នៅច្រកទ្វារព្រំដែនអន្តរជាតិប៉ោយប៉ែតដដែល ក្រុមកម្មករខ្មែរដែលរកស៊ីស៊ីឈ្នូលគេ នៅក្នុងទឹកដីថៃ ក៏បានថ្ងូរអំពីការលំបាក ដែលអាជ្ញាធរខ្មែរបានទាមទារឲ្យពូកគេបង់ប្រាក់ច្រើន ។
ក្រុមអ្នកប្រើប័ណ្ណឆ្លងដែនពណ៌ស ឬ Border Pass ចូលទៅរកស៊ីក្នុងទឹកដីថៃ បានត្អូញត្អែរនិងទទូចសុំឲ្យសមត្ថកិច្ចប៉ូលិសច្រកទ្វារអន្តរជាតិ ប៉ោយប៉ែត បញ្ឈប់ការទារប្រាក់ចំនូន ៧០បាតក្នុងម្នាក់ៗសម្រាប់ការបោះត្រាចេញចូលរយៈពេល៧ថ្ងៃម្តងនោះចោល ។
លោក គង់ សាន មកពីខេត្តកំពង់ឆ្នាំង កំពុងប្រកបរបរជាកម្មករសំណង់នៅខេត្តប្រាជីនបូរី ប្រទេសថៃ បានរៀបរាប់អំពីការទារប្រាក់ ដោយប៉ូលិសអន្តោប្រវេសន៍ខ្មែរ នៅច្រកទ្វារអន្តរជាតិប៉ោយប៉ែត យ៉ាងដូច្នេះ ៖ «កន្លែងធ្វើសៀវភៅហ្នឹង បានដាក់ហើយគេថា ចាំយកអត់ទាន់ឲ្យចេញទេ វ៉ៃពីកន្លែងហ្នឹងហើយ មិនបាច់ចាំវ៉ៃនៅកន្លែងនោះទេ មិនបាច់ចាំទៅវ៉ៃ កន្លែង៧០ហ្នឹងទេ ប៉ុន្តែកន្លែងហ្នឹងបង់ ១២០ ចាំលើកទី២មកវិញបានវ៉ៃកន្លែង៧០ ។ អាហ្នឹងបើយើងវិភាគទៅវាចែកគ្នារកស៊ីអ៊ីចឹង យើងធ្វើអីមិនកើត ។ ខាងថៃអត់មានទេ ៧០ហ្នឹងយកតែខាងខ្មែរទេ» ។
ស្ត្រីមានផ្ទៃពោះម្នាក់និងប្អូនស្រីរបស់នាង ដែលបានចូលមករកស៊ីនៅស្រុកអារញ្ញ ខេត្តស្រះកែវ ប្រទេសថៃ បានរៀបរាប់ថា ពួកនាងរកបានប្រាក់បន្តិចបន្តួចសម្រាប់ចិញ្ចឹមតែប៉ូលិសខ្មែរ ក្រៅតែពីការចំណាយលើសោហ៊ុយហូបចុក ការធ្វើដំណើរ និងការស្នាក់នៅ ។ ពួកគេស៊ីឈ្នួលលក់គុយទាវ និងបកខ្ទឹម ដោយបានកម្រៃក្នុងមួយថ្ងៃ ១០០បាត ឬជាងមួយម៉ឺនរៀល លុយខ្មែរ និងថា ក្នុងមួយសប្តាហ៍ ពួកគេត្រូវមកវាយត្រាលើប័ណ្ណចូលដីខ្មែរ និងត្រឡប់ចេញទៅដីថៃវិញតាមការតម្រូវរបស់សមត្ថកិច្ចខ្មែរនិងថៃ ប៉ុន្តែថា ខាងភាគីតម្រួតនិងប៉ូលិសថៃ មិនបានយកលុយពីពួកគេទេ ៖ «... ប្រាក់ខែមានបន្តិចបន្តួច នៅថ្លៃផ្ទះ បើជិះកង់ទៅក៏នៅថ្លៃ កង់១០បាត [ថ្លៃបង់ប័ណ្ណឆ្លងដែន] ៧០បាត អស់ច្រើនណាស់ ។ និយាយរួមទៅ មួយអាទិត្យអស់ ១០០បាតជាង ច្រើនណាស់រាប់មិនអស់ទេ ទាំងគេទាំងខ្ញុំ មនុស្សមិនដឹងមកពីណាពីណី ។ តូចចិត្តតែប៉ុណ្ណេះទេ ខំរកស៊ីប្រទេសគេ ប្រទេសគេមិនយកលុយ ខ្មែរគ្នាឯងយកលុយ» ។
ពួកគេសុំឲ្យអាជ្ញាធរខ្មែរបញ្ឈប់ ឬ បន្ធូរបន្ថយការតម្រូវឲ្យបង់ប្រាក់នេះ មកនៅត្រឹម ១០បាត ក្នុងម្នាក់ៗសម្រាប់រយៈពេលមួយសប្តាហ៍ម្តង ៖ «ខ្ញុំសំណូមពរថា .....កុំឲ្យគេយកដល់ថ្នាក់ហ្នឹងពេក ឲ្យគេយកតិចតួច ឬត្រឹម ១០បាត ឬមួយ ៤០-៥០អីអ៊ីចឹង» ។
ភ្លាមៗនេះ វិទ្យុអាស៊ីសេរី មិនអាចទាក់ទងសុំការបំភ្លឺពីលោក ប៉ិច សារ៉ន ប្រធានផ្នែកអន្តោប្រវេសន៍ច្រកទ្វារអន្តរជាតិប៉ោយប៉ែត អំពីការកំណត់តម្លៃបង់ប្រាក់ក្នុងការបោះត្រាលើប័ណ្ណឆ្លងដែននោះបាននៅឡើយទេ ប៉ុន្តែអតីតប្រធានច្រកទ្វារអន្តរជាតិមួយនេះ គឺលោក ប៊ុន ហោ បានមានប្រសាសន៍ថា តាមធម្មតា ការបោះត្រាចេញចូលនេះ ពុំតម្រូវឲ្យពលរដ្ឋអ្នកប្រើប័ណ្ណបង់ប្រាក់នោះទេ ។
អភិបាលរងខេត្តបន្ទាយមានជ័យ លោក សុខ សារ៉េត បានមានប្រសាសន៍ ថា អាជ្ញាធរខេត្តនៅពុំទាន់បានដឹងអំពីការតម្រូវឲ្យពលរដ្ឋអ្នកប្រើប័ណ្ណឆ្លងដែនបង់ប្រាក់ដូចការលើកឡើងនេះ នៅឡើយទេ ។
លោកសន្យាថា នឹងលើកយកបញ្ហានេះទៅពិភាក្សានិងរកវិធីដោះស្រាយនៅក្នុងកិច្ចប្រជុំថ្នាក់ខេត្ត នាពេលខាងមុខនេះ ។
លោកបានថ្កោលទោសសកម្មភាពទាំងឡាយណា ដែលអនុវត្តផ្ទុយពីការកំណត់ដោយច្បាប់ ព្រះរាជក្រឹត្យ ឬអនុក្រឹត្យរបស់រដ្ឋាភិបាលកម្ពុជា ។
តាមលំដាប់លេខរៀងនៃការចេញប័ណ្ណឆ្លងដែនរហូតមកទល់ដំណាច់ខែមេសា ឆ្នាំ២០០៨នេះ គេឃើញមានអ្នកកាន់ប័ណ្ណប្រភេទនេះ ដល់លេខរៀងលំដាប់ទី៥ម៉ឺនហើយ ។
ប័ណ្ណឆ្លងដែនពណ៌ស ឬ Border Pass ដែលផ្តល់ដោយសមត្ថកិច្ចប៉ូលិសព្រំដែនខ្មែរនោះ អាចប្រើបានរយៈពេល ២ឆ្នាំ ហើយអ្នកកាន់ប័ណ្ណនេះត្រូវចេញពីប្រទេសថៃទៅបោះត្រាចេញនិងចូល នៅប៉ុស្តិ៍ត្រួតពិនិត្យអន្តរជាតិប៉ោយប៉ែតជារៀងរាល់ ១សប្តាហ៍ម្តង ៕