នកស្រីចង់ឲ្យសំឡេងរបស់ប្រជាពលរដ្ឋទាំងនេះ ត្រូវបានដឹងឮជាសាធារណៈ៖ «សូមឲ្យសម្ដេចនាយករដ្ឋមន្រ្តី ផ្ដល់អាទិភាពជូនទៅដល់ប្រជាពលរដ្ឋឲ្យបានឡើងទៅមានផ្ទះនៅបុរីកីឡា។ …កុមារ និងប្រជាពលរដ្ឋដែលមានផ្ទុកមេរោគអេដស៍ តើឲ្យគ្នាទៅឯណា?»។
មន្ត្រីជាន់ខ្ពស់សាលាក្រុងភ្នំពេញ លោក នួន សុម៉េត ដែលទទួលបន្ទុកដោះស្រាយបញ្ហាប្រជាពលរដ្ឋសហគមន៍នៅបុរីកីឡា បានមានប្រសាសន៍ថា លោកមិនទាន់អាចបកស្រាយរឿងនេះទេ ដោយសារលោកជាប់រវល់។
សាលាក្រុងភ្នំពេញ កាលពីថ្ងៃទី៣ ខែមករា ឆ្នាំ២០១២ កន្លងទៅនេះ បានចាត់វិធានការរុះរើផ្ទះសំបែងរបស់ប្រជាពលរដ្ឋជាង ៣០០គ្រួសារនៅបុរីកីឡា ដើម្បីរឹបយកដីធ្លីប្រគល់ឲ្យក្រុមហ៊ុនផានអ៊ីម៉ិច របស់អ្នកស្រី ស៊ុយ សុផាន។
ប្រជាពលរដ្ឋជាង ៣០០គ្រួសារនោះ ត្រូវបានគេដឹកទៅឲ្យរស់នៅតំបន់ភ្នំបាត នៅស្រុកពញាឮ ខេត្តកណ្ដាល និងទៅរស់នៅតំបន់ទួលសំបូរ ជាយទីក្រុងភ្នំពេញ ដែលឆ្ងាយពីសាលារៀនមណ្ឌលថែទាំសុខភាព ទឹកស្អាត និងភ្លើងអគ្គិសនី។
អង្គការការពារសិទ្ធិមនុស្សលីកាដូ (Licadho) និងអង្គការឃ្លាំមើលសិទ្ធិមនុស្ស Human Rights Watch ព្រមទាំងអង្គការការពារសិទ្ធិមនុស្សដទៃទៀត បានសុំឲ្យលោក ហ៊ុន សែន បញ្ឈប់ការបណ្ដេញប្រជាពលរដ្ឋចេញពីបុរីកីឡាដោយបង្ខំ និងសុំឲ្យក្រុមហ៊ុនផានអ៊ីម៉ិច គោរពកិច្ចសន្យាជាមួយប្រជាពលរដ្ឋនៅបុរីកីឡាកន្លងមក៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។