គម្រោងផ្ទេរការគ្រប់គ្រងដីកសិកម្មនេះ គឺដើម្បីឲ្យអ្នកស្រុកមានចំណេះដឹងពីរបៀបគ្រប់គ្រង និងដាំដុះដំណាំដោយភាពជាម្ចាស់ការខ្លួនឯង ដែលអាចរកប្រាក់ចំណូលមកផ្គត់ផ្គង់ជីវភាពគ្រួសារបាន។
អតីតប្រជាពលរដ្ឋអ្នករស់នៅលើគំនរសំរាមស្ទឹងមានជ័យជាច្រើនគ្រួសារ ដែលបានស្ម័គ្រចិត្តទៅតាំងទីលំនៅថ្មីនៅជិតតំបន់រមណីយដ្ឋានភ្នំអដ្ឋរស្ស ឃុំភ្នំបាត ស្រុកពញាឮ ខេត្តកណ្ដាល កាលពីឆ្នាំ២០០៩ នោះ មកដល់ឥឡូវនេះ មួយចំនួនបានទទួលការបណ្ដុះបណ្ដាលជំនាញផ្នែកដាំដុះដំណាំកសិកម្មផ្សេងៗ ហើយនិងពីរបៀបទាក់ទងស្វែងរកទីផ្សារលក់ផលិតផលរបស់គេ។
កម្មវិធីនេះបានរៀបចំឡើងដោយអង្គការថែរក្សាសង្គ្រោះកុមារអន្តរជាតិអូស្ត្រាលី ហៅកាត់ជាភាសាអង់គ្លេសថា អាយស៊ីស៊ីអេ (ICCA) សហការជាមួយនិងអង្គការលំនៅឋានកម្ពុជា (Habitat for Humanity of Cambodia)។
លោក លី សែនលឹម មន្ត្រីគ្រប់គ្រងកសិដ្ឋាននៃអង្គការ អាយស៊ីស៊ីអេ បានឲ្យដឹងថា ការផ្ដួចផ្ដើមឲ្យមានកម្មវិធីបណ្ដុះបណ្ដាលជំនាញដាំដុះ ពីព្រោះបានឃើញថា ប្រជាពលរដ្ឋដែលបានមកតាំងទីលំនៅថ្មីនៅតំបន់ភ្នំអដ្ឋរស្ស ដែលមានចំនួនបីសហគមន៍ គឺសហគមន៍ជីវិតថ្មី សហគមន៍ជីវិតថ្មីនៃក្តីសង្ឃឹម ហើយនិងសហគមន៍តង់ខៀវ ភាគច្រើនពួកគេមិនសូវមានមុខរបរធ្វើសម្រាប់ចិញ្ចឹមជីវិតទេ។
លោក អ៊ីវ បុណ្ណាការ មន្ត្រីសម្របសម្រួលនៃអង្គការលំនៅឋានប្រចាំកម្ពុជា បានប្រាប់ឲ្យដឹងដែរថា ដោយឃើញបញ្ហានោះ អង្គការទាំងពីរនេះបានសហការគ្នាបង្កើតជាកសិដ្ឋានដែលមានផ្ទៃដីចំនួន ២ហិកតារ ដើម្បីជួយប្រជាពលរដ្ឋអ្នកតាំងទីលំនៅថ្មីដែលមិនមានការងារធ្វើ បានមកស៊ីឈ្នួលដាំដំណាំផង និងបានរៀនយកជំនាញផ្នែកដាំដុះនេះផង។
លោក អ៊ីវ បុណ្ណាការ៖ «កន្លងមកយើងធ្លាប់បានបណ្ដុះបណ្ដាលខ្លះដែរពីជំនាញធ្វើសាប៊ូ គឺមានគ្រួសារមួយចំនួនដែលគាត់មានការប្ដេជ្ញាចិត្ត គាត់បានធ្វើសាប៊ូហ្នឹងលក់ឲ្យអង្គការមួយនៅទីក្រុងភ្នំពេញ ឯណេះជារៀងរាល់ខែ គាត់ផ្គត់ផ្គង់ទៅ ក៏គាត់បានចំណូលពីការធ្វើសាប៊ូរបស់គាត់ដែរ»។
លោក លី សែនលឹម មន្ត្រីគ្រប់គ្រងកសិដ្ឋាននៃអង្គការ អាយស៊ីស៊ីអេ ប្រាប់ឲ្យដឹងដែរថា អ្នកដែលមកតាំងទីលំនៅថ្មីនៅទីនេះមានជាច្រើនរយគ្រួសារ ប៉ុន្តែអង្គការមានលទ្ធភាពជួយបណ្ដុះបណ្ដាលការងារកសិកម្ម ឬមកស៊ីឈ្នួលនៅក្នុងកសិដ្ឋានរបស់អង្គការបានតែជាង ២០គ្រួសារទេ។
លោកបានបន្តថា ពួកគេដែលបានមកធ្វើជាកម្មករដាំបន្លែផ្សេងៗនោះ គឺទទួលកម្រៃក្នុងមួយថ្ងៃចំនួន ១០.០០០រៀល (មួយម៉ឺន) ឬលើសពីនេះ។ តាមរយៈការងារនោះ រហូតមកដល់ពេលនេះបានធ្វើឲ្យអ្នកស្រុកដែលទទួលការបណ្ដុះបណ្ដាលនោះ បានកែប្រែជីវភាពជាបណ្ដើរៗ។
មន្ត្រីដដែលបានបញ្ជាក់ទៀតថា ដោយបានឃើញយ៉ាងដូច្នោះ អង្គការ អាយស៊ីស៊ីអេ និងអង្គការលំនៅឋានបានមានគម្រោងនឹងផ្ទេរកិច្ចការគ្រប់គ្រងកសិដ្ឋាននេះទាំងស្រុងទៅឲ្យប្រជាពលរដ្ឋក្នុងសហគមន៍ទាំងនោះ ដើម្បីឲ្យគេរៀនធ្វើការងារនោះដោយខ្លួនឯង ទាំងការប្រើគំនិតច្នៃប្រឌិតក្នុងការដាំដំណាំ ទាំងការទាក់ទងអតិថិជន ឬស្វែងរកទីផ្សារលក់ជាដើម។
លោក លី សែនលឹម៖ «ឲ្យគាត់ចេះចុះបញ្ជី គាត់ដឹងពីចំណូលចំណាយ។ ឧទាហរណ៍ថា ដូចនៅខែហ្នឹង ចំណូលពីបន្លែសរុបប៉ុន្មាន ចំណូលពីមៀនប៉ុន្មាន ហើយចំណាយទៅលើពលកម្មអស់ប៉ុន្មាន?អ៊ីចឹងចេះគិតគូររឿងហ្នឹង។ ដល់ថ្ងៃណាមួយដែលយើងគិតថា ពួកគាត់រឹងដៃរឹងជើង គាត់អាចធ្វើខ្លួនគាត់បានហើយ យើងផ្ទេរការគ្រប់គ្រងហ្នឹងទៅឲ្យគាត់តែម្ដង។ អាហ្នឹងបានន័យថា មិនទាន់ឈានដល់ការផ្ទេរដីផ្ទេរអីទៅឲ្យគាត់ទេ»។
ទាក់ទងទៅនឹងការបម្រុងផ្ទេរការគ្រប់គ្រងការងារកសិដ្ឋានរបស់អង្គការ អាយស៊ីស៊ីអេ និងអង្គការលំនៅឋាននេះ ប្រជាពលរដ្ឋនៅក្នុងសហគមន៍ទាំងបី បានសំដែងក្ដីរីករាយសប្បាយចិត្តផងដែរ ពីព្រោះគេយល់ថា បើបានដូច្នោះមែននោះ គឺពួកគេនឹងកាន់តែមានចំណេះដឹងបន្ថែមទៀត សម្រាប់ការរកប្រាក់ចំណូលមកផ្គត់ផ្គង់ជីវភាពប្រចាំថ្ងៃ។
ក្នុងចំណោមប្រជាពលរដ្ឋក្នុងសហគមន៍អ្នកតាំងទីលំនៅថ្មី ស្ត្រីមួយរូបឈ្មោះ មុនី បានបញ្ជាក់ថា សព្វថ្ងៃនេះគាត់កំពុងទទួលការបណ្ដុះបណ្ដាលពីអង្គការ អាយស៊ីស៊ីអេ អំពីរបៀបដាំដំណាំ ពីរបៀបរកទីផ្សារលក់ និងពីរបៀបគ្រប់គ្រងផ្សេងៗទៀតនៅក្នុងកសិដ្ឋាននេះ។
ស្ត្រីដដែលបានបន្តថា កាលពីមុនដែលគាត់រស់នៅឯភ្នំពេញ មិនមានផ្ទះនៅទេ ហើយក៏មិនដឹងរកការងារអ្វីធ្វើបានដែរ ដែលធ្វើឲ្យជីវភាពរស់នៅមានការលំបាកខ្លាំង។ ប៉ុន្តែនៅពេលដែលគ្រួសារគាត់បានប្ដូរមកនៅទីតាំងថ្មីក្នុងតំបន់ភ្នំអដ្ឋរស្សនេះ គឺគ្រួសារគាត់មានជីវិតរស់នៅបានប្រសើរជាងមុនឆ្ងាយ ដោយសារតែគាត់ចេះពីជំនាញដាំដុះ និងការជួយជ្រោមជ្រែងពីអង្គការទាំងពីរ។
ស្ត្រី មុនី៖ «គេបង្រៀនយើងឲ្យចេះគ្រប់គ្នានៅកន្លែងការដ្ឋានហ្នឹង។ ដូចការលក់បន្លែហ្នឹងត្រូវមានចេះបន្តអ៊ីចឹង។ បើមួយឈឺមានមួយទៀតជំនួស គឺធ្វើបានទាំងអស់។ ខ្ញុំសប្បាយចិត្តណាស់ ដូចថាយើងមានលុយទប់ទល់ជីវភាពគ្រួសារបាន»។
បញ្ជាក់ប្រាប់ស្រដៀងគ្នានេះដែរ បុរសមួយរូបឈ្មោះ អ៊ឹង សុផល អតីតអ្នកភូមិដីក្រហម បច្ចុប្បន្នកំពុងរស់នៅក្នុងសហគមន៍តង់ខៀវដែលនៅមិនឆ្ងាយប៉ុន្មានពីសហគមន៍ជីវិតថ្មី បានឲ្យដឹងថា កាលពីត្រូវបានក្រុមហ៊ុន សេវេន អែនជី (7NG) គេបណ្ដេញចេញពីភ្នំពេញ ហើយមករស់នៅក្នុងតង់ខៀវថ្មីៗនោះ គឺគ្រួសារគាត់មានជីវភាពយ៉ាប់យ៉ឺនខ្លាំង ពីព្រោះមិនអាចរកការងារណាមួយធ្វើបានទេ ហេតុដូច្នោះហើយ នៅពេលនោះគាត់ត្រូវចាកចេញពីគ្រួសារទៅនៅខេត្តឆ្ងាយ ដូចជាខេត្តបាត់ដំបង ជាដើម ដើម្បីទៅស៊ីឈ្នួលបេះពោតឲ្យគេ ឬធ្វើការងារផ្សេងៗទៀត។
បុរសរូបនោះបានបន្តថា ការទៅរកការងារធ្វើនៅឆ្ងាយពីផ្ទះ គឺបានកម្រៃមកផ្គត់ផ្គង់តែមួយពោះខ្លួនឯង ជួនកាលរកតែប្រាក់ជិះរថយន្តមកផ្ទះវិញស្ទើរពុំបាន។ ប៉ុន្តែឥឡូវនេះ គាត់មានការងារធ្វើនៅក្នុងកសិដ្ឋានរបស់អង្គការ ដោយដាំបន្លែ ហើយគេជួយបង្រៀនពីបច្ចេកទេសដាំដុះថែមទៀតនោះ គឺគាត់អាចបានកម្រៃទៅទប់ទល់ជីវភាពបានខ្លះៗ៖ «អាចជួយបាន ពីព្រោះយើងមានការងារធ្វើនៅក្នុងនេះរាល់ថ្ងៃ។ វាគ្រាន់បើជាងហើយយើងនៅជិតផ្ទះ»។
ទាក់ទងនឹងការបង្ហាត់បង្រៀនជំនាញដាំដំណាំបន្លែក្តី ឬបង្រៀនពីការគ្រប់គ្រងកសិដ្ឋានក្តី ដែលអង្គការ អាយស៊ីស៊ីអេ និងអង្គការលំនៅឋានបានជួយ ហើយថានឹងផ្ទេរទៅឲ្យអ្នកស្រុកក្នុងសហគមន៍រៀនគ្រប់គ្រងកសិដ្ឋានដោយខ្លួនឯងនោះ ប្រជាពលរដ្ឋក្នុងសហគមន៍ថ្មីទាំងបីក្នុងស្រុកពញាឮ ខេត្តកណ្ដាល នោះ បានបញ្ជាក់ប្រាប់ប្រហាក់ប្រហែលគ្នាថា ពួកគាត់មានក្តីសោមនស្សរីករាយ ហើយថានឹងអាចមានសមត្ថភាពធ្វើការងារនោះដោយខ្លួនឯងបាន។
ប្រជាពលរដ្ឋដដែលបានបន្តថា ការជួយផ្ដល់ចំណេះ ជំនាញ ឬផ្ដល់មុខរបរឲ្យគេមានការងារធ្វើ ដូចជាអង្គការ អាយស៊ីស៊ីអេ និងអង្គការលំនៅឋាន បានជួយជាដើមនេះ គឺជាក្ដីប្រាថ្នារបស់អ្នកសហគមន៍ថ្មី ពីព្រោះកាលណាបើគេមានជំនាញច្បាស់លាស់ណាមួយហើយ ហើយមានមុខរបរធ្វើពិតប្រាកដនោះ ពួកគេរំពឹងថា យ៉ាងហោចណាស់ទៅថ្ងៃមុខគេអាចរកប្រាក់ចំណូលជួយលើកកម្ពស់ជីវភាពគ្រួសារបានមួយកម្រិត។
ប្រជាពលរដ្ឋដែលបានទៅបោះទីតាំងថ្មីនៅតំបន់ភ្នំអដ្ឋរស្ស ស្រុកពញាឮ ខេត្តកណ្ដាល នោះ បានប្រាប់ឲ្យដឹងដែរថា ពួកគេទាំងអស់គ្នានេះគឺជាអតីតអ្នករស់នៅលើគំនរសំរាមស្ទឹងមានជ័យ ហើយនិងជាអតីតអ្នកភូមិដីក្រហមដែលត្រូវបានក្រុមហ៊ុន សេវេន អែនជី គេបណ្ដេញចេញពីភ្នំពេញ កាលពីឆ្នាំ២០០៩ បានធ្វើឲ្យពួកគេបាត់បង់ទីជម្រក និងមិនមានការងារធ្វើ។
មន្ត្រីអង្គការលំនៅឋាន និងអង្គការ អាយស៊ីស៊ីអេ បានបញ្ជាក់ប្រាប់ដែរថា អង្គការទាំងពីរនេះបានសហការគ្នាជួយប្រជាពលរដ្ឋក្នុងសហគមន៍ថ្មីនៅតំបន់ភ្នំអដ្ឋរស្ស ស្រុកពញាឮ ខេត្តកណ្ដាល នោះ ដោយបានជួយសង់ផ្ទះបង់រំលោះក្នុងតម្លៃថោក ហើយនិងជួយឲ្យមានអណ្ដូងទឹកអនាម័យប្រើប្រាស់ និងជួយបង្កើតនូវមុខរបរកសិកម្មដូចដែលគេកំពុងតែធ្វើសព្វថ្ងៃនេះជាដើម។ រីឯគោលបំណងក្នុងការជួយទាំងប៉ុន្មាននោះជាសំខាន់ គឺជួយកាត់បន្ថយភាពក្រីក្រនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។