សេចក្ដីអំពាវនេះត្រូវបានតំណាងបក្សនយោបាយនានាសាទរ ក៏ប៉ុន្តែតំណាងបក្សនយោបាយទាំងនោះ បានអំពាវនាវតបវិញថា សុំឲ្យមន្ត្រីរដ្ឋាភិបាលជាន់ខ្ពស់ ទាំងស៊ីវិល ទាំងនគរបាលយោធា ជាពិសេស គណៈកម្មាធិការរៀបចំការបោះឆ្នោតដែលមានតួនាទីអព្យាក្រឹត្យនោះ សុំធ្វើការកុំលំអៀងទៅបក្សប្រជាជន ដែលជាបក្សកំពុងកាន់អំណាច។
ដំណើរការបោះឆ្នោតឃុំសង្កាត់នឹងចាប់ផ្ដើមនៅដើមខែមិថុនា ពោលគឺនឹងប្រព្រឹត្តទៅនៅក្នុងរយៈពេលមួយខែខាងមុខនេះ។
ខណៈដែលការបោះឆ្នោតឃុំសង្កាត់កាន់តែខិតចូលមកដល់ លោកនាយករដ្ឋមន្ត្រី ហ៊ុន សែន បានអំពាវនាវដល់មន្ត្រីអាជ្ញាធរគ្រប់លំដាប់ថ្នាក់ នៅទូទាំងប្រទេសសុំឲ្យជួយការពារសន្តិសុខ សណ្ដាប់ធ្នាប់ជូនគណបក្សនយោបាយឃោសនាបោះឆ្នោតឲ្យមានសុវត្ថិភាព៖ «គឺថា បង្កលក្ខណៈសម្បត្តិឲ្យគ្រប់គណបក្សនយោបាយទាំងអស់គេបានឃោសនាធ្វើដំណើរសព្វបែបយ៉ាង ក្នុងបរិយាកាសអព្យាក្រឹត សេរី ដើម្បីធានាការបោះឆ្នោតមួយដែលត្រឹមត្រូវ យុត្តិធម៌ដែលអាចទទួលយកបាន»។
សេចក្ដីអំពាវនាវនេះបានធ្វើឡើងនៅថ្ងៃទី១ ខែឧសភា ក្នុងពិធីសម្ពោធតំបន់សេដ្ឋកិច្ចពិសេសកំពង់ផែក្រុងព្រះសីហនុ។ ក្នុងពេលនោះ លោកនាយករដ្ឋមន្ត្រី ក៏បានអំពាវនាវឲ្យបក្សទាំងអស់ទទួលយកលទ្ធផលនៃការបោះឆ្នោតដែរ៖ «ហើយក៏អំពាវនាវដល់បណ្ដាបក្សនានាទទួលយកលទ្ធផលបោះឆ្នោត។ ព្រោះខ្លួនឯងគ្មាននរណាមួយប្រកាសថា ខ្លួនអន់ទេពេលនេះខ្លាំងទាំងអស់ ហើយបើខ្លាំងហើយហ៊ានបោះត្រូវហ៊ានទទួល។ កុំចាញ់ចោទចេះចុះ»។
របាយការណ៍របស់គណៈកម្មាធិការរៀបចំការបោះឆ្នោត ឲ្យដឹងថា មានគណបក្សនយោបាយ ១០ចូលរួមបោះឆ្នោតឃុំសង្កាត់លើកនេះ។
ឆ្លើយតបទៅនឹងសេចក្ដីអំពាវនាវនេះ តំណាងគណបក្សជាច្រើនបានបានអបអរ។ ក៏ប៉ុន្តែអ្នកស្រី កែ សុវណ្ណរតន៍ អគ្គលេខាបក្ស សម រង្ស៊ី បានរិះគន់តបវិញថា សេចក្ដីអំពាវនាវរបស់លោកនាយករដ្ឋមន្ត្រីមិនមានប្រសិទ្ធភាពទេ។ ជាងនេះទៅទៀតអ្នកស្រីបានរិះគន់ថា គណៈកម្មាធិការរៀបចំការបោះឆ្នោតជាតិ (គ.ជ.ប.) ធ្វើការលំអៀងទៅបក្សប្រជាជន៖ «ខ្ញុំគាំទ្រអ្វីដែលជាការអំពាវនាវ។ ប៉ុន្តែខ្ញុំបារម្ភសេចក្ដីអំពាវនាវហ្នឹងអត់មានប្រសិទ្ធភាព។ កន្លងមករាល់ពាក្យបណ្ដឹងដែលគណបក្ស សម រង្ស៊ី បានប្ដឹងចំពោះអ្នកប្រព្រឹត្តខុសគឺរួចទោសទាំងអស់»។
អ្នកស្រីក៏បានចោទដែរថា មន្ត្រីរដ្ឋាភិបាលថ្នាក់ខ្ពស់ ចាប់តាំងពីថ្នាក់អនុរដ្ឋលេខាធិការ ដល់រដ្ឋមន្ត្រី បានយកតួនាទី និងសម្ភារៈ និងម៉ោងធ្វើការរដ្ឋទៅបម្រើបក្សប្រជាជន ខុសលក្ខន្តិកៈការងារមន្ត្រីរាជការ។
លោក គល់ បញ្ញា នាយកប្រតិបត្តិគណៈកម្មាធិការបោះដោយឆ្នោតសេរី និងយុត្តិធម៌នៅកម្ពុជា មានប្រសាសន៍ថា សេចក្ដីអំពាវនាវរបស់លោកនាយករដ្ឋមន្ត្រី អាចដាស់ស្មារតីដល់អាជ្ញាធរគ្រប់ជាន់ថ្នាក់ និងមន្ត្រីរដ្ឋាភិបាលជាន់ខ្ពស់ ឲ្យដឹងអំពីតួនាទីរបស់ខ្លួនបានខ្លះដែរ ខណៈដែលមានមន្ត្រីរដ្ឋាភិបាលជាច្រើនបានយកតួនាទីខ្លួនបម្រើបក្សប្រជាជន ដែលខុសនឹងច្បាប់បោះឆ្នោត។
លោក គល់ បញ្ញា៖ «ត្រឹមត្រូវហើយ។ ប៉ុន្តែត្រង់បញ្ហាការអនុវត្តមានបញ្ហាខ្លាំង។ សព្វថ្ងៃយើងរកឃើញមន្ត្រីរាជការ នគរបាល កងខេមរភូមិន្ទ គឺថា ទៅជាប្រព័ន្ធហើយដែលបានធ្វើការងារឲ្យបក្សកាន់អំណាច វាខុសច្បាប់ ប៉ះពាល់ដល់បរិយាកាសបោះឆ្នោតហ្នឹងទៀត»។
លោក ញឹក ប៊ុនឆៃ ប្រធានប្រតិបត្តិគណបក្សហ៊្វុនស៊ិនប៉ិច ក៏មានប្រសាសន៍ប្រហាក់ប្រហែលនេះដែរ។ ប៉ុន្តែលោកបានរំលឹកថា ស្ថានភាពសន្តិសុខនយោបាយ និងបោះឆ្នោតលើកនេះបានប្រសើរជាងការបោះឆ្នោតលើកមុនៗ ជាពិសេសការបោះឆ្នោតឆ្នាំ១៩៩៣ រៀបចំដោយអ៊ុនតាក់ (Untac) មានការបាញ់ប្រហារសកម្មជនគណបក្សនយោបាយយ៉ាងសាហាវព្រៃផ្សៃជាងសព្វថ្ងៃឆ្ងាយណាស់។ ចំពោះការចោទប្រកាន់ថា គ.ជ.ប. មិនឯករាជ្យ និងពាក្យចោទថា មន្ត្រីរដ្ឋាភិបាលលំអៀងទៅបក្សប្រជាជន ត្រូវបាន គ.ជ.ប. និងមន្ត្រីរដ្ឋាភិបាលបដិសេធជាបន្តបន្ទាប់។
ក្រុមអ្នកសង្កេតការណ៍បោះឆ្នោតនៅកម្ពុជា បានរំលឹកថា តាមប្រវត្តិសាស្ត្រនៅកម្ពុជា រយៈពេលជាង ២០ឆ្នាំចុងក្រោយនេះ បក្សដែលចាញ់ឆ្នោតច្រើនតវ៉ា ក្រោយពេលប្រកាសលទ្ធផលឆ្នោត។ ជាអាទិ នៅឆ្នាំ១៩៩៣ ការបោះឆ្នោតដំបូងដែលរៀបចំដោយអ៊ុនតាក់ គណបក្សហ៊្វុនស៊ិនប៉ិច បានឈ្នះឆ្នោត ក៏ប៉ុន្តែគណបក្សប្រជាជនបានតវ៉ាលទ្ធផលដោយចោទថា មានការបន្លំសន្លឹកឆ្នោត ហើយអ៊ុនតាក់ លំអៀងទៅបក្សហ៊្វុនស៊ិនប៉ិច។ បន្ទាប់មកលោក ហ៊ុន សែន បានតវ៉ាសុំបំបែកតំបន់អបគមន៍ បណ្ដាខេត្តប៉ែកខាងកើតជាប់ប្រទេសវៀតណាម។ តែសម្ដេចព្រះបាទ នរោត្តម សីហនុ ដែលកាលនោះព្រះអង្គជាព្រះមហាក្សត្រ បានសម្រុះសម្រួលរំលែកអំណាច ដោយបង្កើតឲ្យមានអ្នកដឹកនាំប្រទេសមាននាយករដ្ឋមន្ត្រីពីរ។
នៅឆ្នាំ២០០៣ ឆ្នាំ២០០៨ ការបោះឆ្នោតដែលរៀបចំដោយគណៈកម្មាធិការរៀបចំការបោះឆ្នោតជាតិ ត្រូវគណបក្សប្រជាជនបានឈ្នះឆ្នោតវិញ។ ក៏ប៉ុន្តែគណបក្សចាញ់ឆ្នោតបានតវ៉ាដោយលើកហេតុផលប្រហាក់ប្រហែលគ្នា និងចោទថា គណៈកម្មាធិការរៀបចំការបោះឆ្នោតជាតិលំអៀងទៅបក្សប្រជាជន រួចក៏មានក្រុមមនុស្សរាប់ម៉ឺននាក់ប្រមូលផ្ដុំនៅទីក្រុងភ្នំពេញ ធ្វើឲ្យដំណើរការរបស់រដ្ឋាភិបាលថ្មីដែលជាប់ឆ្នោតមិនអាចដំណើរការបានរាប់ខែ។
ក្រុមអ្នកសង្កេតការណ៍ខ្លះកត់សម្គាល់ថា ការបដិសេធលទ្ធផលបោះឆ្នោតរបស់បក្សនយោបាយដែលចាញ់ឆ្នោត ស្ទើរក្លាយទៅជាប្រពៃណីទៅហើយ នៅស្រុកខ្មែរ មិនថា បក្សណា ឬបក្សណានោះទេ។ ខុសពីប្រទេសប្រកាន់លទ្ធិប្រជាធិបតេយ្យជឿនលឿនដែលបក្សនយោបាយប្រកួតប្រជែងស្រុះស្រួលធ្វើការជាមួយគ្នា។
ដោយឡែកចំពោះការបោះឆ្នោតឃុំសង្កាត់ ឆ្នាំ២០១២នេះ ក្រុមអ្នកសង្កេតការណ៍ខ្លះរំពឹងទុកថា នឹងមានបញ្ហាខ្លះដែរ តែនឹងមិនអាចដល់ថ្នាក់ធ្វើឲ្យប៉ះពាល់ដំណើរការការងារប្រចាំថ្ងៃរបស់រដ្ឋាភិបាលបច្ចុប្បន្ននោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។