ថ្លែងនៅក្នុងពិធីចែកសញ្ញាបត្រឲ្យនិស្សិតវិទ្យាស្ថាន វ៉ាន់ដាគណនេយ្យ ក្នុងទីក្រុងភ្នំពេញ នៅថ្ងៃច័ន្ទ ទី១០ ខែមករា លោកនាយករដ្ឋមន្ត្រីបានសុំឲ្យមជ្ឈដ្ឋានជាតិ អន្តរជាតិ រួមទាំងអង្គការសហប្រជាជាតិផង កុំឲ្យលូកដៃធ្វើអន្តរាគមន៍ក្នុងរឿងថៃ ជាប់ទោសនេះ រួមទាំងថ្នាក់ដឹកនាំភាគីរដ្ឋាភិបាលថៃផង។
លោក ហ៊ុន សែន បានថ្លែងទៀតថា ៖ «ហើយបំផុសពាក្យចចាមអារ៉ាមថា ថាក់ស៊ីន ឬបក្សភឿថៃ ចង់ធ្វើអន្តរាគមន៍។ សុំប្រាប់ទៅថា អត់បានទេ! មកពីជ្រុងណាក៏អត់បានដែរ មកពីអង្គការសហប្រជាជាតិក៏អត់បានដែរ ហើយសាលក្រមចូលស្ថាពរហើយ ត្រូវ ២ ភាគ ៣ ជាប់គុកសិន បានពិនិត្យលើកលែងទោសយ៉ាងណានោះ?»។
ការអះអាងនេះ ធ្វើឡើងបន្ទាប់ពីកាសែតថៃ បាងកកប៉ុស្តិ៍ ចុះថ្ងៃទី៨ ខែមករាថា លោក ថាក់ស៊ីន ស៊ីណាវ៉ាត្រ (Thaksin Shinawatra) អតីតនាយករដ្ឋមន្ត្រីថៃ ដែលកំពុងរស់នៅនិរទេសខ្លួននៅបរទេស ហើយដែលធ្លាប់ធ្វើជាទីប្រឹក្សាសេដ្ឋកិច្ចរបស់រដ្ឋាភិបាលកម្ពុជា បានស្ម័គ្រចិត្តចូលខ្លួនជួយធ្វើអន្តរាគមន៍ដោះលែងជនជាតិថៃទាំង ៧នាក់ ដែលជាប់ឃុំនៅគុកព្រៃស ក្នុងប្រទេសកម្ពុជានោះ បានរួចទោសវិញ។
ជនជាតិថៃ ៧នាក់ ដែលក្នុងនោះមានអ្នកតំណាងរាស្ត្រថៃ ម្នាក់ផងដែរនោះ ត្រូវបានកងការពារព្រំដែនកម្ពុជា ចាប់ខ្លួននៅថ្ងៃទី២៩ ខែធ្នូ ឆ្នាំ២០១០ កន្លងទៅ បន្ទាប់ពីបានឆ្លងចូលក្នុងដែនដីខ្មែរ នៅក្នុងភូមិសាស្ត្រខេត្តបន្ទាយមានជ័យ។
លោកនាយករដ្ឋមន្ត្រី ហ៊ុន សែន បានបង្ហើបថា នៅយប់ថ្ងៃចាប់ខ្លួនជនជាតិថៃទាំង ៧នាក់នោះ ក្នុងទូរស័ព្ទដៃរបស់លោកមានលេខហៅចូលពីក្រៅប្រទេស ១០លើក តែលោកខកខានមិនបានទទួល ដោយសារតែលោកមិនបានដឹង ព្រោះទូរស័ព្ទមិនដាក់សំឡេងរោទ៍ ក៏ប៉ុន្តែលោកមិនបានបញ្ជាក់ឈ្មោះអ្នកដែលហៅចូលនោះទេ។ លោកក៏បានសម្ដែងការភ្ញាក់ផ្អើលផងដែរថា ហេតុអ្វីបានជាក្នុងចំណោមជនជាតិថៃ ដែលត្រូវបានចាប់ខ្លួននោះ មានលេខទូរស័ព្ទដៃរបស់លោកជាប់នឹងខ្លួន?
យ៉ាងណាក្ដី លោកនាយករដ្ឋមន្ត្រីបានបញ្ជាក់ថា លេខទូរស័ព្ទដៃរបស់លោកបានផ្តល់ឲ្យមន្ត្រីថៃម្នាក់ ដែលលោកមិនបានបញ្ចេញឈ្មោះ កាលពីឆ្នាំទៅមិញ ដើម្បីសន្ទនាគ្នាពីរឿងសង់ផ្លូវក្បែរព្រំដែនខ្មែរ-ថៃ ៖ «ដូចបង្កប់យ៉ាងម៉េច ផ្គត់ផ្គង់អីយ៉ាងម៉េច សរសេរដោយពិរុទ្ធជនម្នាក់នៅមន្ទីរព្រៃស ហើយសរសេរផ្ញើចេញក្រៅលេខទូរស័ព្ទខ្ញុំសុទ្ធ។ ងាប់តែម្ដង! អ៊ីចឹងមានន័យថា ការចូលមកនេះមានការរៀបចំដោយច្បាស់ ឲ្យទាំងលេខរបស់ ហ៊ុន សែន មកជាមួយ ហើយលេខទូរស័ព្ទហ្នឹងត្រូវបានប្ដូរគ្នាតាំងពីខែធ្នូ ឆ្នាំ២០០៩ ទាក់ទងអារឿងផ្លូវលេខ៦៨ អ៊ីចឹង! រឿងនេះអត់ធម្មតាប៉ុន្មាន»។
ស្របពេលដែលលោកនាយករដ្ឋមន្ត្រីប្រកាសដូច្នេះ ជនជាតិថៃមួយក្រុម ដែលគេហៅថា បណ្ដាញអ្នកស្នេហាជាតិថៃ កំពុងស្វះស្វែងរកវិធីច្បាប់ដើម្បីសុំដោះលែងជនជាប់ចោទថៃ ទាំងនោះឲ្យនៅក្រៅឃុំ។
លោក ខារួន សៃង៉ាំ (Karoon, Sai-ngam) អតីព្រឹទ្ធសភាថៃ និងបច្ចុប្បន្នជាអ្នកច្បាប់ថៃ បានថ្លែងប្រាប់អ្នកកាសែតខ្មែរនៅមុខតុលាការក្រុងភ្នំពេញ នៅព្រឹកថ្ងៃទី១០ ខែមករាថា ការប្រឹងប្រែងរបស់ក្រុមលោកនៅថ្ងៃដំបូងនេះ មិនបានលទ្ធផលអ្វីទេ។
លោក ខារួន សៃង៉ាំ បញ្ជាក់ជាភាសាខ្មែរថា ៖ «ឥឡូវនេះឡើងតុលាការហើយ។ ពួកខ្ញុំមកនេះអាចជួយអ្វីបានខ្លះ ធ្វើយ៉ាងណាធ្វើឲ្យបងប្អូនបានហក់(ទៅ)ប្រទេសថៃដោយសុវត្ថិភាព»។
តុលាការកម្ពុជា បានបញ្ចប់ការសាកសួរជនជាប់ចោទទាំង ៧នាក់ ហើយបានចោទថា ពួកគេបានបំពានចូលដែនដីកម្ពុជា ខុសច្បាប់ និងបានចូលមូលដ្ឋានយោធាខ្មែរដោយមិនមានការអនុញ្ញាត ដែលផ្អែកលើច្បាប់ព្រហ្មទណ្ឌកម្ពុជា ពួកគេត្រូវជាប់គុកពី ៦ខែ ទៅ ១ឆ្នាំ និងពិន័យប្រាក់ចាប់ពី ២លានរៀល ដល់ ៤លានរៀល ប្រសិនបើតុលាការរកឃើញកំហុសឆ្គងរបស់ពួកគេដូចការចោទប្រកាន់ពិតមែន។
លោក កែ សាខន អនុប្រធានតុលាការក្រុងភ្នំពេញ មានប្រសាសន៍ថា ជនជាតិថៃ ៧នាក់នោះ បានសារភាពថា ពួកគេបានចូលដីខ្មែរខុសច្បាប់មែន។ លោកបន្តថា តុលាការក្រុងភ្នំពេញ នៅមិនទាន់បានកំណត់ថ្ងៃសវនាការជនជាតិថៃទាំង ៧នាក់នោះនៅឡើយទេ ហើយចៅក្រមកំពុងដំណើរការស៊ើបអង្កេតរឿងនេះបន្ថែមទៀត៕