លោក ហ៊ុន សែន បានប្រសាសន៍ថា នេះជាបទបញ្ជាយ៉ាងហ្មឺងម៉ាត់ឲ្យកងទ័ពទាំងអស់ជួយការពារព្រៃឈើ មិនត្រឹមតែតំបន់ខេត្តព្រះវិហារទេ គឺនៅតាមតំបន់ព្រំដែនខ្មែរ-ថៃទាំងអស់។
លោកនាយករដ្ឋមន្រ្តី ហ៊ុន សែន បានថ្លែងដូច្នេះ ៖ «អំពាវនាវឲ្យកងទ័ពជួយបង្រ្កាបក្រុមរកស៊ីកាប់ឈើខុសច្បាប់ ដូច្នេះទាំងនាយទាហាន ពលទាហានទាំងអស់ ត្រូវចូលរួមបង្រ្កាបពួកទុច្ចរិត រាប់ទាំងមេបញ្ជាការខ្លួនឯងដែលធ្វើខុស ផលប្រយោជន៍បានទៅលើមេបញ្ជាការពុករលួយនោះទេ មិនមែនបានមកលើកូនទាហានទេ ហើយប្រើប្រាស់សម្ភារៈរបស់ព័ទដើម្បីកាប់។ អ៊ីចឹងទេត្រូវមើល មេខ្លោងនៅត្រង់ណាតំបន់ត្រពាំងប្រាសាទហ្នឹង? បើចាំបាច់ត្រូវប្រើបច្ចេកទេសជាន់ខ្ពស់ បច្ចេកវិទ្យាទំនើបដើម្បីចាប់ទំនាក់ទំនង បំផ្លាញចោលមេបណ្ដាញរបស់វាដែលមកតាំងពីកំពង់ចាម កំពត តាកែវ មកធ្វើមេខ្លោងរកស៊ីកាប់ឈើនៅនេះ»។
លោកនាយករដ្ឋមន្ត្រីបានមានប្រសាសន៍ថា ពេលបច្ចុប្បន្នដោយសារតែការកាប់ឈើធ្វើអាជីវកម្មខុសច្បាប់ពីក្រុមឈ្មួញបានធ្វើឲ្យប្រជាពលរដ្ឋខ្មែរមួយចំនួនបានលួចឆ្លងដែនចូលទៅកាប់ឈើក្នុងទឹកដីថៃ បណ្តាលឲ្យថៃចាប់ខ្លួនយកទៅកាត់ទោសនិងបាញ់ស្លាប់ទៀតផង៕