អ្នកនាំពាក្យគណៈរដ្ឋមន្ត្រីកម្ពុជា លោក ផៃ ស៊ីផាន នៅថ្ងៃពុធ ទី១៣ ខែតុលា មានប្រសាសន៍ឲ្យដឹងថា កម្ពុជានឹងមានការិយាល័យនាយករដ្ឋមន្ត្រីដំបូងបង្អស់ ដែលមានឈ្មោះថា "វិមានសន្តិភាព" ជាវិមានសម្រាប់នាយករដ្ឋមន្ត្រី និងក្រុមការងាររបស់លោក។
លោក ផៃ ស៊ីផាន បានបន្ថែមថា វិមានសន្តិភាពត្រូវបានសាងសង់ភ្ជាប់ទៅអគារមួយទៀត ដែលមានឈ្មោះថា "វិមានមិត្តភាព" ជាវិមានសម្រាប់ទទួលភ្ញៀវ សម្រាប់សន្និសីទអន្តរជាតិ។ អគារទាំងពីរនឹងដាក់សម្ពោធឲ្យប្រើប្រាស់នៅសប្ដាហ៍ក្រោយ បន្ទាប់ពីបានសាងសង់តាំងពីខែកញ្ញា ឆ្នាំ២០០៩ ដោយបានប្រើប្រាស់ថវិកាជំនួយរបស់ចិនចំនួន ៣២,៩លានដុល្លារ ហើយអគារនេះត្រូវបានរចនា និងសាងសង់ដោយវិស្វករ និងកម្មករកម្ពុជាសុទ្ធសាធ។
លោក ផៃ ស៊ីផាន បន្តទៀតថា កម្ពុជាធ្លាប់បានចំណាយថវិកាច្រើនសម្រាប់ការជួលអគារឯកជន ដើម្បីរៀបចំសន្និសីទអន្តរជាតិ ដូច្នេះអគារថ្មីនេះអាចកាត់បន្ថយការចំណាយរបស់រដ្ឋាភិបាល។
កាសែតភាសាអង់គ្លេស ឌឹ ឃែមបូឌា ដេលី (The Cambodia Daily) ផ្សាយនៅថ្ងៃពុធ ទី១៣ ខែតុលា ឲ្យដឹងថា ការសាងសង់អគារការិយាល័យនាយករដ្ឋមន្រ្ដី ក្រោយពេលដែលកម្ពុជា បានសម្ពោធអគារគណៈរដ្ឋមន្ត្រី កាលពីខែមីនា ឆ្នាំ២០០៩ ដែលកាលនោះមានព័ត៌មានថា មន្ត្រីជាន់ខ្ពស់រដ្ឋាភិបាលបានសម្ដែងការមិនពេញចិត្តអគារគណៈរដ្ឋមន្ត្រីថ្មីនេះទេ ដោយសារការរៀបចំ និងរចនា។
លោក ផៃ ស៊ីផាន បានឲ្យដឹងថា ការសាងសង់អគារនាយករដ្ឋមន្ត្រីនេះ ដោយសារតែអគារគណៈរដ្ឋមន្ត្រីថ្មី គឺសម្រាប់តែការងារគណៈរដ្ឋមន្ត្រី។
អ្នកនាំពាក្យគណបក្ស សម រង្ស៊ី លោក យឹម សុវណ្ណ មានប្រសាសន៍នៅថ្ងៃពុធ ដែរថា រដ្ឋាភិបាលកម្ពុជា មិនគួរចំណាយថវិកាទៅសាងសង់អគារដែលមិនចាំបាច់នោះទេ។ លោកថា អគារគណៈរដ្ឋមន្ត្រីថ្មី មានទីកន្លែងគ្រប់គ្រាន់សម្រាប់នាយករដ្ឋមន្ត្រីធ្វើការងារ។
លោក យឹម សុវណ្ណ បានបន្ថែមថា រដ្ឋាភិបាលកម្ពុជា គួរតែប្រើប្រាស់ថវិការដ្ឋដើម្បីជួយប្រជាពលរដ្ឋដែលកំពុងប្រឈមមុខនឹងការខ្វះខាតក្នុងជីវភាព។
តារាងបង្ហាញពីភាពអត់ឃ្លានសកលសម្រាប់ឆ្នាំ២០១០ ចេញពីថ្ងៃទី១១ ខែតុលា បានរកឃើញថា កម្ពុជាទទួលបានចំណាត់ថ្នាក់លេខ ២០,៩ សម្រាប់ឆ្នាំ២០១០ ដែលមានន័យថា គឺជាប្រទេសស្ថិតក្នុងភាពប្រកាសអាសន្នពីការអត់ឃ្លាន។
ទោះជាយ៉ាងណាក៏ដោយចំណាត់ថ្នាក់នេះបង្ហាញថា ស្ថានភាពអត់ឃ្លាននៅកម្ពុជា បានប្រសើរជាងឆ្នាំ១៩៩០ ដែលពេលនោះកម្ពុជា មានចំណាត់ថ្នាក់លេខ ៣១,៥ ជាប្រទេសប្រកាសអាសន្នបំផុតចំពោះការអត់ឃ្លាន៕