រឿងពុករលួយក្នុងការចេញប័ណ្ណឆ្លងដែននៅច្រកប៉ោយប៉ែតត្រូវបានទម្លាយ

ដោយ សោភ័ណ

2008-05-26

អំពើចោទប្រកាន់ពុករលួយក្នុងការចេញប័ណ្ណឆ្លងដែន (Border Pass) ដោយការយកកម្រៃច្រើនលើសពីអត្រាកំណត់របស់រដ្ឋពីពលករខ្មែររាប់ម៉ឺននាក់ ដែលចូលទៅប្រកបរបររកស៊ីក្នុងទឹកដីថៃ ដោយប៉ូលិសអន្តោប្រវេសន៍ខ្មែរ នៅច្រកទ្វារអន្តរជាតិប៉ោយប៉ែតត្រូវបានគេទម្លាយ ។

អ្នកស្រី អោម ណឹម គឺជាមនុស្សម្នាក់ក្នុងចំណោមពលករខ្មែររាប់រយនាក់ដែលមករកការងារធ្វើនៅស្រុកអារញ្ញ ខេត្តស្រះកែវ បានប្រាប់វិទ្យុអាស៊ីសេរីថា គាត់ត្រូវបានប៉ូលិសខ្មែរ ផ្នែកអន្តោប្រវេសន៍យកប្រាក់ចំនួន ៨៥០បាត ក្នុងការចេញប័ណ្ណឆ្លងដែនពណ៌សមួយនេះ ។

ពលករខ្មែរឯទៀត ដែលបានចូលទៅធ្វើការនៅស្រុកអារញ្ញ កាប៊ីនបូរី ខេត្តស្រះកែវ និងនៅស្រុកផ្សេងៗទៀតក្នុងខេត្តប្រាជីនបូរី ដោយប្រើប័ណ្ណឆ្លងដែនពណ៌សប្រភេទនេះ បាននិយាយថា ពួកគេបានចំណាយប្រាក់ក្នុងម្នាក់ៗពី ៨០០ ទៅ ១៥០០បាត ឬពី ៨ម៉ឺន ទៅ ១៥ម៉ឺនរៀលសម្រាប់ជាថ្នូរនឹងការទទួលយកប័ណ្ណមួយនេះ ៖ «ប័ណ្ណអស់ ១៥ម៉ឺនលុយខ្មែរ ។ អស់ ១៤៥០បាត ធ្វើភ្លាមយកភ្លាម ឲ្យលុយគេទៅ គេនាំយើងទៅថត ដល់ពេលនេះគេចេញប័ណ្ណមក គេចែកលុយគ្នា ។ ប៉ូលិសគេធ្វើ ។ បើយើងថា ប្រញាប់អ៊ីចឹង គេទារ ១២០០ ឬក៏១៥០០អី ។ កន្លែងខ្មែរប៉ូលិសអ្នកយកលុយ ធ្វើភ្លាមយកភ្លាម» ។

ប័ណ្ណឆ្លងដែនពណ៌ស ដែលអាចប្រើបានរយៈពេល២ឆ្នាំ និងតម្រូវឲ្យពលករម្នាក់ចេញពីទឹកដីថៃ បានបោះត្រាចូលនិងចេញពីទឹកដីខ្មែរក្នុងរយៈពេល៧ថ្ងៃម្តងនេះ ចេញដោយសមត្ថកិច្ចអន្តោប្រវេសន៍ច្រកទ្វារអន្តរជាតិប៉ោយប៉ែត ដែលតាមអនុក្រឹត្យកំណត់ឲ្យបង់ប្រាក់ពី ២០.០០០ ទៅ ៣០.០០០រៀលក្នុងប័ណ្ណនីមួយៗ ហើយមិនតម្រូវឲ្យពលករបង់ប្រាក់ក្នុងការចេញចូលមកទទួលសេវាបោះត្រាពីសមត្ថកិច្ចប៉ូលិសច្រកទ្វារប្រចាំសប្តាហ៍នោះទេ ។

ប័ណ្ណនេះ ចុះហត្ថលេខាដោយអនុសេនីយ៍ឯក សៅ ប៊ុនរិទ្ធ មន្រ្តីអន្តោប្រវេសន៍នៃច្រកទ្វារអន្តរជាតិប៉ោយប៉ែត ។

វិទ្យុ អាស៊ីសេរី មិនអាចទាក់ទងលោក សៅ ប៊ុនរិទ្ធ បានទេ ប៉ុន្តែមន្ត្រីទទួលខុសត្រូវផ្នែកអន្តោប្រវេសន៍ច្រកទ្វារអន្តរជាតិប៉ោយប៉ែតលោក ឯម ថុន សុំមិនធ្វើអត្ថាធិប្បាយ ដោយលោកសុំឲ្យសួរទៅថ្នាក់លើ ។

អភិបាលរងខេត្តបន្ទាយមានជ័យ ដែលទទួលខុសត្រូវកិច្ចការច្រកទ្វារព្រំដែននានាក្នុងខេត្ត លោក សុខ សារ៉េត បានមានប្រសាសន៍ថា លោកនឹងពិនិត្យមើលរឿងនោះ និងថា ការអនុវត្តទាំងឡាយណា ដែលផ្ទុយពីការកំណត់ដោយច្បាប់ ព្រះរាជក្រឹត្យ ឬអនុក្រឹត្យ គឺជាការរំលោភច្បាប់ ៖ «កាលណាគេរកអ្វីដែលគ្មានច្បាប់ចែងនោះ គឺបុគ្គលគេយកទេ កុំបន្ទោសមករដ្ឋយើង ប៉ុន្តែយើងស្រាវជ្រាវទៀត បុគ្គលណាយក មូលហេតុអីគេយក ដែលលោកលើកឡើងមិញហ្នឹង» ។

រហូតមកទល់ពេលនេះ លំដាប់លេខរៀងអ្នកកាន់ប័ណ្ណឆ្លងដែនពណ៌សដែលចេញដោយសមត្ថកិច្ចប៉ូលិសអន្តោប្រវេសន៍ច្រកទ្វារប៉ោយប៉ែត ត្រូវបានគេមើលឃើញឡើងដល់ជាង ៥ម៉ឺននាក់ ហើយ ។

ប្រធានគម្រោងប្រឆាំងអំពើពុករលួយរបស់អង្គការ ផែក ឃែមបូឌា លោក សេក បរិសុទ្ធ ចាត់ទុកសកម្មភាពយកកម្រៃពីពលករក្នុងការចេញប័ណ្ណឆ្លងដែនហួសពីអត្រាកំណត់ដោយរដ្ឋ គឺជាអំពើពុករលួយ ដែលរដ្ឋាភិបាលនិងស្ថាប័នពាក់ពន្ធគប្បីប្រញាប់ប្រញាល់បោសសំអាត ប្រសិនបើការអះអាងរបស់ពលរដ្ឋទាំងនោះជាការពិត ។

តាមរបាយការណ៍ស្រាវជ្រាវរបស់ក្រុមហ៊ុនបរទេសឯករាជ្យដ៏ល្បីឈ្មោះមួយ ដែលឧបត្ថម្ភមូលនិធិដោយទីភ្នាក់ងារអភិវឌ្ឍន៍អន្តរជាតិរបស់សហរដ្ឋអាមេរិក (USAID) កាលពីពេលថ្មីៗនេះ ប្រទេសកម្ពុជាបាត់លុយទៅលើអំពើពុករលួយពីចន្លោះ ៣០០ ទៅ ៥០០លានដុល្លារសហរដ្ឋអាមេរិកក្នុងមួយឆ្នាំៗ ៕

បោះពុម្ព អ៊ីម៉េល