ផ្លូវជាតិលេខ ៧៨នេះបានប្រើពេល ៣០ខែនិងចំណាយប្រាក់អស់ជាង ២៦លានដុល្លារអាមេរិក ដែលសាងសង់ដោយក្រុមហ៊ុនរបស់ប្រទេសវៀតណាម។
លោកនាយករដ្ឋមន្ត្រី ហ៊ុន សែន បានមានប្រសាសន៍ថា ផ្លូវលេខ ៧៨នេះ នឹងបម្រើផលប្រយោជន៍ដល់ប្រជាពលរដ្ឋ ងាយស្រួលក្នុងការធ្វើដំណើរផង និងសេដ្ឋកិច្ចរបស់ប្រទេសផង។
លោកនាយករដ្ឋមន្ត្រីមានប្រសាសន៍ដូច្នេះ ៖ «ថ្ងៃនេះផ្លូវនេះបានសម្រេចរួចរាល់ជាស្ថាពរ ហើយអាចនិយាយបានថា ជាផ្លូវដែលមានសារសំខាន់មួយក្នុងចំណោមនៃផ្លូវដែលមានសារសំខាន់ដទៃទៀតសម្រាប់ការអភិវឌ្ឍរបស់យើង។ ផ្លូវនេះដូចអ្វីដែលឯកឧត្ដមរដ្ឋមន្ត្រីក្រសួងសាធារណការ ត្រាំ អ៊ីវតឹក បានធ្វើរបាយការណ៍ ហើយឯកឧត្ដម ជីវ ម៉េងចុង ឧបនាយករដ្ឋមន្ត្រីនៃសាធារណរដ្ឋសង្គមនិយមវៀតណាម ក៏បានថ្លែងយោបល់អម្បាញ់មិញ វាមានសារសំខាន់ក្នុងការតភ្ជាប់ក្នុងទំនាក់ទំនងរវាងកម្ពុជានិងវៀតណាម។ ប៉ុន្តែអ្វីដែលខ្ញុំព្រះករុណាខ្ញុំធ្វើការកត់សម្គាល់នៅទីនេះ សំខាន់បំផុត គឺ បញ្ហាសមាហរណកម្មផ្ទៃក្នុងខ្លួនឯងរបស់កម្ពុជា។ ខ្ញុំព្រះករុណាខ្ញុំពិតជាមានការចាប់អារម្មណ៍ធំធេងជាមួយនឹងសមិទ្ធផលនេះ ហើយក៏សូមយកឱកាសនេះដើម្បីថ្លែងអំណរគុណចំពោះរដ្ឋាភិបាលនៃសាធារណរដ្ឋសង្គមនិយមវៀតណាម ដូចដែលឯកឧត្ដម ជីវ ម៉េងចុង លើកឡើងហើយថា ជាប្រទេសមួយមិនទាន់មានការអភិវឌ្ឍទេ ជាប្រទេសមួយនៅទទួលជំនួយផ្លូវការ និងការធ្វើហិរញ្ញប្បទានពីប្រទេសក្រៅយ៉ាងច្រើន។ ក៏ប៉ុន្តែដោយគិតគូរទៅលើសារសំខាន់នៃផ្លូវនេះ និងទិដ្ឋភាពនៃការតភ្ជាប់រវាងកម្ពុជានិងវៀតណាម វៀតណាមបានសម្រេចផ្ដល់នូវឥណទានជិត ២៦លានដុល្លារសហរដ្ឋអាមេរិកដើម្បីស្ថាបនាផ្លូវនេះឡើង»៕