លោក ខៀវ សំបូរ ជាមេធាវីថ្មីរបស់លោក ស៊ីវ៉ារ៉ាក់ ឆូតទីពុង បានបដិសេធមិនធ្វើអត្ថាធិប្បាយអ្វីទេ ដោយលោកបានមានប្រសាសន៍ថា វាជារឿងលាក់ការណ៍នៃវិជ្ជាជីវៈជាមេធាវីរបស់លោក។
លោក កែ សាខន ជាប្រធានចៅក្រមប្រឹក្សាជម្រះក្តី និងជាអនុប្រធាននៃតុលាការសាលាដំបូងរាជធានីភ្នំពេញ បានអានសាលក្រមកំបាំងមុខថា តុលាការបដិសេធសំណើរបស់លោក កៅ សូផា ជាមេធាវីដែលបានដាក់សំណើសុំឲ្យនៅក្រៅឃុំជាបណ្តោះអាសន្ន កាលពីថៃ្ងទី២៣ ខែវិច្ឆិកា កន្លងទៅនេះ។
លោកបានបន្តថា តុលាការរាជធានីភ្នំពេញ បានសម្រេចទទួលយកនូវសំណើរបស់លោក ស៊ីវ៉ារ៉ាក់ ឆូតទីពុង ដែលបានស្នើសុំមកតុលាការកាលពីថៃ្ងទី៣ ខែធ្នូ ថ្មីៗនេះ សុំមិននៅក្រៅឃុំវិញ ដោយសារតែថៃ្ងសវនាការជម្រះអង្គសេចក្តីនឹងប្រព្រឹត្តទៅនៅថៃ្ងទី៨ ខែធ្នូ ខាងមុខឆាប់ៗនេះ។
លោក កែ សាខន បានបញ្ជាក់នៅក្នុងសាលក្រមនោះទៀតថា តុលាការបានសម្រេចទទួលយកសំណើរបស់លោក ស៊ីវ៉ារ៉ាក់ ឆូតទីពុង នោះ ក្នុងការប្តូរមេធាវីថ្មីពីលោក កៅ សូផា មកមេធាវីលោក ខៀវ សំបូរ វិញ។
លោក ប៉ាល់ ច័ន្ទតារា ជាមេធាវីរបស់រដ្ឋាភិបាលកម្ពុជាជាដើមបណ្ដឹងនៅក្នុងសំណុំរឿងនេះ បានមានប្រសាសន៍ក្រោយពីសវនាការនោះថា ៖ «នេះជាសិទ្ធិរបស់ជនល្មើសដែលគាត់សុំមិនបាច់នៅក្រៅឃុំទេ។ សាទរហើយ ព្រោះបើតុលាការសម្រេចឲ្យនៅក្នុងឃុំ រាជរដ្ឋាភិបាលនឹងប្ដឹងទៀតហើយ ព្រោះបទឧក្រិដ្ឋ។ រង់ចាំអង្គសេចក្ដីនៅថ្ងៃ៨ (ធ្នូ)»។
នៅក្នុងសវនាការរយៈពេលខ្លីកន្លះម៉ោងនៅឯតុលាការសាលាដំបូងរាជធានីភ្នំពេញ នៅថ្ងៃសុក្រ ៤ ធ្នូ នេះ បានប្រព្រឹត្តទៅក្រោមអធិបតីភាពរបស់លោក កែ សាខន ជាប្រធានចៅក្រមប្រឹក្សាជម្រះក្តី លោក សុខ រឿន ជាព្រះរាជអាជ្ញា លោក ប៉ាល់ ច័ន្ទតារា ជាមេធាវីរបស់រដ្ឋាភិបាលកម្ពុជាជាដើមបណ្តឹង និងលោក ខៀវ សំបូរ ជាមេធាវីរបស់ជនជាប់ចោទ គឺលោក ស៊ីវ៉ារ៉ាក់ ឆូតទីពុង ប៉ុន្តែកំបាំងមុខជនជាប់ចោទនោះ។
តុលាការសាលាដំបូងរាជធានីភ្នំពេញ មានគម្រោងការបើកការកាត់ទោសលោក ស៊ីវ៉ារ៉ាក់ ឆូតទីពុង នោះ នៅថៃ្ងទី៨ ខែធ្នូ ខាងមុខឆាប់ៗនេះ ក្រោមបទចោទប្រកាន់ពីចារកម្មបង្កអសន្តិសុខជាតិនៅក្នុងប្រទេសកម្ពុជា។
លោក ស៊ីវ៉ារ៉ាក់ ឆូតទីពុង អាយុ៣១ឆ្នាំ ជាវិស្វករថៃនិងជាបុគ្គលិកនៃក្រុមហ៊ុនបញ្ជាចរាចរណ៍ផ្លូវអាកាសនៅក្នុងទីក្រុងភ្នំពេញ ហៅកាត់ថា CATS ត្រូវបានសមត្ថកិច្ចកម្ពុជា បានចាប់ខ្លួនកាលពីយប់ថៃ្ងទី១១ ឆ្លងចូលថៃ្ងទី១២ ខែវិច្ឆិកា កន្លងទៅនេះ ក្រោមបទចារកម្មបង្កអសន្តិសុខជាតិ ដោយសារតែសង្ស័យថា លោកបានលួចយកឯកសារជើងហោះហើរបស់លោក ថាក់ស៊ីន ស៊ីណាវ៉ាត់ (Thaksin Shinawatra) អតីតនាយករដ្ឋមន្រ្តីថៃ មកទស្សនកិច្ចនៅក្នុងប្រទេសកម្ពុជា រយៈពេល៣ថៃ្ង កាលពីខែវិច្ឆិកា កន្លងទៅនេះ។ លោកបានបញ្ជូនឯកសារនោះទៅកាន់រដ្ឋាភិបាលថៃ តាមរយៈលេខាទី១របស់ស្ថានទូតថៃនៅក្នុងប្រទេសកម្ពុជា៕