ក្រសួងកសិកម្ម រុក្ខាប្រមាញ់និងនេសាទនៃប្រទេសកម្ពុជា នៅថៃ្ងអង្គារ ទី២ ខែមីនានេះ បានប្រកាសជាផ្លូវការឲ្យដឹងថា ក្រសួងបានកំណត់ដាក់ភូមិប្រទ្បាយមាស ឃុំរមេញ ស្រុកកោះអណ្តែត ខេត្តតាកែវ ជាតំបន់ហាមឃាត់តឹងរ៉ឹងមួយ មិនឲ្យមានការចិញ្ចឹមនិងចរាចរណ៍បក្សីគ្រប់ប្រភេទឆ្លងកាត់ ដោយសារតែតំបន់នោះមានផ្ទុះជំងឺផ្តាសាយបក្សីបង្កទ្បើងដោយមេរោគ H5N1។
ឯកសារថតចម្លងដែលវិទ្យុអាស៊ីសេរីទទួលបាននៅថ្ងៃអង្គារនេះ បាននិយាយថា បំផ្លាញចោលចំពោះបក្សីគ្រប់ប្រភេទនៅក្នុងតំបន់ផ្ទុះជំងឺទៅតាមវិធាននិងបចេ្ចកទេសបសុពេទ្យ។ ផ្អាកជាបណ្តោះអាសន្នលើការទិញ លក់ ឬការដឹកជញ្ជូនចំពោះបក្សីគ្រប់ប្រភេទ ឬឆ្លងកាត់ក្នុងរង្វង់ដែលមានកាំប្រវែង៥គីឡូម៉ែត្រពីចំណុចផ្ចិតនៃតំបន់ផ្ទុះជំងឺ។ តំបន់នេះជាតំបន់ការពារតាមដាននិងសិក្សាស្រាវជ្រាវប្រភពជំងឺផ្តាសាយបក្សីក្នុងរយៈពេល៣០ថៃ្ង និងពិនិត្យមើលចលនាបក្សីជាប្រចាំក្នុងរង្វង់ដែលមានកាំប្រវែង១០គីឡូម៉ែត្រពីចំណុចផ្ចិតនៃតំបន់ផ្ទុះជំងឺ។
សេចក្តីប្រកាសនោះបានបញ្ជាក់ថា ការចិញ្ចឹមបក្សីគ្រប់ប្រភេទនៅក្នុងតំបន់ជំងឺផ្តាសាយបក្សីនោះ ត្រូវបានហាមឃាត់រហូតដល់មានការប្រកាសជាថ្មី។
លោក ញឹប ស្រន់ ជាប្រធានមន្ទីរកសិកម្មខេត្តតាកែវ បានមានប្រសាសន៍ប្រាប់វិទ្យុអាស៊ីសេរីថា ៖ «ប្រកាសហ្នឹងអត់ទាន់ធ្លាក់មកដល់មន្ទីរផង»។
សុខ សេរី ៖ ក្រៅពីហាមឃាត់មិនឲ្យចរាចរបក្សាបក្សី តើមនុស្សយើងអាចដើរឆ្លងកាត់បានទេ? ញឹប ស្រន់ ៖ បញ្ហានេះយើងហាមឃាត់តែចលនាបក្សីទេ ឯចំពោះមនុស្សមិនមានបញ្ហាអីទេ គេអាចចរាចរអីបានធម្មតា។ សុខ សេរី ៖ នៅពេលដែលលោកបានទទួលសេចក្ដីប្រកាសព័ត៌មាននេះជាផ្លូវការ តើលោកនឹងជម្រាបទៅខាងម្ចាស់កសិដ្ឋានទេ? ញឹប ស្រន់ ៖ កាលណាយើងទទួលបានប្រកាសហ្នឹង គឺយើងនឹងប្រកាសជូនទៅដល់អាជ្ញាធរមូលដ្ឋាន និងដល់ប្រជាកសិករនៅតំបន់ហ្នឹងដើម្បីឲ្យគាត់យល់ដឹង។
សុខ សេរី ៖ ចំពោះការចិញ្ចឹមសត្វទាសត្វមាន់នៅតំបន់ហាមឃាត់ហ្នឹង តើលោកនឹងតម្រូវឲ្យមានការសម្លាប់សត្វទាំងនោះចោលទេ? ញឹប ស្រន់ ៖ ចំពោះមាន់ទាដែលកើតជំងឺអាហ្នឹងយើងតម្រូវថា ធ្វើយ៉ាងណាដើម្បីសម្លាប់ កប់ ឬដុតកម្ទេចចោល។ មាន់ទាដែលអត់មានផ្ទុកជំងឺអីទេ គឺគេអាចចិញ្ចឹមធម្មតា តែយើងមិនឲ្យធ្វើចលនាទៅតំបន់ដទៃទៀត។
ទាក់ទងនឹងវិធានការរបស់ក្រសួងកសិកម្ម រុក្ខាប្រមាញ់និងនេសាទខាងលើនេះ មន្រ្តីនៃអង្គការសុខភាពពិភពលោក (WHO) នៅក្នុងប្រទេសកម្ពុជា បានមានប្រសាសន៍ថា នោះជាទម្រង់នៃនីតិវិធីបទដ្ឋានសមរម្យមួយ ប៉ុន្តែលោកស្រីសុំមិនធ្វើអត្ថាធិប្បាយច្រើនជាងនេះទេ ដោយសារតែមិនទាន់បានទទួលព័ត៌មានជាពិស្តារនៅទ្បើយអំពីវិធានការនេះ។
កាលពីដើមខែកុម្ភៈកន្លងទៅថ្មីៗនេះ មន្រ្តីជំនាញបសុពេទ្យនៃក្រសួងកសិកម្ម រុក្ខាប្រមាញ់និងនេសាទនៃប្រទេសកម្ពុជា បានរកឃើញថា មានការផ្ទុះជំងឺផ្តាសាយបក្សី H5N1 នៅក្នុងភូមិប្រទ្បាយមាស ឃុំរមេញ ស្រុកកោះអណ្តែត ខេត្តតាកែវ ក្រោយបានធ្វើតេស្ដលើសំណាកនៃសត្វទាងាប់នោះ។
ការធ្វើតេស្ដនោះ គឺក្រោយពីមន្រ្តីជំនាញបានរកឃើញថា មានសត្វទាជាង១ម៉ឺនក្បាលបានស្លាប់ជាបន្តបន្ទាប់នៅក្នុងសត្វទាច្រើនម៉ឺនក្បាលនៅក្នុងកសិដ្ឋានមួយកន្លែង ក្នុងភូមិប្រទ្បាយមាស ឃុំរមេញ ស្រុកកោះអណ្តែត ខេត្តតាកែវ ជាប់នឹងព្រំដែនកម្ពុជា-វៀតណាម៕