ប្រជាពលរដ្ឋនៅក្នុងឃុំស្រយ៉ូវ ក្រុងសឹ្ទងសែន ខេត្តកំពង់ធំ បានអះអាងថា ពួកគាត់មិនមានការចាប់អារម្មណ៍ទេ ចំពោះគណបក្សនយោបាយណាមួយជាប់ឆ្នោត នៅក្នុងការបោះឆ្នោតរើសសមាជិកក្រុមប្រឹក្សាឃុំ-សង្កាត់ នៅក្នុងអាណត្តិទី៣នេះ។
អ្នកស្រី សឹម យន់ អាយុ ៥៥ឆ្នាំ រស់នៅភូមិពុកយុក ឃុំស្រយ៉ូវ ក្រុងសឹ្ទងសែន ខេត្តកំពង់ធំ មានប្រសាសន៍ថា អ្នកស្រីមិនខ្វល់ថា គណបក្សណាឈ្នះនោះទេ ប៉ុន្តែអ្នកស្រីសូមអោយគណបក្សនយោបាយទាំងអស់ ដែលបានឈ្នះការបោះឆ្នោតនោះ អោយជួយដល់ប្រជាពលរដ្ឋនៅក្នុងឃុំស្រយ៉ូវ ផង។ អ្នកស្រីថា អាណត្តិមុនៗ គណបក្សបានតែសន្យាតែមាត់ទេ តែមិនបានអនុវត្តន៍ការងារដែលខ្លួននិយាយនោះទេ៖ «មិនជឿគណបក្ស ប៉ុន្តែដូចខ្ញុំថា ខ្ញុំនៅវាលមិនសូវដឹងទេ គេឃោសនាម្ដេច មិនសូវដឹង ដល់អញ្ចឹងមិនទាន់ហ៊ានថា ថាមិនកើត»។
លោក ផ្លុង ពន្ធ អាយុ ៧១ឆ្នាំ រស់នៅឃុំស្រយ៉ូវ ក្រុងសឹ្ទងសែន ខេត្តកំពង់ធំ មានប្រសាសន៍នៅថ្ងៃទី៣០ ខែឧសភា នេះថា លោកនឹងទៅបោះឆ្នោតនៅថ្ងៃទី៣ ខែមិថុនា ខាងមុខនេះ ប៉ុន្តែលោកមិនមានជំនឿទៅលើគណបក្សណាមួយនោះទេ ព្រោះនៅពេលគណបក្សទាំងអស់នោះឈ្នះឆ្នោត មិនអាចជួយដល់ប្រជាពលរដ្ឋឡើយ។ លោកថា ការសន្យា គឺនៅលើតែបបូរមាត់គេតែប៉ុណ្ណោះ ធ្វើមិនធ្វើ គឺជារឿងមួយផ្សេងទៀត៖ «ទេ! លឺតែថាៗ ស្មោះត្រង់ដែលឃើញជួយអី ថាៗនៅពេលជាប់នៅអត់មានជួយអីទេ វាជាក់ស្ដែងឥតវៀចវេរ ជួយៗ ប៉ុន្តែគ្មានបានអីទេ ដល់ប្រជាជនវាមិនគ្រប់គ្នា អ្នកខ្លះបានអ្នកខ្លះមិនបាន»។
អ្នកស្រី រដ្ឋ ស៊ីម រស់នៅឃុំស្រយ៉ូវ ខេត្តកំពង់ធំ មានប្រសាសន៍ថា អ្នកស្រីកំពុងរង់ចាំថ្ងៃបោះឆ្នោតមកដល់ នឹងទៅចូលរួមបោះឆ្នោតអោយគណបក្សដែលអ្នកស្រីពេញចិត្ត។ អ្នកស្រីសង្ឃឹមថា គណបក្សនយោបាយដែលជាប់ឆ្នោតក្រុមប្រឹក្សាឃុំ-សង្កាត់ នៅក្នុងអាណត្តិទី៣នេះ នឹងមានការចាប់អារម្មណ៍ជួយដល់មនុស្សចាស់ និងអ្នកដែលគ្មានទីពឹង៖ «តែគេជួយហូរហែមកចាំតែម្នាក់ ប៉ុន្តែអោយទៅបោះ អត់ទាន់ហ៊ានថា»។
លោក ម៉ែន សុថាវរិន្រ្ទ ប្រធានក្រុមប្រឹក្សាគណបក្ស សម រង្ស៊ី ខេត្តកំពង់ធំ មានប្រសាសន៍ថា បើគណបក្ស សម រង្ស៊ី ឈ្នះឆ្នោតនៅក្នុងអាណត្តិនេះ លោកថា គណបក្ស សម រង្ស៊ី នឹងធ្វើសំណើមួយទៅព្រះមហាក្សត្រ និងរាជរដ្ឋាភិបាលអោយជួយគិតគូរដល់មនុស្សចាស់នៅក្នុងប្រទេសកម្ពុជាមុនគេបង្អស់៖ «បើគណបក្ស សម រង្ស៊ី ជាប់មេឃុំច្រើន យើងធ្វើរបាយការណ៍ យើងស្រង់ទិន្នន័យទាំងអស់ ប្រជាពលរដ្ឋដែលមានចាស់ជរាច្រើន យើងធ្វើរបាយការណ៍ដើម្បីជួយ ដល់ថ្នាក់ជាតិ ពិសេសកាកបាទក្រហម ស្ដេចផែនដី និងនាយករដ្ឋមន្ត្រីអោយជួយប្រជាពលរដ្ឋបានខិតខំបង់ប្រាក់ទៅរដ្ឋជារៀងរាល់ខែនោះ សូមអោយរដ្ឋាភិបាលគិតគូរគាត់ផង»។
លោក តោក លឹម ចៅសង្កាត់សឹ្ទងសែន ខេត្តកំពង់ធំ មកពីគណបក្សប្រជាជនកម្ពុជា មានប្រសាសន៍ថា គណបក្សប្រជាជនកម្ពុជា មានគោលនយោបាយរបស់បក្ស និងមានកញ្ចប់ថវិការបស់ខ្លួន សំរាប់ជួយមនុស្សចាស់ដែលគ្មានអ្នកពឹងពាក់នោះ៖ «កន្លងមក យើងបានធ្វើហើយ មិនមែនមិនបានធ្វើទេ ប៉ុន្តែជាទូទៅទេ ដោយផ្អែកលើកញ្ចប់ថវិកាយើង ហើយនឹងការរកជំនួយអំពាវនាវសប្បុរសជននៅក្នុងសង្កាត់ និងគាត់មានបញ្ហាកើតឡើងដោះស្រាយយ៉ាងជាក់ស្តែងកន្លងមកធ្វើអ្វីក្នុងតែក្រុមប្រឹក្សាសង្កាត់ហ្នឹង»។
ប្រធានសមាគមមនុស្សចាស់ លោក ឡាយ ហ៊ែល មានប្រសាសន៍ថា នៅក្នុងឃុំស្រយ៉ូវ ភាគច្រើនពួកគាត់សុទ្ធតែមនុស្សចាស់ ដែលជាវ័យពួកគាត់ត្រូវការមនុស្សជួយយកអាសា និងទំនុកបំរុងជីវភាពរស់នៅរបស់ពួកគាត់ ប៉ុន្តែបែរជាមានការរើសអើងពីរដ្ឋាភិបាល និងសង្គមទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។