លោកនាយករដ្ឋមន្ត្រី ហ៊ុន សែន ថ្លែងរិះគន់យ៉ាងដូច្នេះនៅឯសន្និសីទអន្តរជាតិលើកទី៩ ស្តីពីសុខភាពកម្ពុជា នាថ្ងៃទី៦ ខែតុលានេះ ៖ «ឥឡូវគណបក្សប្រជាជនរក្សារបស់អនុស្សាវរីយ៍អ៊ុនតាក់ បោះឆ្នោតដ៏ស្មោកគ្រោកជាងគេ "អា"អ៊ុនតាក់ហ្នឹងហើយ គ្មាននរណាទៀតទេ។ ផ្ដាំទៅប្រទេសនានាលើពិភពលោក បើមានការអីកុំឲ្យអង្គការសហប្រជាជាតិទៅចាត់ចែងបោះឆ្នោត "អា"នេះស្មោកគ្រោក វាចង់ឲ្យ"អា"ណាឈ្នះ ចង់ឲ្យ"អា"ណាចាញ់ស្រេចវា»។
សូមជម្រាបថា លទ្ធផលការបោះឆ្នោតនាឆ្នាំ១៩៩៣ គឺគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន ទទួលបានសំឡេងគាំទ្រក្នុងលំដាប់ទី២ ហើយពេលនោះ គណបក្សហ៊្វុនស៊ិនប៉ិចទទួលបានការគាំទ្រនាំមុខលំដាប់ទី១។
លោកនាយករដ្ឋមន្ត្រី ហ៊ុន សែន បានបន្តរិះគន់អំពីប្រសិទ្ធភាពនៃទឹកខ្មៅជ្រលក់ដៃរបស់ UNTAC យ៉ាងដូច្នេះទៀតថា ៖ «ទឹកខ្មៅកម្ពុជាជាងពីរខែអត់ទាន់បាត់ ទឹកខ្មៅអ៊ុនតាក់ ១៥នាទី បោះឆ្នោតបាន៧សន្លឹកម្នាក់»។
ក៏ប៉ុន្តែអគ្គលេខាធិការរងគណបក្សសមរង្ស៊ី លោកស្រី មួរ សុខហ៊ួរ បានវាយតម្លៃចំពោះការរៀបចំការបោះឆ្នោតដោយអ៊ុនតាក់យ៉ាងដូច្នេះថា ៖ «ការបោះឆ្នោតនៃអ៊ុនតាក់នេះ គឺជាការបោះឆ្នោតដ៏ត្រឹមត្រូវ ហើយប្រជាពលរដ្ឋសព្វថ្ងៃ បើទៅសួរប្រជាពលរដ្ឋភាគច្រើនគឺគេសុំឲ្យមានការបោះឆ្នោតតាមរបៀប អ៊ុនតាក់ ព្រោះយើងឃើញថា ពេលនោះគឺជាការបោះឆ្នោតមួយដោយសេរី យុត្តិធម៌ ហើយដែលមានតម្លាភាព»។
ចាប់តាំងពីឆ្នាំ១៩៩៨មក កម្ពុជាបានសម្រេចរៀបចំការបោះឆ្នោតដោយខ្លួនឯងបានចំនួន៣លើករួចមកហើយ ដោយស្ថាប័នគណៈកម្មាធិការជាតិរៀបចំការបោះឆ្នោត ឬហៅថា គ.ជ.ប. ជាអាជ្ញាកណ្តាល។
លោក ហង្ស ពុទ្ធា នាយកអង្គការឃ្លាំមើលការបោះឆ្នោតនិកហ្វិច បានថ្លែងថា កម្ពុជាត្រូវការធ្វើកំណែទម្រង់យន្តការបោះឆ្នោតបន្ថែមទៀត ៖ «ក្នុងនោះ គឺការរៀបចំឲ្យមន្រ្តីរៀបចំបោះឆ្នោត ប្រកាន់នូវជំហរអព្យាក្រឹត គឺជារឿងសំខាន់បំផុត ហើយបញ្ជីឈ្មោះនេះ គឺមានបញ្ហាខ្លាំងសម្រាប់ការបោះឆ្នោតកន្លងមកនេះ ដែលការបោះឆ្នោតមុនៗមិនធ្លាប់មាន អ៊ីចឹងត្រូវតែធ្វើបច្ចុប្បន្នភាពបញ្ជីឈ្មោះអ្នកបោះឆ្នោតនេះ ឲ្យបានសុក្រឹត បានន័យថា ចុះឈ្មោះឲ្យបានត្រឹមត្រូវ ហើយលុបឈ្មោះ ក៏លុបក្នុងភាពត្រឹមត្រូវដែរ»។
យោងតាមលទ្ធផលការបោះឆ្នោតអាណត្តិទី៤ថ្មីៗនេះ គឺគណបក្សប្រជាជនកម្ពុជា ទទួលបានសំឡេងគាំទ្រនាំមុខរហូតដល់ ៩០អាសនៈក្នុងចំណោម ១២៣អាសនៈ។ ប៉ុន្តែមន្ត្រីសង្កេតការណ៍បោះឆ្នោតជាតិ រួមមានទាំងសហគមន៍អឺរ៉ុបនិងសហរដ្ឋអាមេរិកផង បានវាយតម្លៃស្របគ្នាថា ការបោះឆ្នោតអាណត្តិទី៤នេះ គឺមិនទាន់ស្របតាមបទដ្ឋានអន្តរជាតិនៅឡើយទេ៕