ក្រុមជំនាញនៅមិនទាន់បញ្ជាក់ពីមូលហេតុនៃការធ្លាក់យន្តហោះរបស់មេប៉ូលិសនៅឡើយ
ដោយ កែវ និមល
2008-11-11
មន្រ្តីជំនាញរបស់រដ្ឋលេខាធិការដ្ឋានអាកាសចរណ៍ស៊ីវិលបានមានប្រសាសន៍ឲ្យដឹងនៅថ្ងៃទី១១ វិច្ឆិកាថា ក្រុមអ្នកជំនាញត្រូវការទិន្នន័យជាច្រើនទៀតដើម្បីឈានទៅរកការសន្និដ្ឋានបានជាក់លាក់អំពីមូលហេតុនៃការធ្លាក់យន្តហោះប្រភេទឧទ្ធម្ភាគចក្រដែលបណ្តាលឲ្យស្លាប់ឧត្តមសេនីយន៍ប៉ូលិសផ្កាយ៤និងឧត្តមសេនីយ៍យោធាផ្កាយ៣ កាលពីថ្ងៃទី៩ វិច្ឆិកា កន្លងទៅ។
លោក សយ សុខាន់ អនុរដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិល បានមានប្រសាសន៍ឲ្យដឹងថា ក្រសួងលោកមានគម្រោងសរសេរលិខិតទៅក្រុមហ៊ុនផលិតយន្តហោះនៅប្រទេសបារាំងនិងក្រុមហ៊ុនដែលគូសប្លង់យន្តហោះដើម្បីបានទទួលព័ត៌មានបន្ថែមទៀតមុនពេលចេញផ្សាយរបាយការណ៍ផ្លូវការអំពីមូលហេតុនៃការធ្លាក់យន្តហោះកាលពីថ្ងៃទី៩ វិច្ឆិកា កន្លងទៅ។
លោក សយ សុខាន់ មានប្រសាសន៍ដូច្នេះថា ៖ «យើងសន្និដ្ឋានដំបូង តាមជំនាញហ្នឹង គាត់ក៏មិនហ៊ានសន្និដ្ឋានថា វាបណ្ដាលមកពីហេតុអ្វីដែរ គាត់គ្រាន់តែបញ្ជាក់នៅក្នុងនេះហ្នឹងថា នៅពេលដែលហោះហើរ គឺអាកាសធាតុអាក្រក់ណាស់ ភ្លៀងធ្លាក់ខ្លាំង មានរន្ទះមានអីអ៊ីចឹងទៅ ប៉ុន្តែយើងខាងជំនាញ មិនទាន់មានការសន្និដ្ឋានជាក់លាក់ណាមួយទេ អ៊ីចឹងយើងរង់ចាំព័ត៌មានមួយចំនួន ដែលយើងប្រមូលថែមទៀត។ ដូចខ្ញុំបានជម្រាបអ៊ីចឹងថា ឥឡូវនេះ ព័ត៌មានដែលយើងប្រមូលពីកន្លែងកើតហេតុបានហើយ។ ព័ត៌មានដែលយើងប្រមូលពីប្រជាពលរដ្ឋដែលបានឃើញហេតុការណ៍ជាសាក្សីហ្នឹងបានហើយ ហើយនិងព័ត៌មានមួយចំនួនទាក់ទងនឹងកន្លែងទីបញ្ជាហោះហើរនៅភ្នំពេញនេះ ក៏យើងប្រមូលយកបានដែរ សម្ដីរវាងអាកាសយានិក ជាមួយនឹងអ្នកបញ្ជាហោះហើរ។ អ៊ីចឹងយើងនៅប្រមូលយកឯកសារមួយចំនួនដែលទាក់ទងនៅក្រុមហ៊ុន មួយចំនួនទាក់ទងនៅប្រទេសផលិតនិងប្រទេស design ទៀត»។
លោក សយ សុខាន់ បានមានប្រសាសន៍ឲ្យដឹងទៀតថា តាមរបាយការណ៍ដែលលោកទទួលបានគឺយន្តហោះបានចេញពីភ្នំពេញនៅម៉ោង៧និង១២នាទីយប់ ហើយបានធ្លាក់ក្រោយពីបានហោះចេញទៅបាន ៣៨នាទីក្រោយមក។
លោក សយ សុខាន់ ថ្លែងបន្ថែមដូច្នេះទៀតថា ៖ «ក្រោយពីធ្វើការហោះហើរបានប្រមាណ ៣៨នាទីមក ក៏ជួបប្រទះនូវឧបសគ្គធ្លាក់ឧទ្ធម្ភាគចក្រនេះតែម្ដង។ ហើយម្យ៉ាងនៅតាមផ្លូវហោះ ពីភ្នំពេញទៅបាវិតហ្នឹង គឺតែងមានភ្លៀងរហូត កន្លែងខ្លះភ្លៀងធំ កន្លែងខ្លះភ្លៀងតិចអ៊ីចឹងទៅ។ អ៊ីចឹងនៅពេលដែលធ្លាក់ហ្នឹង ខាងអាកាសចរណ៍ស៊ីវិលពុំបានទៅដល់កន្លែងកើតហេតុភ្លាមៗទេ»។
បើទោះបីជាមិនទាន់ចេញផ្សាយរបាយការណ៍ផ្លូវការអំពីមូលហេតុនៃការធ្លាក់យន្តហោះនោះក៏ដោយ តែលោក ម៉ៅ ហាវណ្ណាល់ នៃរដ្ឋលេខាធិការដ្ឋានអាកាសចរណ៍ស៊ីវិលបានមានប្រសាសន៍ប្រាប់កាសែតភ្នំពេញប៉ុស្តិ៍ថា ម៉ាស៊ីនយន្តហោះដើរមិនស្រួលបានបណ្តាលឲ្យមានភ្លើងឆេះ ជាមូលហេតុដែលបណ្តាលឲ្យយន្តហោះធ្លាក់។
ការធ្លាក់ឧទ្ធម្ភាគចក្រប្រភេទ Squirrel កាលពីថ្ងៃទី៩ វិច្ឆិកា កន្លងទៅ នៅភូមិព្រៃចៀវ ឃុំកំពង់ចក ស្រុករំដួល ខែត្រស្វាយរៀង បានបណ្តាលឲ្យមនុស្ស៤នាក់ដែលជិះលើនោះស្លាប់ ក្នុងនោះមានលោកឧត្តមសេនីយ៍អគ្គស្នងការប៉ូលិសជាតិផ្កាយ៤ ហុក ឡងឌី លោកឧត្តមសេនីយ៍យោធាផ្កាយ៣ សុខ សាអែម និងអ្នកបើកយន្តហោះ ២នាក់គឺលោកសក្តិ៥ ហ៊ន រដ្ឋា និងលោកសក្តិ៤ ទេព សេដ្ឋា។
សពលោកឧត្តមសេនីយ៍អគ្គស្នងការប៉ូលិសផ្កាយមាស៤ ហុក ឡងឌី បានយកមកតម្កល់នៅគេហដ្ឋានលោកក្នុងទីក្រុងភ្នំពេញដើម្បីធ្វើបុណ្យតាមប្រពៃណី។ ហើយតាមប្រភពមន្រ្តីរដ្ឋាភិបាល បានឲ្យដឹងថា សពលោកឧត្តមសេនីយ៍យោធាផ្កាយបី មេបញ្ជាការរងកងទ័ពជើងគោក សុក សាអែម បានត្រូវក្រុមគ្រួសារយកទៅតម្កល់ធ្វើបុណ្យនៅគេហដ្ឋាននៅក្បែរភ្នំប្រសិទ្ធិ ក្នុងស្រុកឧដុង្គ ខែត្រកំពង់ស្ពឺ និងសពអាកាសយានិកទាំងពីរតម្កល់ធ្វើបុណ្យនៅវត្តលង្ការ ក្រុងភ្នំពេញ។
លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន បានមានប្រសាសន៍នៅថ្ងៃទី១១ វិច្ឆិកា ឲ្យដឹងថា លោកឧត្តមសេនីយ៍ផ្កាយមាស៤ ហុក ឡងឌី ជាមួយលោកឧត្តមសេនីយ៍ផ្កាយ៣ សុក សាអែម ជាមិត្រភក្តិជិតដិតជាមួយគ្នា ហើយមានស្រុកកំណើតនៅស្វាយរៀងជាមួយគ្នានិងជាអ្នកទទួលខុសត្រូវការងារជាមួយគ្នានៅខែត្រស្វាយរៀង។
លោក ខៀវ កាញារីទ្ធ មានប្រសាសន៍ដូច្នេះថា ៖ «និយាយរួម ការសន្និដ្ឋានដំបូងគឺអាកាសធាតុ ដោយសារហោះយប់ ធម្មតាបើពេលថ្ងៃអាចរកកន្លែងចុះ ដល់ពេលយប់វារកកន្លែងចុះមិនទាន់។ (លោក សាឯម និង លោក ហុកឡងឌី) គឺមិត្តភក្ដិទាំងអស់ នៅស្រុកជាមួយគ្នា ហើយក៏ចូលប្រយុទ្ធជាមួយគ្នា ...ពីដើមនៅទាហានជាមួយគ្នា ក្រោយមកបងឌី មកធ្វើលេខាខេត្ត បន្ទាប់មកទៀតបានមកកាន់ក្រុងកាន់អី រួចបានកាន់នគរបាលតែប៉ុណ្ណឹង។ ...លោក សាឯម គាត់នៅស្រុកស្វាយរៀងដែរ»។
លោក សុខ ផល អគ្គស្នងការរងប៉ូលិសជាតិ បានមានប្រសាសន៍កាលពីថ្ងៃទី១០ វិច្ឆិកា ឲ្យដឹងថា គ្រោះថ្នាក់កើតឡើងចំពោះលោក ហុក ឡងឌី ជាឧបទ្ទវហេតុចៃដន្យក្នុងបេសកកម្មទៅកាន់ខែត្រស្វាយរៀង ៖ «យើងនិយាយខ្លី ជាឧប្បត្តិហេតុមួយក្នុងពេលបេសកកម្មរបស់គាត់»។
ប្រជាពលរដ្ឋរស់នៅក្បែរកន្លែងកើតហេតុ បាននិយាយប្រាប់មន្រ្តីអង្គការសិទ្ធិមនុស្ស អាដហុក ប្រចាំខែត្រស្វាយរៀងថា ប្រជាពលរដ្ឋបានឃើញយន្តហោះបានបន្ទាបជាលំដាប់មុនពេលធ្លាក់បុកដីហើយផ្ទុះឆេះ។
លោកស្រី កើត ផល្លី មន្រ្តីអាដហុកខែត្រស្វាយរៀង បានមានប្រសាសន៍អំពីការរៀបរាប់របស់ប្រជាពលរដ្ឋថា ៖ «ពេលយន្តហោះ ហោះពីលិចមកហ្នឹងវាទាប វាទាបតាំងពីដូនសទៅ ទាបទៅៗ ក៏វាទៅធ្លាក់។ ធ្លាក់នៅក្នុងភូមិតែម្ដង ស្រែហ្នឹងវាជាប់ភូមិ ភូមិហ្នឹងគេមានរបងលួសព័ទ្ធជុំវិញ ស្រែខាងក្រោយភូមិ ដល់យន្តហោះហ្នឹងធ្លាក់ហើយ វាផ្ទុះក្នុងទឹក ដល់ផ្ទុះក្នុងទឹករុលឡើងមកលើភូមិតែម្ដង នៅចំកណ្ដាលភូមិតែម្ដង ខ្ទាចចូលមកលើភូមិតែម្ដង ហើយវាដាច់ម្ដុំៗជាបំណែក នៅសល់តែកន្ទុយទទេតែម្ដង។ សាកសពអត់មាននៅមូលមួយកន្លែងទេ អ្នកខ្លះខ្ទាតទៅខាងចែងភូមិទៅ អ្នកខ្លះនៅកណ្ដាលភូមិ ខ្លះនៅត្រង់នេះ ត្រង់នោះទៅ»។
លោក ហុក ឡងឌី ធ្លាប់បានកាន់តំណែងជាន់ខ្ពស់ជាច្រើន ដូចជា អភិបាលក្រុងភ្នំពេញ អភិបាលខេត្តស្វាយរៀង និងលោកបានមកគ្រប់គ្រងប៉ូលិសជាតិ ក្នុងឆ្នាំ១៩៩៤មក។
លោកជាសមាជិកគណៈអចិន្រ្តៃយ៍គណបក្សប្រជាជនកម្ពុជា និងជាដន្លងជាមួយលោកនាយករដ្ឋមន្ត្រី ហ៊ុន សែន។ ចំណែកលោក សុខ សាឯម តាមជីវប្រវត្តិដែលមានផ្សាយនៅក្នុងវ៉ឹបសាយថ៍របស់ក្រសូងការពារជាតិបានឲ្យដឹងថា លោកមានស្រុកកំណើតនៅខែត្រស្វាយរៀង និងចូលបម្រើកងទ័ពតាំងពីឆ្នាំ១៩៧៨ និងធ្លាប់បានសិក្សាវិជ្ជាយោធា រយៈពេល៣ឆ្នាំ នៅប្រទេសវៀតណាម៕
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.