លោក ហ៊ុន សែន ប្រតិកម្មតបនឹងរបាយការណ៍របស់លោក ស៊ូប៊ែឌី
ko.mp3
លោកនាយករដ្ឋមន្ត្រី ហ៊ុន សែន បានប្រតិកម្មតបនឹងរបាយការណ៍នោះថា ជារបាយការណ៍ដែលមិនបានឆ្លុះបញ្ចាំងអំពីស្ថានភាពជាក់ស្ដែងនៅសង្គមកម្ពុជា ហើយលោកបញ្ជាក់ថា កម្ពុជាជារដ្ឋអធិបតេយ្យភាព និងឯករាជ្យ ដូច្នេះកម្ពុជាមិនអាចទទួលរបាយការណ៍របស់មនុស្សម្នាក់បានទេ។
លោក ហ៊ុន សែន៖ «អានេះអនុសាសន៍របស់អង្គការសហប្រជាជាតិ មនុស្សម្នាក់ហ្នឹង អាហ្នឹងអង្គការសហប្រជាជាតិនឹងគេដែរ ហើយដើរតឹកឡិកៗ មកអ៊ីចឹងទៅជួបនេះជួបណោះ ហើយទៅធ្វើរបាយការណ៍ រួចហើយឲ្យគេមកទទួលយក។ រដ្ឋអធិបតេយ្យមួយមិនអាចទទួលយកនូវអ្វីដែលជារបស់អ្នកដទៃបានទេ ត្រូវសួរប្រជាពលរដ្ឋសិន ឥឡូវឆ្នាំ២០១៣ សួរប្រជាពលរដ្ឋទៅបើប្រជាពលរដ្ឋលែងត្រូវការគណបក្សប្រជាជនហើយគេបោះឆ្នោតទម្លាក់ហើយ។ បើបោះឆ្នោតទម្លាក់ហើយអ្នកឯងធ្វើទៅតាមលោកឯងហ្នឹងទៅ អាហ្នឹងខ្ញុំគ្រាន់តែថា និយាយឲ្យសិស្សចេះទេ ប៉ុន្តែក៏វាមានចំណែកមួយឲ្យអ្នកដទៃចេះដែរ កុំល្ងង់ពេកតែខ្ញុំសូមប្រាប់សុំប្រដៅសូមពន្យល់»។
លោកថ្លែងបែបនេះ នៅក្នុងពិធីចែកសញ្ញាបត្រដល់និស្សិតសាកលវិទ្យាល័យធនធានមនុស្សនៅវិទ្យាស្ថានជាតិអប់រំ នៅថ្ងៃទី០៤ ខែតុលា។ ការប្រតិកម្មនេះបានកើតឡើងក្រោយពីលោក សុរិយា ស៊ូប៊ែឌី បានយករបាយការណ៍របស់លោកទៅបង្ហាញនៅក្នុងអង្គប្រជុំនៃអង្គការសហប្រជាជាតិទទួលបន្ទុកសិទ្ធិមនុស្សនៅទីក្រុងហ្សឺណែវ ប្រទេសស្វីស កាលពីថ្ងៃទី២៦ ខែកញ្ញា ដែលបានលើកបញ្ហាជាច្រើនចំណុច ពិសេសលោកសុំឲ្យកែទម្រង់ការគណៈកម្មាធិការជាតិរៀបចំការបោះឆ្នោត ដោយទទូចឲ្យរដ្ឋាភិបាលធ្វើកំណែទម្រង់ការបោះឆ្នោត ដើម្បីធានាការបោះឆ្នោតនៅឆ្នាំ២០១៣ បញ្ហាការគោរពសិទ្ធិមនុស្ស និងបញ្ហារៀបចំដីសម្បទានសេដ្ឋកិច្ច និងសម្បទានផ្សេងៗ។
របាយការណ៍ទាំងពីរនោះ ធ្វើឡើងដោយផ្អែកលើបេសកកម្មស្វែងរកការពិតរបស់លោកចំនួនពីរលើកនៅកម្ពុជា កាលពីខែធ្នូ ឆ្នាំ២០១១ និងខែឧសភា ឆ្នាំ២០១២។
ទោះយ៉ាងណា លោកនាយករដ្ឋមន្ត្រី ហ៊ុន សែន ពុំបារម្ភពីឥទ្ធិពលនៃរបាយការណ៍នេះទៅលើសេចក្ដីសម្រេចរបស់ប្រទេសសមាជិកក្រុមប្រឹក្សាអង្គការសហប្រជាជាតិ ថាអាចនឹងមានចំណាត់ការណាមួយមកលើកម្ពុជាទេ៖ «រួចបានសរសេរផ្ដេសផ្ដាសហ្នឹង អនុសាសន៍របស់អង្គការសហប្រជាជាតិ។ នែ! អង្គការសហប្រជាជាតិណា អ៊ីចឹងគ្រាន់តែមើលរបៀបបែបបទដែលយើងសរសេរទៅក្រុមប្រឹក្សាសន្តិសុខមួយ និងប្រធានមហាសន្និបាតអង្គការសហប្រជាជាតិមួយ។ ប៉ុន្តែខ្ញុំសូមបញ្ជាក់សេចក្ដីសម្រេចរបស់មហាសន្និបាតអង្គការសហប្រជាជាតិគ្មានចរិតចាប់បង្ខំអនុវត្តន៍ទេ កុំថាឡើយមនុស្សម្នាក់ គឺមានតែសេចក្ដីសម្រេចរបស់ក្រុមប្រឹក្សាសន្តិសុខតែប៉ុណ្ណោះដែរមានចរិតចាប់បង្ខំសម្រេច»។
ប្រធានមជ្ឈមណ្ឌលសិទ្ធិមនុស្សកម្ពុជា (CCHR) លោក អ៊ូ វីរៈ មានប្រសាសន៍ថា ការប្រតិកម្មរបស់លោកនាយករដ្ឋមន្ត្រីដូច្នេះ គឺជាការល្អមួយជាដំណើរនៃការជជែកគ្នាទៅរកដំណោះស្រាយមួយ។
សេចក្ដីថ្លែងការណ៍របស់អង្គការសហប្រជាជាតិទទួលបន្ទុកសិទ្ធិមនុស្ស បានដកស្រង់សំដីលោក សុរិយា ស៊ូប៊ែឌី ថា កម្ពុជាបានរីកចំរើនច្រើនក្នុងការពង្រឹងលទ្ធិប្រជាធិបតេយ្យសិទ្ធិមនុស្ស និងនីតិរដ្ឋ ប៉ុន្តែលោកមានក្តីបារម្ភចំពោះបញ្ហាខ្លះក្នុងដំណើរការបោះឆ្នោត និងផលប៉ះពាល់បណ្ដាលមកពីការផ្ដល់សម្បទានដីសេដ្ឋកិច្ច។ ការផ្ដល់ដីសម្បទាននៅកម្ពុជា ធ្វើឡើងដោយគ្មានតម្លាភាព និងផ្អែកតាមច្បាប់។ លោកថា ច្បាប់នៅលើក្រដាសផ្សេង ប៉ុន្តែការអនុវត្តផ្ទុយទៅនឹងច្បាប់។
លោក ហ៊ុន សែន៖ លោក សុរិយា ស៊ូប៊ែឌី គួរទៅជួយប្រទេសរបស់ខ្លួនប្រសើរជាង
ក្រៅតែពីចោទលោក សុរិយា ស៊ូប៊ែឌី ថា សរសេររបាយការណ៍ខ្វះការពិត លោកនាយករដ្ឋមន្ត្រី ហ៊ុន សែន ក៏បានបន្តុះបង្អាប់ប្រទេសរបស់លោក ស៊ូប៊ែឌី ថា កំពុងជួបវិបត្តិនយោបាយ ដែលគ្មានអ្វីល្អប្រសើរជាងកម្ពុជា ទេ។ លោក ហ៊ុន សែន ក៏បានបញ្ជាក់ដោយមិនបញ្ចេញឈ្មោះទៀតថា លោក ស៊ូប៊ែឌី គួរតែទៅជួយប្រទេសនេប៉ាល ខ្លួនឯងវិញប្រសើរជាង។
នេះជាលើកទីមួយ ដែលលោកនាយករដ្ឋមន្ត្រី ហ៊ុន សែន បានប្រតិកម្មដោយចំហប្រឆាំងនឹងលោក សុរិយា ស៊ូប៊ែឌី ចាប់តាំងពីអ្នករាយការណ៍ពិសេសអង្គការសហប្រជាជាតិ ទទួលបន្ទុកផ្នែកសិទ្ធិមនុស្សនៅកម្ពុជា រូបនេះ ត្រូវបានតែងតាំងដោយក្រុមប្រឹក្សាអង្គការសហប្រជាជាតិ ទទួលបន្ទុកសិទ្ធិមនុស្ស កាលពីខែមិនា ឆ្នាំ២០០៩ មក។
លោកនាយករដ្ឋមន្ត្រី ហ៊ុន សែន ក៏ធ្លាប់វាយប្រហារដោយពាក្យសម្ដីធ្ងន់ៗទៅលើតំណាងពិសេសរបស់អគ្គលេខាធិការអង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា គឺលោក យ៉ាស ក្ហាយ (Yash Ghai) ផងដែរ។ លោក ហ៊ុន សែន បានហៅលោក យ៉ាស ក្ហាយ ដែលកើតនៅប្រទេសខេនយ៉ា (Kenya) ថា ជាប្រភេទអ្នកទេសចររយៈពេលយូរ បន្ទាប់ពីលោក យ៉ាស ក្ហាយ បានសរសេររបាយការណ៍លាតត្រដាងអំពីបញ្ហារំលោភសិទ្ធិមនុស្សនៅកម្ពុជា និងស្នើអោយមានធ្វើកំណែទម្រង់ ដើម្បីលើកកម្ពស់ការគោរពសិទ្ធិមនុស្ស។ លោក យ៉ាស ក្ហាយ បានបំពេញបេសកកម្មសិទ្ធិមនុស្សនៅកម្ពុជា ពីឆ្នាំ២០០៥ ដល់ឆ្នាំ២០០៨ ហើយចូលជំនួសដោយលោក សុរិយា ស៊ូប៊ែឌី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកអានអនាមិក
បើហ៊ុនសែនចង់ដឹងទឹកចិត្តប្រជាជនបែបណា តើហ៊ុនសែនហ៊ានបើកឲ្យបោះឆ្នោតដោយសេរី យុត្តិធ៌ម ស្មើភាពគ្នា និងគ្មានការគម្រាម ឬសម្លាប់ទេ????
Oct 06, 2012 07:16 AM
John
ពី LondonNothing changes there for this jungle man, arrogant and ignorant as usual. The outside world should stop wasting their money helping this type of government. Over 30 years this man has ruled Cambodia with the help of foreign aid has made him who he is today, a disrespectful and untouchable thug.
Oct 05, 2012 04:46 AM
អ្នកអានអនាមិក
សម្តេចគួរប្រកាសថា រិះគន់មិនបាន មិនទទួលយក ចង់ឪណាក៏ដោយ
នេះនែ មានតែអ្នកអង្គុយពីក្រោយទាំងនេះទេទើបជានិច្ចកាលងក់ក្បាល
ទទួលយកដោយមិនបាច់ចង់ដឹងប្រធានបទផង។ តើលោក សុរិយា ស៊ូប៊ែឌី
រិះគន់ដើម្បីបុគ្គលលោកផ្ទាល់ ឬនរណាម្នាក់ក្រៅពីរាស្ត្រខ្មែរ?
Oct 05, 2012 04:18 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
