ផ្ទុយទៅវិញ អ្នកដឹកនាំ និងមន្ត្រីគណបក្សកាន់អំណាច បានប្រើសម្ភារៈរបស់រដ្ឋ និងឆ្លៀតឃោសនា ក្នុងពេលប្រារព្ធពិធីផ្លូវការផ្សេងៗ ដោយស្រួលមិនមានការរំខានពីអាជ្ញាធរមូលដ្ឋានឡើយ។
ការជួបជុំនានា របស់គណបក្សនយោបាយពុំកាន់អំណាច តែងតែមានការរឹតត្បិត និងសួររកលិខិតស្នាមនានា។ រឿងនេះ បានកើតមានជាច្រើនលើក ដោយមិនមានដំណោះស្រាយណាមួយជាក់លាក់ឡើយ ហើយមានពេលខ្លះ ការជួបជុំនោះមិនអាចធ្វើទៅបាន ត្រូវរំសាយ ឬមានពេលខ្លះ មានការជជែកតវ៉ាតឹងតែង ទើបបានដំណើរការប្រជុំទៅបាន។
លោក មាន សារិទ្ធ ប្រធានសាខាគណបក្ស សម រង្ស៊ី ប្រចាំក្រុងប៉ោយប៉ែត ខេត្តបន្ទាយមានជ័យ មានប្រសាសន៍ នៅថ្ងៃទី ៩ ឧសភាថា គណបក្ស សម រង្ស៊ី បានរៀបចំការជួបជុំអ្នកតំណាងរាស្ត្រជាមួយប្រជាពលរដ្ឋ ជាសមាជិកគណបក្ស នៅសង្កាត់ចំនួន ៣ នៅក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី ៨ ឧសភាកន្លងទៅ។
ការជួបជុំនោះ បានប្រព្រឹត្តទៅ ដោយមានការលំបាក មានការរំខានពីអាជ្ញាធរជាប៉ូលិស នៅក្រុងប៉ោយប៉ែត។ លោក មាន សារិទ្ធ មានប្រសាសន៍ថា សកម្មភាពរំខាននោះ មានដូចជា អាជ្ញាធរទាររកសំបុត្រអនុញ្ញាតឲ្យមានការប្រជុំ ការទាមទារឲ្យរើរោងប្រជុំ ចេញពីផ្លូវដើរជាដើម។
លោក មាន សារិទ្ធ បានចាត់ទុកថា ជាការរករឿង ទារសំបុត្រស្នាមអីជាដើមនោះ ធ្វើឲ្យអ្នកចូលរួមប្រជុំមានការភ័យខ្លាច ហើយវិលត្រឡប់ទៅផ្ទះវិញ។
លោក មាន សារិទ្ធ បានអំពាវនាវឲ្យអាជ្ញាធរប្រកាន់ភាពអព្យាក្រឹតក្នុងពេលបំពេញមុខងាររដ្ឋបាលសាធារណៈកុំប្រកាន់គណបក្សនយោបាយ ដើម្បីឲ្យគណបក្សនយោបាយនៅកម្ពុជា បានធ្វើសកម្មភាពបានដូចៗ គ្នា ដើម្បីឈានទៅរកការបោះឆ្នោតមួយ ដែលមានភាពសេរី និងយុត្តិធម៌។
ឆ្លើយតបការចោទប្រកាន់របស់លោក មាន សារិទ្ធ តំណាងគណបក្ស សម រង្ស៊ី នៅក្រុងប៉ោយប៉ែតនេះ លោក អ៊ុំ សុផល អធិការប៉ូលិសក្រុងប៉ោយប៉ែត មានប្រសាសន៍ថា ការជួបប្រជុំណាមួយ ត្រូវតែមានច្បាប់ ដើម្បីអាជ្ញាធរចាត់កម្លាំងទៅការពារ ហើយអាជ្ញាធរមិនបានការពារគណបក្សនយោបាយណាមួយដោយឡែកជាពិសេសនោះទេ។
ផ្ទុយទៅវិញ លោក អ៊ុំ សុផល បានចោទប្រកាន់ថា លោក មាន សារិទ្ធ ចេះតែរករឿងចោទប្រកាន់អាជ្ញាធរមានសមត្ថកិច្ច ដោយមិនត្រឹមត្រូវទៅវិញ។
ករណីអាជ្ញាធររំខានការជួបសំណេះសំណាល រវាងអ្នកដឹកនាំគណបក្សមិនកាន់អំណាចជាមួយ សមាជិកខ្លួននោះ លោក ប៉ុល ហំម អ្នកនាំពាក្យគណបក្ស សិទ្ធិមនុស្ស បានទទួលស្គាល់ថា គណបក្សលោក បានជួបប្រទះជាញឹកញយដែរ។ ប៉ុន្តែ មានកន្លែងខ្លះ ក៏ស្រួលកន្លែងខ្លះក៏លំបាកដែរ។
លោក ប៉ុល ហំម បានកត់សម្គាល់ឃើញថា មុនការបោះឆ្នោត រើសសមាជិកក្រុមប្រឹក្សាឃុំ សង្កាត់ ឆ្នាំ ២០១២ នេះ គណបក្សនយោបាយនានា មានសកម្មភាពជាច្រើន។ ចំពោះគណបក្សកាន់អំណាច លោកកត់សម្គាល់ឃើញថា មានការប្រជុំចែកអំណោយ ដែលពីមុន មិនមានសកម្មភាពបែបនេះ។
ចំពោះវិធានការដោះស្រាយរឿងអាជ្ញាធររំខាន ក្នុងពេលថ្នាក់ដឹកនាំគណបក្សជួបជាមួយសមាជិកនេះ លោក ប៉ុល ហំម បានឲ្យដឹងថា មិនអាចប្ដឹងទៅអាជ្ញាធរថ្នាក់លើប្ដឹងទៅតុលាការប្ដឹងទៅគណៈកម្មាធិការជាតិរៀបចំការបោះឆ្នោតអីឡើយ ពីព្រោះស្ថាប័នទាំងនោះ មិនអាចផ្ដល់ ការដោះស្រាយរឿងនេះ បានត្រឹមត្រូវទេ ហើយមានពេលខ្លះការប្ដឹងនោះ ចំណាយពេលវេលា និងលុយកាក់អត់ប្រយោជន៍ទៀតផង។
លោក ប៉ុល ហំម បានឲ្យដឹងថា វិធីមានតែមួយទេ គឺបើមានការរំខានពីសំណាក់អាជ្ញាធរ មានតែផ្ដល់ព័ត៌មាននេះឲ្យប្រព័ន្ធសារព័ត៌មាន ឲ្យអង្គការមិនមែនរដ្ឋាភិបាលជាតិ និងអន្តរជាតិ និងផ្ដល់ព័ត៌មាននេះ ដល់ស្ថានទូតនានា នៅកម្ពុជា ឲ្យគេបានដឹងថា មានអំពើមិនត្រឹមត្រូវ ការរំលោភរបស់អាជ្ញាធរមកលើប្រជាពលរដ្ឋ និងគណបក្សនយោបាយតែប៉ុណ្ណោះ។
លោក ប៊ុន រ៉ាដូ ប្រធានក្រុមការងារបោះឆ្នោតរបស់គណបក្ស នរោត្តម រណឫទ្ធិ បានឲ្យដឹងថា ការរំខានពីអាជ្ញាធរនេះ គណបក្សលោកបានជួបប្រទះដែរ តែលោកសុំមិនធ្វើអត្ថាធិប្បាយច្រើនទេ។
វិទ្យុអាស៊ីសេរី មិនអាចទាក់ទងអ្នកនាំពាក្យគណបក្សប្រជាជន ដើម្បីសុំការពន្យល់ និងបកស្រាយអំពីការចោទប្រកាន់នានា លើគណបក្សប្រជាជនកម្ពុជាបានទេ នៅថ្ងៃទី ៩ ឧសភា។
នៅក្នុងការបោះឆ្នោតរើសសមាជិកក្រុមប្រឹក្សា ឃុំ សង្កាត់ នៅថ្ងៃទី ៣ មិថុនា ខាងមុខនេះ មានគណបក្សនយោបាយចំនួន ១០ ចូលរួម។ ដោយសារការបោះឆ្នោតកាន់តែខិតជិតមកដល់ បានជាគណបក្សនយោបាយនានា ធ្វើសកម្មភាពជួបប្រជុំ រវាងអ្នកដឹកនាំគណបក្ស ជាមួយសមាជិក និងអ្នកគាំទ្រ។ ការជួបប្រជុំខ្លះក៏បានប្រព្រឹត្តទៅដោយមិនមានបញ្ហា។ ប៉ុន្តែ ការជួបប្រជុំខ្លះ ក៏ជួបបញ្ហាទាររកសំបុត្រស្នាម ពីអាជ្ញាធរមានសមត្ថកិច្ច ដែលធ្វើឲ្យកិច្ចប្រជុំនោះ មានការរអាក់រអួលខ្លះៗ ជាមិនខាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។