តំបន់អភិរក្សនោះមាននៅខេត្តចំនួន៦ ដូចជាខេត្តសៀមរាប ខេត្តកំពង់ធំ ខេត្តកំពង់ឆ្នាំង ខេត្តពោធិ៍សាត់ ខេត្តបន្ទាយមានជ័យ ខេត្តបាត់ដំបង នៅជុំវិញបឹងទន្លេសាប។
លោកនាយករដ្ឋមន្ត្រីបានដាក់បទបញ្ជាទៅក្រសួងកសិកម្ម រុក្ខាប្រមាញ់ និងនេសាទ និងអាជ្ញាធរបឹងទន្លេសាបត្រូវយកចិត្តទុកដាក់លើការកំណត់តំបន់អភិរក្សត្រីដែលជិតផុតពូជនៅបឹងទន្លេសាប ឲ្យបានម៉ត់ចត់។
ការកំណត់តំបន់ទាំងនោះ គឺក្រោយពីលោកនាយករដ្ឋមន្រ្តី ហ៊ុន សែន បានចុះហត្ថលេខាលើអនុក្រឹត្យសំខាន់មួយ នៅថ្ងៃទី៧ ខែមីនា ឆ្នាំ២០១២ កន្លងទៅនេះ ដើម្បីលុបឡូត៍នេសាទឯកជនសរុបចំនួន ៣៧ កន្លែង នៅបឹងទន្លេសាប ដើម្បីដាក់ឲ្យប្រជាពលរដ្ឋនេសាទត្រីជាលក្ខណៈគ្រួសារ ដោយប្រើប្រាស់ឧបករណ៍នេសាទស្របច្បាប់។
រដ្ឋាភិបាលនៅមិនទាន់បានកំណត់ទំហំនៃតំបន់អភិរក្សនោះថា មានចំនួនប៉ុន្មានពាន់គីឡូម៉ែត្រក្រឡា ឲ្យបានជាក់លាក់នៅឡើយទេ ដោយអាជ្ញាធរពាក់ព័ន្ធកំពុងតែបន្តសិក្សានៅឡើយ។ រដ្ឋាភិបាលក៏បានកំណត់តំបន់មួយចំនួនទៀតនៅបឹងទន្លេសាប ជាតំបន់នេសាទត្រីសាធារណៈ និងលក្ខណៈគ្រួសារ។
រដ្ឋមន្ត្រីក្រសួងធនធានទឹក និងឧតុនិយម លោក លឹម គានហោ និងជាប្រធានអាជ្ញាធរបឹងទន្លេសាប បានមានប្រសាសន៍នៅថ្ងៃទី៩ ខែមីនា ឆ្នាំ២០១២ ថា លោកសុំឲ្យប្រជាពលរដ្ឋរស់នៅខេត្តជុំវិញបឹងទន្លេសាប សហការគ្នាជួយការពារព្រៃលិចទឹក និងកុំប្រើឧបករណ៍នេសាទខុសច្បាប់៖ «ឥឡូវបានកែទម្រង់ហើយ វានៅសល់ជំហានមួយទៀតហ្នឹងថា តើវិធានការគ្រប់គ្រងយ៉ាងម៉េច? ...បើគ្រប់គ្រងបានល្អប្រសើរ គឺថា ពិតប្រាកដណាស់ គឺថា ទិន្នផលត្រីនឹងកើន ហើយប្រជាកសិករនឹងសម្បូរណ៍សប្បាយក្នុងការធ្វើប្រហុកផ្អកស្អីទាំងអស់នោះ។ អាហ្នឹងអាស្រ័យទៅលើហ្នឹង ប៉ុន្តែបើយើងគ្រប់គ្រងមិនបានល្អ អាហ្នឹងខ្ញុំពិបាកថាដែរ»។
ទាក់ទងនឹងការប្រកាសលុបឡូត៍នេសាទសរុបចំនួន ៣៧កន្លែងជាបន្តបន្ទាប់នេះ លោកនាយករដ្ឋមន្ត្រី ហ៊ុន សែន បានមានប្រសាសន៍នៅយប់ថ្ងៃទី៨ ខែមីនា ឆ្នាំ២០១២ ថា ការលុបនេះគឺមិនអាចថយក្រោយវិញទេ៖ «ជាកាដូមួយជូនចំពោះលោកយាយ អ៊ុំស្រី អ្នកមីង បងស្រី ប្អូនស្រី ក្មួយស្រីទាំងឡាយ ព្រោះថា ជាថ្ងៃសិទ្ធិនារីផងដែរ ហើយបញ្ហាទាំងអស់នេះក៏ជាបញ្ហាដែលទាក់ទងទៅជាមួយនឹងជីវភាពជាធម្មតារបស់ប្រជាពលរដ្ឋ...ហើយស្ត្រីជាមេគ្រួសារតែងតែទទួលនូវការលំបាកច្រើនជាងគេនៅក្នុងការស្វែងរកអាហារសំរាប់ក្រុមគ្រួសារ»។
ប្រធានសម្ព័ន្ធប្រជានេសាទកម្ពុជា ប្រចាំនៅបឹងទន្លេសាប និងទន្លេមេគង្គ លោក ឡុង សុចែត បានមានប្រសាសន៍ថា ប្រជានេសាទរីករាយចំពោះការសម្រេចរបស់លោកនាយករដ្ឋមន្ត្រីនេះ។
លោកសន្យាថា នឹងជួយបំផុសប្រជានេសាទឲ្យចូលរួមការពារព្រៃលិចទឹក និងមិនឲ្យប្រើប្រាស់ឧបករណ៍នេសាទខុសច្បាប់៖ «បើពីមុនមកនោះគេថា ទឹកត្រឹមណា ឡូត៍ត្រឹមហ្នឹង...វាពិបាកចេញទៅរកស៊ីនេសាទ។ ឥឡូវបានរដ្ឋាភិបាលកាត់ឡូត៍អត់ឲ្យមានធ្វើឡូត៍អ៊ីចឹងទៀត យើងមានអាទិភាពច្រើនក្នុងការប្រកបរបរចិញ្ចឹមជីវិត»។
អនុក្រឹត្យដែលបានចុះហត្ថលេខាដោយលោកនាយករដ្ឋមន្រ្តី ហ៊ុន សែន ចុះថ្ងៃទី៧ ខែមីនា ឆ្នាំ២០១២ ថ្មីៗនេះ បានចែងថា ឡូត៍នេសាទដែលបានលុបទាំងអស់នោះ ត្រូវបានរក្សាទុកសម្រាប់ប្រជាពលរដ្ឋធ្វើនេសាទជាលក្ខណៈគ្រួសារ និងធ្វើជាកន្លែងអភិរក្សជលផល ដូចបានកំណត់លើផែនទី និងនិយាមកាភ្ជាប់មកជាមួយនឹងអនុក្រឹត្យនេះ។ មិនអនុញ្ញាតឲ្យមានការធ្វើអាជីវកម្មនេសាទជាលក្ខណៈសិប្បកម្ម និងឧស្សាហកម្មនៅក្នុងដែននេសាទទឹកសាបគ្រប់ប្រភេទ។
ស្របពេលនេះដែរ លោកនាយករដ្ឋមន្ត្រី ហ៊ុន សែន បានប្រកាសស្នើសុំឲ្យតុលាការ និងអាជ្ញាធរមួយចំនួនដោះលែងប្រជាពលរដ្ឋដែលរងការចាប់ខ្លួនដាក់គុក និងរងការកាត់ទោសក្រោមបទនេសាទខុសច្បាប់កន្លងមកឲ្យមានសេរីភាពវិញ។ លោកក៏សុំឲ្យអាជ្ញាធររដ្ឋបាលជលផលប្រគល់ឧបករណ៍នេសាទដូចជា សន្ទូច ទូក និងម៉ាស៊ីនកាណូតជាដើម ឲ្យអ្នកទាំងនោះវិញលើកលែងតែឧបករណ៍នេសាទខុសច្បាប់៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។