អ្នកឃ្លាំមើលបញ្ហាសង្គមអះអាងថា អំពើហិង្សារបស់មន្ត្រីថ្នាក់មូលដ្ឋាន បានបង្ហាញនូវគំរូមិនល្អមួយ នឹងជាឧបសគ្គរាំងស្ទះក្នុងការជំរុញ និងលុបបំបាត់អំពើហិង្សាក្នុងមូលដ្ឋានភូមិឃុំមានសុវត្ថិភាព។
អំពើហិង្សានៅតែមានឥទ្ធិពល ជំរុញឲ្យប្រជាពលរដ្ឋសាមញ្ញរហូតដល់មន្ត្រីចេះដឹង ដឹកនាំក្នុងការអនុវត្តច្បាប់ បាត់បង់ការគ្រប់គ្រងអារម្មណ៍របស់ខ្លួន បណ្ដាលឲ្យកើតមានអំពើប្រទូសរ៉ាយ ឈានដល់ការវាយសម្លាប់គ្នាទៀតផង។
ជាក់ស្ដែងកាលពីថ្ងៃទី២ ខែសីហា ជម្លោះរវាងមន្ត្រីគណបក្សប្រជាជនកម្ពុជា និងមន្ត្រីគណបក្សសិទ្ធិមនុស្ស បណ្ដាលឲ្យជំទប់ទី២ គណបក្សសិទ្ធិមនុស្ស បានប្រើអំពើហិង្សា វាយដំទៅលើជំនួយការឃុំរបស់គណបក្សប្រជាជនកម្ពុជារហូតដល់ស្លាប់ ដោយផ្ដើមចេញពីការមិនយោគយល់គ្នាក្នុងការងារ។
ករណីនេះ បានបន្សល់ទុកនូវក្ដីសោកសង្រេងដល់ក្រុមគ្រួសារជនរងគ្រោះ និងកូនកំព្រាចំនួន ៥ នាក់។
លោក ខ្វើ លី អាយុ ៦៧ ឆ្នាំ ជាឪពុករបស់ជនរងគ្រោះឈ្មោះ លី ម៉ៅ រស់នៅភូមិព្រៃផ្ដៅ ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ បានថ្លែងថា លោកសុំឲ្យសមត្ថកិច្ចរកយុត្តិធម៌ដល់គ្រួសារគាត់ ដោយផ្ដន្ទាទោសដល់ជន ដែលប្រើអំពើហិង្សាវាយសម្លាប់កូនប្រុសរបស់គាត់នេះ។
លោក ខ្វើ លី៖ «ខ្ញុំត្រូវតែប្ដឹងហើយ។ ខ្ញុំទារសំណង ដែលខ្ញុំកំហឹងកូនខ្ញុំដែលខ្ញុំខំចិញ្ចឹមតាំងពីអាយុក្នុងពោះ ៩ ខែរហូតបានចៅដល់ ៥ សងជំងឺចិត្តឲ្យជួយចិញ្ចឹមចៅខ្ញុំ។ ខ្ញុំអត់មាននរណាថា កូនខ្ញុំវាល្មើស ឬក៏ក្បត់ជាតិ អ៊ីចឹងៗ ទេ ស្លូតណាស់គេវាយកម្រិតណាចេះតែទ្រដៃ គេឃើញគ្រប់គ្នា សួរអ្នកភូមិត្រពាំងជោទាំងអស់ចុះ»។
កាលពីថ្ងៃព្រហស្បតិ៍ ទី២ ខែសីហា សមត្ថកិច្ចស្រុកឱរ៉ាល់ ខេត្តកំពង់ស្ពឺ បានចាប់ខ្លួន លោក សូត្រ ចន្ថា ជាជំទប់ទី២ឃុំត្រពាំងជោ របស់គណបក្សសិទ្ធិមនុស្សដែលទើបជាប់ឆ្នោតថ្មី ថាបានវាយទៅលើលោក លី ម៉ៅ ជំនួយការឃុំត្រពាំងជោ ជាច្រើនដៃ និងអុកជង្គង់ត្រូវចំចុងដង្ហើមនិងដើមទ្រូង បណ្ដាលឲ្យស្លាប់ភ្លាមៗ ក្នុងពេលសម្រាកថ្ងៃត្រង់។
ហេតុការណ៍នេះបានកើតឡើង បន្ទាប់ប្រជុំនៅសាលាស្រុកអំពីការងារដែលត្រូវបម្រើប្រជាជនក្នុងឃុំនីមួយៗ នៅក្នុងសាលាស្រុកឱរ៉ាល់។ ហើយការវាយប្រហារនេះ គឺដោយសារជម្លោះផ្ដើមចេញពីការទាស់ទែងពាក្យសំដីគ្នាយ៉ាងតឹងសរសៃក ពីរឿងធ្វើអត្រានុកូលដ្ឋាន។
មេភូមិចាន់ពីង លោក ហួន វន បានឲ្យដឹងថា កាលពីពេលថ្មីៗនេះ លោកធ្លាប់ទទួលព័ត៌មានពីពលរដ្ឋក្នុងភូមិរបស់គាត់ថា លោក សូត្រ ចន្ថា ជាជំទប់ទី២ឃុំត្រពាំងជោ បានទារលុយពីពលរដ្ឋដោយគ្រាន់តែកែឬលុបអត្រានុកូលដ្ឋាន។ ករណីនេះ ជំទប់ឃុំរូបនោះ ធ្លាប់មានការប៉ះសំដីគ្នាជាមួយជនរងគ្រោះដែលមិនចង់ឲ្យទារលុយពីពលរដ្ឋ។ លោកថា ការសម្លាប់នេះ គឺអាចដោយសារការគុំកួនគ្នា។
លោក ហួន វន៖ «ខាងអ្នកបង្កបញ្ហាហ្នឹង គាត់យកលុយពីប្រជាពលរដ្ឋកែអត្រានុកូលដ្ឋានដូចថា យើងខុសឆ្នាំកំណើតអីចឹងណា កែឲ្យត្រូវជាមួយសៀវភៅគ្រួសារ ហើយគាត់ពិន័យប្រជាពលរដ្ឋក្នុងភូមិខ្ញុំហ្នឹង កែមួយសន្លឹកយក១ម៉ឺនគាត់ថាគាត់សហការជាមួយ អ្នករងគ្រោះយកលុយពីប្រជាពលរដ្ឋដល់អ៊ីចឹងអ្នករងគ្រោះគាត់ថា បងឯងធ្វើអ៊ីចឹងប្រយ័ត្នមានរឿងព្រោះអីយើងយកលុយប្រជាពលរដ្ឋច្រើនៗ អ៊ីចឹងវានាំមានរឿងទេ»។
យ៉ាងណាក៏ដោយ ស្ត្រីឈ្មោះ មើល កាម ភរិយាជនរងគ្រោះ គឺលោក លី ម៉ៅ និយាយថាគាត់ក៏មិនបានដឹងពីមូលហេតុដែលបង្កឲ្យមានការវាយសម្លាប់គ្នាយ៉ាងនេះដែរ។ គាត់ថា ជំទប់ទី២ឃុំនោះ រស់នៅផ្ទះជាប់គ្នានិងផ្ទះគាត់តែម្ដង ការវាយសម្លាប់ប្ដីគាត់អាចដោយសារការប្រកាន់ថាគណបក្សនយោបាយពីរផ្សេងគ្នា។
សំឡេង៣៖ «ដូចថាគេប្រកាន់គណបក្សណា ហើយអ្នកសម្លាប់គ្រួសារខ្ញុំហ្នឹងគេគណបក្សសិទ្ធិមនុស្ស ហើយដល់គ្រួសារខ្ញុំហ្នឹងគណបក្សប្រជាជន។ មិនដឹងថ្ងៃទីប៉ុន្មានខ្ញុំអត់បានចាប់អារម្មណ៍ខ្ញុំលឺជជែកគ្នានៅសាលាឃុំហ្នឹង ប្ដីខ្ញុំហើយអ្នកវាយហ្នឹង ខ្ញុំប្រាប់កូនដែរថាទៅប្រាប់ប៉ាហ្អែងទៅកុំឲ្យឈ្មោះជាមួយគេខ្លាចគេវាយ។ គណបក្សសិទ្ធិមនុស្សអ្នកវាយគេហ្នឹងគេប្រកាន់ថាគេជាមេចឹងណា គេជាប់ជំទប់ទី២នោះ ហើយប្ដីខ្ញុំគ្រាន់ថារងគេអាងថាគេហ្នឹងមេតែប្ដីខ្ញុំធ្វើការយូរហើយ»។
ជនសង្ស័យឈ្មោះ លោក សូត្រ ចន្ថា ជាជំទប់ទី២ឃុំត្រពាំងជោ ត្រូវបានគេបញ្ជូនទៅឃុំខ្លួនបណ្ដោះអាសន្ននៅពន្ធនាគារខេត្តកំពង់ស្ពឺ រង់ចាំការកាត់ក្ដី។
ស្នងការខេត្តកំពង់ស្ពឺ លោក កែវ ពិសី បដិសេធមិនអត្ថាធិប្បាយទេ នៅថ្ងៃសៅរ៍ ទី៤ ខែសីហា ដោយអះអាងថាជាប់រវល់។
ប៉ុន្តែប្រធានគណបក្សសិទ្ធិមនុស្សប្រចាំខេត្តកំពង់ស្ពឺ លោក យិន យឿន ថ្លែងថា តុលាការខេត្តនៅថ្ងៃសៅរ៍ ទី៤ សីហា បានបញ្ជូនជនសង្ស័យ ឈ្មោះ សូត្រ ចន្ថា មកសាកសួរ។
ចំណែកមេឃុំត្រពាំងជោ លោក ទេព ណែម បានថ្លែងថា នេះគឺជារឿងដែលមិនគួរឲ្យកើតឡើងទេ។ លោកសោកស្ដាយចំពោះមន្ត្រីក្រោមឱវាទរបស់លោកទាំង២នាក់នោះណាស់។
ពាក់ព័ន្ធបញ្ហានេះ លោក យ៉ែម បុញ្ញឫទ្ធិ អគ្គលេខាធិការគណបក្សសិទ្ធិមនុស្ស មានប្រសាសន៍ថា កំហុសវាយតប់រវាងជំទប់ទី២ គណបក្សសិទ្ធិមនុស្ស ឃុំត្រពាំងជោ មិនប៉ះពាល់ប្រជាប្រិយភាព របស់គណបក្សនយោបាយរបស់លោកនោះទេ ព្រោះជារឿងទំនាស់បុគ្គល។ លោកថា នេះជារឿងមួយដែលគួរឲ្យសោកស្ដាយ។ គណបក្សសិទ្ធិមនុស្សប្រកាន់គោលការណ៍យកអហិង្សាជាធំ ហើយបញ្ហានេះ គឺជាការខ្វះចន្លោះរបស់មន្ត្រីថ្នាក់មូលដ្ឋានដែលជ្រើសរើសបុគ្គលនេះ មកឈរឈ្មោះក្នុងគណបក្សសិទ្ធិមនុស្ស។
លោក យ៉ែម បុញ្ញឫទ្ធិ៖ «ជាគោលការណ៍យើងចង់ឲ្យមានមនុស្ស ដែលមានបុគ្គលិកលក្ខណៈចរិតសីលធម៌ខ្ពស់ ហើយនិងមានការទទួលខុសត្រូវនៅថ្នាក់មូលដ្ឋាន។ គាត់ប្រហែលជានៅមានការខ្វះចន្លោះខ្លះ។ យើងអនុវត្តផែនការរបស់យើងបន្តទៅទៀត ពីព្រោះផែនការរបស់យើងដែលពង្រឹងសមត្ថភាព និងពង្រឹងពីគោលនយោបាយនៃការដឹកនាំនោះ យើងបន្តសកម្មភាពហ្នឹងតទៅទៀត។ យើងសង្កត់ធ្ងន់ពីរឿងបុគ្គលិកលក្ខណៈ និងចរិតសីលធម៌»។
អ្នកឃ្លាំមើលបញ្ហាសង្គមអះអាងថា អំពើហិង្សារបស់មន្ត្រីថ្នាក់មូលដ្ឋានដូច្នេះ បានបង្ហាញនូវគំរូមិនល្អមួយ នឹងជាឧបសគ្គរាំងស្ទះក្នុងការជំរុញ និងលុបបំបាត់អំពើហិង្សាក្នុងមូលដ្ឋានភូមិឃុំមានសុវត្ថិភាព។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មានមតិថា ករណីប្រើហិង្សាវាយសម្លាប់គ្នានេះ គឺជារូបភាពនៃការរើសអើងខាងនយោបាយ និងការប្រកាន់និន្នាការគណបក្សធ្វើការមិនចុះសម្រុងគ្នា ដែលធ្វើឲ្យមានការធ្លាក់ចុះក្នុងអភិវឌ្ឍន៍ប្រទេស។
លោក យង់ គិមអេង៖ «សំខាន់បំផុត នៅថ្នាក់លើហ្នឹងគាត់ចេះសម្របសម្រួលគ្នា បង្ហាញឲ្យឃើញថា បក្សនយោបាយបន្ទាប់ពីបោះឆ្នោតទៅ នៅថ្នាក់លើនេះ ចេះធ្វើការជាមួយគ្នា ចេះយោគយល់អធ្យាស្រ័យគ្នាខ្ពស់។ អ៊ីចឹងទៅដល់ថ្នាក់ក្រោមហ្នឹង ក៏អាចគាត់មើលមកថ្នាក់លើគាត់ដែរ អាចហ្នឹងមានការអធ្យាស្រ័យគ្នាខ្ពស់ដែរ»។
សង្គមស៊ីវិលធ្វើការក្នុងវិស័យអភិវឌ្ឍន៍មូលដ្ឋាន បានផ្ដល់អនុសាសន៍ថា មន្ត្រីសាធារណៈមិនគួរប្រើហិង្សានោះទេ តែត្រូវតែដាក់ចិត្តធ្វើការបម្រើប្រជាពលរដ្ឋ ដែលគប្បីធ្វើការរួមគ្នា យោគយល់គ្នា សាមគ្គីគ្នា ដើម្បីដោះស្រាយបញ្ហានៅក្នុងភូមិឃុំ និងដើម្បីឈានទៅរកការរីកចម្រើនរួម ដែលនេះទើបជាក្ដីសង្ឃឹមដល់ប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។