ការថ្លែងរបស់លោកនាយករដ្ឋមន្រ្តី ហ៊ុន សែន ដូច្នេះនៅក្នុងពិធីសម្ពោធផ្លូវជាតិលេខ១ ឲ្យប្រើប្រាស់និងពិធីសម្ពោធបើកការដ្ឋានសាងសង់ផ្លូវនេះបន្តនៅក្នុងស្រុកកៀនស្វាយ ខែត្រកណ្តាល នាព្រឹកថ្ងៃទី៥ មករា។
លោក ហ៊ុន សែន បានមានប្រសាសន៍ព្រមានថា ៖ «រួចដាក់មកត្រូវគេ ដល់គេប្រើតុលាការដោះស្រាយបញ្ហា ថាប្រើតុលាការគាបសង្កត់! តុលាការប្រទេសខ្លះមិនមែនគ្រាន់តែផ្ដន្ទាទោសបុគ្គលទេ តុលាការប្រទេសខ្លះរំលាយដល់បក្សនយោបាយឯណោះ គេប្រើរំលាយបក្សនយោបាយ ឬហាមឃាត់សិទ្ធិអ្នកនយោបាយមិនឲ្យចូលរួមការបោះឆ្នោតទៀតផង។ តុលាការនៅស្រុកខ្មែរប៉ុណ្ណឹងមានអីខ្លាំង!»។
លោក យឹម សុវណ្ណ ជាមន្រ្តីនាំពាក្យគណបក្សប្រឆាំង បានបំភ្លឺថា តុលាការនៅប្រទេសគេមួយចំនួនអាចរំលាយគណបក្សប្រឆាំងបាន ប៉ុន្តែគឺតុលាការនោះឯករាជ ហើយអាចចាប់យកមន្រ្តីពុករលួយមកផ្តន្ទាទោសបានដែលខុសអំពីតុលាការកម្ពុជា។
លោក យឹម សុវណ្ណ បានមានប្រសាសន៍ថា ៖ «តុលាការយើងដែលមតិជាតិ មតិអន្តរជាតិ មើលឃើញថាជាឧបករណ៍របស់គណបក្សកាន់អំណាច ដែលប្រើប្រាស់សម្រាប់តែបង្ក្រាបទៅលើគណបក្សប្រឆាំង។ យើងខ្ញុំជាគណបក្សប្រឆាំងដែលមានឯកឧត្ដម សម រង្ស៊ី ជាប្រធាន គឺធ្វើអ្វីៗដើម្បីបម្រើឲ្យផលប្រយោជន៍ជាតិ ជាពិសេសគឺការការពារនូវបូរណភាពទឹកដី ការពារយុត្តិធម៌ជូនប្រជាពលរដ្ឋ ការពារដីដែលប្រជាពលរដ្ឋបាត់បង់ដោយសារបោះបង្គោលព្រំដែន។ នេះជាទង្វើស្នេហាជាតិ ហើយជាទង្វើជួយរកយុត្តិធម៌ជូនប្រជាពលរដ្ឋដែលកំពុងរងគ្រោះ»។
ជុំវិញបញ្ហាដែលលោក សម រង្ស៊ី បានចូលរួមដកបង្គោលតម្រុយព្រំដែនកម្ពុជាវៀតណាម នៅខែត្រស្វាយរៀង កាលពីខែតុលា ឆ្នាំ២០០៩កន្លងទៅនេះ លោកនាយករដ្ឋមន្រ្តី ហ៊ុន សែន ក៏បានព្រមានដល់មន្រ្តីស្ថានទូតបរទេសទាំងអស់នៅទីក្រុងភ្នំពេញផងដែរមិនឲ្យលូកដៃក្នុងរឿងនេះ។
លោកនាយករដ្ឋមន្ត្រី ហ៊ុន សែន បានថ្លែងថា ៖ «សូមអស់លោក ឯកឧត្ដម ឯកអគ្គរដ្ឋទូត ស្ថានទូតនៅទីក្រុងភ្នំពេញ សូមឲ្យមានការថ្លឹងថ្លែងប្រុងប្រយ័ត្ននៅក្នុងរឿងនេះ ព្រោះរឿងនេះមិនមែនរឿងធម្មតា! តម្លៃគតិយុត្តិ នីត្យានុកូលភាពរបស់រដ្ឋវានៅត្រង់ណា? បានជាបុគ្គលម្នាក់ ២នាក់ ឬមួយក្រុមតូចដែលអាចទៅធ្វើរឿងនេះកើត»។
លោក សម រង្ស៊ី មិនបានចូលខ្លួនទៅបំភ្លឺតាមការកោះហៅរបស់តុលាការខែត្រស្វាយរៀងកាលពីថ្ងៃទី២៩ ធ្នូនោះទេ ហើយនៅថ្ងៃទី២៩ ដដែលនោះ តុលាការខែត្រស្វាយរៀងក៏បានចេញដីកាចាប់ខ្លួន ឬនាំខ្លួនលោក សម រង្ស៊ី ផងដែរ ក្រោមបទចោទប្រកាន់ពីបទបំផ្លាញទ្រព្យសម្បត្តិសាធារណៈ និងរើសអើងពូជសាសន៍។
រហូតមកទល់នឹងពេលនេះ ប្រជាពលរដ្ឋនៅខែត្រស្វាយរៀងចំនួន ២នាក់បានត្រូវតុលាការចាប់ខ្លួនក្រោមបទចោទប្រកាន់ដូចលោក សម រង្ស៊ី ដែរ កាលពីថ្ងៃទី២៣ ធ្នូ នៅក្រោយពេលតុលាការបានសាកសួរភ្លាមៗ ហើយតុលាការខែត្រស្វាយរៀងក៏បង្គាប់ឲ្យអ្នកភូមិចំនួន ៣នាក់ផ្សេងទៀតទៅបង្ហាញខ្លួននៅតុលាការផងដែរ៕