មន្ត្រីខណ្ឌរដ្ឋបាលព្រៃឈើខេត្តសៀមរាប បានឲ្យដឹងថា គេបានចេញសេចក្ដីជូនដំណឹងទៅក្រុមប្រជាពលរដ្ឋជាច្រើនគ្រួសារ នៅភូមិត្បែងខាងលិច ឃុំត្បែង ស្រុកបន្ទាយស្រី ដែលចេះតែនាំគ្នាចូលមកច្រើនឡើងៗ ធ្វើសកម្មភាពកាប់រានដុត និងហ៊ុមព័ទ្ធយកដីព្រៃរបស់រដ្ឋ នៅតំបន់ការពារជិតជើងភ្នំគូលែនទៅធ្វើជាកម្មសិទ្ធិឯកជន និងតាំងទីលំនៅថ្មីនោះ ឲ្យរុះរើចាកចេញទៅវិញក្នុងរយៈពេលដ៏ខ្លីខាងមុខនេះ។
លោក ទា គឹមសុទ្ធ នាយខណ្ឌរដ្ឋបាលព្រៃឈើ ខេត្តសៀមរាប បានមានប្រសាសន៍កាលពីរសៀលថ្ងៃអាទិត្យទី២៥ ខែកក្កដាថា ក្រសួងកសិកម្មរុក្ខាប្រមាញ់ និងនេសាទរួមនឹងអាជ្ញាធរខេត្តសៀមរាប បានចេញប្រកាស និងដីកាដកហូតដីតំបន់ទ្រនាប់ភ្នំគូលែន នៅភូមិត្បែងខាងលិច ឃុំត្បែង ស្រុកបន្ទាយស្រីចំនួន១២៤៧ហិកតារ ដើម្បីបង្កើតជាស្ថានីយផ្សព្វផ្សាយ និងស្ដារព្រៃឈើឡើងវិញ ដោយមិនអនុញ្ញាតឲ្យប្រជាពលរដ្ឋចូលទៅកាន់កាប់ដីតំបន់នោះជាដីសម្បទានសង្គមកិច្ចបានទេ។
លោក ទា គឹមសុទ្ធ មានប្រសាសន៍ដូច្នេះ ៖ «ឥឡូវហ្នឹងក្រសួងកសិកម្មនោះមិនអនុញ្ញាតឲ្យធ្វើជាដីសម្បទានសង្គមកិច្ចទេ កាលណាយើងអភិវឌ្ឍព្រៃឈើ យើងធ្វើអីអត់កើត។ ឥឡូវហ្នឹងមានលិខិតរបស់ក្រសួងហើយ ខ្ញុំអនុវត្តតាមលិខិតរបស់ក្រសួង តាមវិធានការពីអភិបាលខេត្តដែរ។ ជាលាយល័ក្ដអក្សរត្រូវប្រកាសជូនដំណឹងអ៊ីចឹងឯង ឲ្យគាត់ជ្រាបជាព័ត៌មានមុន អ្នកដែលនៅគាត់មិនព្រមរុះរើចេញហ្នឹង ចាត់វិធានការតាមផ្លូវច្បាប់»។
កាលពីថ្ងៃទី២១ ខែកក្កដា ខណ្ឌរដ្ឋបាលព្រៃឈើខេត្តសៀមរាប បានចេញសេចក្ដីជូនដំណឹងមួយ ដល់ក្រុមប្រជាពលរដ្ឋ ដែលគេយល់ថា បាននាំគ្នាកាប់រានដីព្រៃរបស់រដ្ឋ ចូលទៅសង់ទីលំនៅទាំងនោះ ឲ្យរុះរើចាកចេញក្នុងរយៈពេល ១៥ថ្ងៃ គិតចាប់ពីថ្ងៃចេញសេចក្ដីជូនដំណឹងនោះ។
ទោះយ៉ាងណា ក្រុមប្រជាពលរដ្ឋជាច្រើនគ្រួសារ រស់នៅទីនោះកំពុងមានការព្រួយបារម្ភថា ពួកគេនឹងមិនមានដីកន្លែងផ្សេងទៀតរស់នៅទេ។
លោក ធួន នឿម តំណាងឲ្យក្រុមអ្នកភូមិត្បែងខាងលិច បានមានប្រសាសន៍ថា តាមការជំរឿនគឺមានអ្នកភូមិកំពុងរស់នៅទីនោះចំនួន១០៥គ្រួសារ ហើយផ្ទៃដីដែលគេរស់នៅ គឺទំហំតែកន្លះហិកតារប៉ុណ្ណោះ ក្នុង១គ្រួសារៗ។
លោក ធួន នឿម បានសំដែងការព្រួយបារម្ភថា អ្នកភូមិរបស់គាត់មិនដឹងទៅរស់នៅទីណាទេ ប្រសិនបើដល់ថ្ងៃកំណត់ដែលគេឲ្យរុះរើផ្ទះចាកចេញនោះ។
លោក ធួន នឿម មានប្រសាសន៍ ៖ «ព្រួយបារម្ភត្រង់ថា ១៥ថ្ងៃគេដេញខ្ញុំមិនដឹងថាគិតយ៉ាងម៉េច មិនដឹងទៅនៅឯណាទៀតអស់ហើយ។ សំណូមពរឲ្យតែបាននៅដីកន្លែងនេះ ដែលរស់នៅទៅហើយមិនដឹងរើទៅណាមានប្រាក់ឯណាទៀតធ្វើផ្ទះ សុទ្ធតែក្រពិតប្រាកដមែនឡើងមើលតាមផ្ទះមិនដែលមានអង្គរ១បេទេ មានតែ២កំប៉ុង៣កំប៉ុងទេ គឺធ្វើការ១ថ្ងៃហូប១ថ្ងៃ ខ្លះជីកដំឡូងហូបទៀត»។
លោក សួស ណារិន អ្នកស៊ើបអង្កេតរបស់សមាគមការពារសិទ្ធិមនុស្ស ADHOC ប្រចាំខេត្តសៀមរាប ដែលបានចុះអង្កេតបញ្ហានោះ បានមានប្រសាសន៍ថា នៅក្នុងចំណោមប្រជាពលរដ្ឋដែលគេអះអាងជាង១០០គ្រួសារ បានចូលទៅកាន់កាប់ដីភូមិត្បែងខាងលិចនោះ គឺមានប្រហែលជាង៦០គ្រួសារប៉ុណ្ណោះ ជាអ្នកដែលតាំងទីលំនៅអចិន្ត្រៃយ៍ពិតប្រាកដ។
លោក សួស ណារិន បានមានប្រសាសន៍ថា ប្រជាពលរដ្ឋដែលតាំងទីលំនៅអចិន្ត្រៃយ៍ពិតប្រាកដ ត្រូវគេដឹងថា បានទៅរស់នៅកាលពីឆ្នាំ២០០៧ ហើយពួកគេមានស្ថានភាពក្រីក្រ។ លោកសំណូមពរឲ្យអាជ្ញាធរ គួរផ្ដល់ដីសម្បទានសង្គមកិច្ចដល់ប្រជាពលរដ្ឋដែលតាំងទីលំនៅពិតប្រាកដ នៅពេលបណ្ដេញពួកគេឲ្យចាកចេញពីដីព្រៃរបស់រដ្ឋ។
ដីកាលេខ១០២សសរ របស់សាលាខេត្តសៀមរាប ចុះថ្ងៃទី២៩ ខែឧសភា ឆ្នាំ២០០៦ បានសម្រេចដកហូតផ្ទៃដីទំហំ១២៤៧ហិកតារ នៅភូមិត្បែងខាងលិច ឃុំត្បែង ស្រុកបន្ទាយស្រី ដើម្បីស្ដារ និងអភិវឌ្ឍព្រៃឈើឡើងវិញ នៅតំបន់ទ្រនាប់ភ្នំគូលែន៕