លោក អ៊ូច សៀករ៉ាន់ តំណាងក្រុមហ៊ុនមួយដែលជាដៃគូរបស់សហគមន៍អភិវឌ្ឍន៍កសិកម្មចម្រុះ បានមានប្រសាសន៍កាលពីរសៀលថ្ងៃព្រហស្បតិ៍ ទី៤ ខែកុម្ភៈ ថា ប៉ូលិសប៉ុស្តិ៍ថ្លាតបានចូលមកក្នុងសហគមន៍និងបានហៅកម្មករ ៧នាក់មកសាកសួរកាលពីព្រឹកថ្ងៃពុធ រួចហើយដកហូតយកអត្តសញ្ញាណប័ណ្ណទៅរក្សាទុកនៅប៉ុស្តិ៍ប៉ូលិស។
លោកបានចោទប្រកាន់ថា ទង្វើរបស់ប៉ូលិសនោះគឺទារយកប្រាក់ពីម្ចាស់អត្តសញ្ញាណប័ណ្ណ ៥ម៉ឺនរៀលក្នុងម្នាក់ៗ ៖ «ប៉ូលិសប៉ុស្តិ៍រដ្ឋបាលហ្នឹងចូលមកធ្វើកំណត់ហេតុមកស្នាក់នៅ ធ្វើជាងធ្វើអ្វីនៅសហគមន៍អ៊ីចឹង។ យកអត្តសញ្ញណប័ណ្ណ កត់លេខកត់អី រួចគាត់អត់ឲ្យវិញ គាត់ថា ចាំទៅផ្ទះវិញចាំយកអត្តសញ្ញាណប័ណ្ណ តែឲ្យបង់លុយម្នាក់ ៥ម៉ឺនរៀល»។
ក៏ប៉ុន្តែប្រធានប៉ុស្តិ៍នគរបាលប្រចាំឃុំថ្លាត លោក អុល រុន បានបដិសេធចោលចំពោះការចោទប្រកាន់ថា ប៉ូលិសរបស់លោកបានទារលុយជាថ្នូរនឹងការប្រគល់អត្តសញ្ញាណប័ណ្ណទៅវិញនោះ។
លោក អុល រុន បានទទួលស្គាល់ថា ប៉ូលិសរបស់លោកពិតជាបានអនុវត្តការដកហូតអត្តសញ្ញាណប័ណ្ណ ឬឯកសារផ្សេងៗរបស់អ្នកដែលមកស្នាក់នៅមែន ទៅតាមការណែនាំមួយដែលចេញពីអគ្គស្នងការនគរបាលជាតិ ដើម្បីឲ្យដឹងស្ថិតិអ្នកចេញចូលច្បាស់លាស់ប៉ុណ្ណោះ មិនបានទារលុយទេ។
លោក អុល រុន បានបញ្ជាក់ថា ៖ «ជនណាម្នាក់មកពីខេត្តផ្សេងៗនៃព្រះរាជាណាចក្រកម្ពុជាគឺថា យើងចុះបញ្ជីស្នាក់នៅក៨។ បើមានឯកសារតម្កល់ជាប់នឹងខ្លួន សៀវភៅគ្រួសារ ឬអត្តសញ្ញាណប័ណ្ណអី សុំគាត់មកតម្កល់ទុក ហើយយើងចេញលិខិតបង្កាន់ដៃមួយ ក៩ ឲ្យទៅគាត់ គាត់វិលត្រឡប់ទៅវិញ យកបង្កាន់ដៃក៩នោះមកដូរយកកំណត់ហេតុតម្កល់ទុក»។
មន្ត្រីនគរបាលបានឲ្យដឹងថា គេទើបតែសាកល្បងអនុវត្តបែបនេះជាលើកដំបូង។
លោក ខៀវ សុភ័គ អ្នកនាំពាក្យក្រសួងមហាផ្ទៃនៃប្រទេសកម្ពុជា បានច្រានចោលទង្វើរបស់ប៉ូលិសបែបនោះថា មិនត្រឹមត្រូវទេ។ លោក ខៀវ សុភ័គ បានមានប្រសាសន៍ថា ប្រទេសកម្ពុជាបច្ចុប្បន្នបានធានាលើសិទ្ធិសេរីភាពនៃការធ្វើដំណើរ ហើយអ្នកដំណើរដែលទៅស្នាក់នៅកន្លែងណាមួយគឺគ្រាន់តែជូនដំណឹងទៅអាជ្ញាធរភូមិឃុំជាការគួរសម។
លោក ខៀវ សុភ័គ បានអះអាងថា ៖ «អត់មានត្រូវជូនដំណឹងដូចជា ៣មិន ១រាយការណ៍ អីទៀតទេឥឡូវនេះ ពីព្រោះស្រុកយើងគឺការធ្វើដំណើរ ការរស់នៅអី គឺត្រូវបានធានាដោយច្បាប់ហើយ។ អ្វីដែលយើងសុំឲ្យអ្នកចំណូលថ្មីហ្នឹងជម្រាបភូមិឃុំគេដឹងឮ អាហ្នឹងជារឿងធម្មតាទេ មិនមែនតែប្រទេសខ្មែរយើងទេ តែរហូតដល់ថា ឲ្យដកប៉ាស្ព័រ ឲ្យដកលិខិតធ្វើដំណើរអីអត់មានណែនាំអ៊ីចឹងទេ»។
មន្ត្រីក្រសួងមហាផ្ទៃបានមានប្រសាសន៍ថា ប៉ូលិសអាចធ្វើការសាកសួរសុំឈ្មោះតិចតួចដើម្បីសន្តិសុខ ក៏ប៉ុន្តែមិនមានបញ្ជាណាឲ្យដកហូតឯកសារអ្នកដំណើរទេ៕