ការក្រើនរំឭកនេះបានធ្វើទ្បើងនៅក្នុងពិធីសន្និបាតប្រចាំឆ្នាំបូកសរុបលទ្ធផលការងារត្រួតពិនិត្យគ្រឿងញៀន ឆ្នាំ២០០៩ និងទិសដៅការងារឆ្នាំ២០១០ ដែលមានមន្រ្តីប្រឆាំងគ្រឿងញៀនស្នងការនគរបាលខេត្តក្រុង, ប៉េអឹម, អភិបាលខេត្តក្រុង, មន្រ្តីខណ្ឌ, តំណាងអង្គការសង្គមស៊ីវិល និងតំណាងអង្គការសហប្រជាជាតិគ្រប់គ្រងគ្រឿងញៀនក្នុងប្រទេសកម្ពុជា បានចូលរួមសរុបទាំងអស់ជាង ៣០០នាក់នៅឯក្រសួងមហាផ្ទៃ។
ប្រមុខរដ្ឋាភិបាលកម្ពុជា លោក ហ៊ុន សែន បានមានប្រសាសន៍ព្រមានថា មន្រ្តីជាន់ខ្ពស់នានានៅពីក្រោយខ្នងអំពើជួញដូរគ្រឿងញៀនត្រូវតែដកខ្លួនចេញពីអំពើនេះ។ មានតែកូនៗរបស់មន្រ្តីជាន់ខ្ពស់នៅក្នុងរដ្ឋាភិបាលមួយចំនួនកំពុងតែសេពគ្រឿងញៀន។
លោកបានបន្តថា ៖ «អាទៅទាំងតោន ទៅទាំងរយគីឡូ ទៅទាំងរាប់គីឡូ អាហ្នឹងរឿងមួយផ្សេង។ ក៏ប៉ុន្តែអាទៅ ២០គ្រាប់ ៣០គ្រាប់ អាតូចតាចនេះ អាហ្នឹងគឺជារឿងដែលត្រូវវ៉ៃ មិនអាចចៀសវាងបានទេ ព្រោះចំណុចនេះមិនត្រូវមើលស្រាលទេ ហើយចំណុចទាំងអស់នេះវាពាក់ព័ន្ធនៅនឹងមូលដ្ឋានផ្ទាល់របស់គេ។ យើងខិតខំទៅមើលដើម្បីឲ្យសហគមន៍របស់យើងគ្មានគ្រឿងញៀន»។
នៅមុនការប្រកាសក្រើនរំឭកនោះ លោក កែ កឹមយ៉ាន ជាឧបនាយករដ្ឋមន្រ្តី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀនប្រទេសកម្ពុជា បានមានប្រសាសន៍ថា ៖ «អង្គសន្និបាតបានសម្រេចចិត្តបង្កើនសកម្មភាពថែមទៀតនៅក្នុងការដោះស្រាយចំណុចប្រឈមនានា និងបន្តពង្រឹងសមិទ្ធផលដែលសម្រេចបានកន្លងមក ដើម្បីរួមចំណែកពង្រឹងសន្តិសុខ ស្ថិរភាពនយោបាយ ការរក្សាសណ្ដាប់ធ្នាប់ និងសុវត្ថិភាពសង្គម»។
នៅជុំវិញស្ថានការណ៍គ្រឿងញៀននៅក្នុងប្រទេសកម្ពុជា តំណាងរាស្រ្តគណបក្សសមរង្ស៊ី លោក យឹម សុវណ្ណ និងជាមន្រ្តីអ្នកនាំពាក្យផងដែរនោះ បានមានប្រសាសន៍អត្ថាធិប្បាយថា ៖ «យើងត្រូវដាក់កំហុសទៅលើអ្នកដែលនាំចូល អ្នកដែលស៊ុមគ្រលុំគ្នាចរាចរគ្រឿងញៀនចូលមកក្នុងប្រទេសកម្ពុជា។ ការប្រើប្រាស់ យើងប្រើវិធីសាស្ត្រអប់រំ ប៉ុន្តែការដែលនាំចូលហ្នឹងមិនមែនធម្មតាទេ! គេមានបណ្ដាញ គេមានបក្សពួក គេមានខ្សែរយៈរបស់គេហ្នឹង មានពេលខ្លះទៅស្ថិតនៅក្នុងអ្នកដែលមានអំណាចថែមទៀតផង។ ដូច្នេះយើងត្រូវពិនិត្យមើលអំពើពុករលួយ យើងត្រូវពិនិត្យមើលប្រព័ន្ធតុលាការ ពិនិត្យមើលប៉ូលិសដែលឆ្លៀតឱកាសនេះដើម្បីកេងប្រវ័ញ្ច ហើយទទួលបាននូវផលប្រយោជន៍ដ៏ច្រើនទៅលើគំនរញើសឈាមរបស់ប្រជាពលរដ្ឋខ្មែរ»។
កាលពីឆ្នាំ២០០៩កន្លងទៅ អាជ្ញាធរជាតិប្រយុទ្ធប្រឆាំងគ្រឿងញៀនប្រទេសកម្ពុជាបានបង្រ្កាបទីតាំងផលិតគ្រឿងញៀននិងពិសោធគ្រឿងញៀនបានចំនួន ៥កន្លែង នៅក្នុងទីក្រុងភ្នំពេញ ខេត្តព្រះសីហនុ ខេត្តកំពង់ចាម និងខេត្តតាកែវ។
ក្រុមមន្រ្តីប្រឆាំងគ្រឿងញៀននិងប្រមុខរដ្ឋាភិបាលកម្ពុជា លោក ហ៊ុន សែន នៅថៃ្ងពុធនេះ បានប្រកាសបញ្ជាក់ជាថ្មីទៀតថា រដ្ឋាភិបាលកម្ពុជានឹងបង្រ្កាបនូវរាល់ការចម្រាញ់ប្រេងម្រះព្រៅភ្នំ ដែលជាសារធាតុអាចផលិតជាគ្រឿងញៀនបាន។
សន្និបាតនៅថៃ្ងពុធនេះ បានជំរុញឲ្យអាជ្ញាធរមូលដ្ឋានធ្វើការប្រឹងប្រែង ក្នុងការទប់ស្កាត់ការប្រើប្រាស់គ្រឿងញៀន កាត់បន្ថយទីផ្សារ តម្រូវការគ្រឿងញៀន និងការកាត់បន្ថយការផ្គត់ផ្គង់គ្រឿងញៀន។
ប្រទេសកម្ពុជាមានមណ្ឌលស្តារនីតិសម្បទា និងមណ្ឌលបន្សាបអ្នកញៀនគ្រឿងញៀន គ្រប់គ្រងដោយរដ្ឋចំនួន ១១កន្លែងនៅទូទាំងប្រទេស ដែលមានអ្នកញៀនគ្រឿងញៀនចំនួនរវាង ១.២០០នាក់ ទៅ ១.៥០០នាក់។ គេបានប៉ាន់ស្មានថា អ្នកញៀនគ្រឿងញៀនក្នុងប្រទេសកម្ពុជានៅក្រៅមណ្ឌល មានចំនួនពី ៦.៥០០នាក់ ទៅ ៧.០០០នាក់ ឬគុណទ្វេដង ឬ ៣ដងឯណោះ៕