លោក ស៊ុម ចាន់គា មន្ត្រីសម្របសម្រួលនៃសមាគមការពារសិទ្ធិមនុស្ស អាដហុក ប្រចាំខេត្តបន្ទាយមានជ័យ ថ្លែងកាលពីថ្ងៃសៅរ៏ថា លោក ជិត លីឡាយ អាយុ ៤០ឆ្នាំ ត្រូវជាឪពុកបង្កើតជនរងគ្រោះ ត្រូវបាននគរបាល ហៅទៅកាន់អធិការដ្ឋាននគរបាលស្រុកអូរជ្រៅ សម្រុះសម្រួលឲ្យលុយ ២ម៉ឺនបាត ជំនួសជីវិតកូនប្រុសដែលត្រូវបានគេសម្លាប់។
លោក ស៊ុម ចាន់គា មានប្រសាសន៍ដូច្នេះថា ៖ «យើងខាងសមាគមអាដហុក កំពុងមានការព្រួយបារម្ភយ៉ាងខ្លាំង ដែលការកើតឡើងហ្នឹង ក្រោយពីការស្បត់ចូលកាន់តំណែងជាមន្រ្តីប៉ូលិសយុត្តិធម៌ ហើយក៏នៅតែធ្វើរបៀបអ៊ីចឹងទៀត ដែលពាក់ព័ន្ធទៅលើការដែលខ្លួនជាមន្រ្តីយុត្តិធម៌ រកយុត្តិធម៌ជូនជនរងគ្រោះ»។
លោក ជិត លីឡាយ រស់នៅឃុំប៉ោយប៉ែត ស្រុកអូរជ្រៅ ខេត្តបន្ទាយមានជ័យ បានថ្លែងថា នៅវេលាម៉ោង៤ទៀបភ្លឺ ថ្ងៃទី២២ ខែតុលា កូនប្រុស អាយុ ១២ឆ្នាំ បានសុំទៅបទជើងក្រៅផ្ទះ ហើយបានបាត់ខ្លួន រហូតដល់ម៉ោង ២រសៀល ទើបរកឃើញសពកូនដែលគេយកប្លុងចោលក្នុងវត្តប៉ាលិលេយ្យ។
លោកបានបន្តថា កូនប្រុសលោកត្រូវបានស្លាប់ ដោយការកាច់បំបាក់ក ប្រព្រឹត្តដោយជនសង្ស័យ ឈ្មោះ ផល ជាមេការនៅផ្ទះរបស់ឈ្មោះ លឹម ឃាង ស្ថិតក្នុងភូមិក្បាលស្ពាន ឃុំប៉ោយប៉ែត ប៉ុន្តែខាងភាគីម្ចាស់ផ្ទះអះអាងថា ស្លាប់ដោយសារការឆក់នឹងខ្សែភ្លើងនៅពេលជនរងគ្រោះ មានបំណងចូលទៅលួចអីវ៉ាន់នៅទីនោះ។
លោក លី ឡាយ បានបន្តថា ក្រោយពីបូជាសពកូនរួច លោកត្រូវបាននគរបាលហៅឲ្យទៅយកលុយ ២ម៉ឺនបាត នៅអធិការដ្ឋាននគរបាលស្រុកអូរជ្រៅ ដោយមានកិច្ចសន្យាមិនឲ្យប្តឹងផ្តល់និងថតរូបកាន់លុយទុកជាភស្តុតាង។
លោក លី ឡាយ មានប្រសាសន៍ថា ៖ «ប៉ូលិសគេហៅគេថា ខ្មោចហ្នឹងស្លាប់ហើយ គេសួរថា យើងយកលុយប៉ុន្មាន គេឲ្យខ្ញុំអានក្រដាស ៦សន្លឹកហើយ ឲ្យលុយ ២ម៉ឺនបាតហើយថត។ ថតដាក់លុយឲ្យកាន់ អក្សរកិច្ចសន្យាគេថា មិនអាចតវ៉ាទៀតបានទេ»។
លោក អ៊ឹង សុងយូ អធិការនគរបាលស្រុកអូរជ្រៅ បានថ្លែងថា លោកពុំបានដឹងពីករណីនេះទេ ប៉ុន្តែបញ្ជាក់ថា៖ «បាទ! អ្វីដែលមានបណ្តឹងប៉ូលិសត្រូវតែធ្វើ ត្រូវតែអនុវត្ត។ ចាំមើលខ្ញុំទៅពីភ្នំពេញ ពីព្រោះខ្ញុំផ្ទេរសិទ្ធិទៅឲ្យ សុន សាវុធ»។
លោក សុន សាវុធ អធិការនគរបាលស្រុកអូរជ្រៅ បានច្រានចោលការចោទប្រកាន់នេះ ប៉ុន្តែថា លុយ២ម៉ឺននោះគឺម្ចាស់ផ្ទះឲ្យទៅឪពុកជនរងគ្រោះដើម្បីធ្វើបុណ្យសព។
លោក សុន សាវុធ មានប្រសាសន៍ថា ៖ «រឿងហ្នឹង មិនមែនប៉ូលិសអ្នកសម្របសម្រួលទេ ធម្មតាទេ កាលណាគាត់សុំគេ កាលណាគេប្រគល់ឲ្យអាហ្នឹងគេនេះហើយ ប៉ុន្តែកិច្ចសន្យាយ៉ាងម៉េចៗ អាហ្នឹងដូចអត់មានទេ»។
លោកបន្តថា ប៉ូលិសកំពុងធ្វើការស្រាវជ្រាវតាមចាប់ជនល្មើស ដែលកំពុងគេចខ្លួន។ទោះបីយ៉ាងនេះក្តី មន្ត្រីសមាគមការពារសិទ្ធិមនុស្សស្នើឲ្យនគរបាលអនុវត្តច្បាប់ឲ្យមានប្រសិទ្ធភាព ហើយមិនអនុញ្ញាតឲ្យជនល្មើសនៅក្រៅសំណាញ់ច្បាប់នោះទេ៕