ក្រុមការងារនៃសមាជិកក្រុមប្រឹក្សាខណ្ឌក្នុងរាជធានីភ្នំពេញទាំង៨ មកពីគណបក្សសមរង្ស៊ី បានបង្ហាញពីការអន់ចិត្តរបស់ខ្លួនយ៉ាងខ្លាំងចំពោះលោក ម៉ាន់ ឈឿន អភិបាលរងរាជធានីភ្នំពេញ ដោយចោទថា លោក ម៉ាន់ ឈឿន បានយកតួនាទីរបស់លោកជាមន្ត្រីរាជការ និងវេទិកាសាលារាជធានីដែលជារបស់រដ្ឋ វាយប្រហារគណបក្សសមរង្ស៊ី។
គណបក្សសមរង្ស៊ីបានចោទឡើងដូច្នេះ តាមរយៈការចេញសេចក្ដីថ្លែងការណ៍របស់ខ្លួនមួយ បន្ទាប់ពីសមាជិកក្រុមប្រឹក្សាខណ្ឌ និងក្រុងចំនួន ៥០នាក់នាំគ្នាធ្វើពហិការ ដោយការចេញពីសិក្ខាសាលាមួយស្ដីពីការប្រើប្រាស់ទិន្នន័យឆ្នាំ២០០៩ របស់សាលារាជធានីភ្នំពេញ កាលពីថ្ងៃទី៣១ ខែមីនា ឆ្នាំ២០១០។
តំណាងក្រុមប្រឹក្សាខណ្ឌមកពីគណបក្សសមរង្ស៊ីមួយរូប គឺលោក ឡាំ សឿន ថ្លែងបញ្ជាក់លើសេចក្ដីថ្លែងការណ៍ថា ការដែលលោកអភិបាលរង ម៉ាន់ ឈឿន យកវេទិកាសាលារាជធានីមកវាយប្រហារគណបក្សសមរង្ស៊ី និងប្រើពាក្យថា "ទះឲ្យជ្រុះធ្មេញ" នៅក្នុងសិក្ខាសាលាជាមូលហេតុធ្វើឲ្យសមាជិកក្រុមប្រឹក្សាខណ្ឌ និងក្រុងរបស់គណបក្សសមរង្ស៊ីទ្រាំលែងបាន។
លោក ឡាំ សឿន បានបញ្ជាក់ថា ៖ «ក្រុមពួកខ្ញុំជាក្រុមការងារតំណាងឲ្យគណបក្សសមរង្ស៊ី ដែលគាត់និយាយពាក្យអសុរោះរបៀបនេះ ខ្ញុំមិនអាចទទួលយកបានទេ ព្រោះថា ថ្នាក់ដឹកនាំបើនិយាយគ្មានភាពអព្យាក្រឹត ក៏មិនអាចក្លាយជាអ្នកដឹកនាំបានដែរ។ ចំណុចនេះហើយដែលខ្ញុំធ្វើពហិការមិនចូលរួមជាមួយនឹងសិក្ខាសាលាហ្នឹង»។
ប្រធានក្រុមប្រឹក្សារាជធានីភ្នំពេញ និងជាសមាជិកសភាគណបក្សសមរង្ស៊ី លោក ហូ វ៉ាន់ ថ្លែងថា ការវាយប្រហារគណបក្សសមរង្ស៊ីនៅក្នុងសិក្ខាសាលា គឺជាការបំបែកក្រុមប្រឹក្សាខណ្ឌមកពីគណបក្សសមរង្ស៊ី និងគណបក្សប្រជាជនឃ្លាតចេញពីគ្នា។
លោក ហូ វ៉ាន់ បានមានប្រសាសន៍ថា ៖ «នៅរាជធានី យើងត្រូវគិតថា អ្នកហ្នឹងជាក្រុមប្រឹក្សាដែលនៅក្រោមអំណាចរដ្ឋ ដែលជាតំណាងប្រជាពលរដ្ឋនៅក្នុងមូលដ្ឋានរបស់យើង នេះបានត្រឹមត្រូវ។ បើចាប់ភ្លាមមកញែករបៀបហ្នឹង ខ្ញុំថា ពិបាកនឹងធ្វើការ»។
ទាក់ទងនឹងការលើកឡើងទាំងប៉ុន្មានរបស់ក្រុមការងារនៃសមាជិកក្រុមប្រឹក្សាខណ្ឌទាំង៨ មកពីគណបក្សសមរង្ស៊ី វិទ្យុអាស៊ីសេរីមិនអាចទទួលបានការឆ្លើយតបឲ្យបានក្បោះក្បាយពីលោក ម៉ាន់ ឈឿន អភិបាលរងរាជធានីភ្នំពេញទេ ដោយសារតែលោកកំពុងជាប់ប្រជុំ។ ក៏ប៉ុន្តែលោកបានសំណូមពរខ្លីដូច្នេះ ៖ «សូមចាប់អារម្មណ៍លោកថា យើងគិតពីរឿងបញ្ហាប្រឹងកសាងទីក្រុងវិញ។ កុំគិតពីរឿងឈ្លោះគ្នាពេកណ៎ា!»។
នៅក្នុងសេចក្ដីថ្លែងការណ៍របស់តំណាងក្រុមប្រឹក្សាខណ្ឌទាំង៨ មកពីគណបក្សសមរង្ស៊ី បានសរសេរថា ព្រោះតែការយកវេទិការបស់រដ្ឋកេងយកចំណេញនយោបាយ វាយប្រហារគណបក្សសមរង្ស៊ីនោះ ក្រុមប្រឹក្សាខណ្ឌទាំងនេះសម្រេចចិត្តមិនចូលរួមប្រជុំ ឬធ្វើសិក្ខាសាលាណាមួយ ដែលមានលោក ម៉ាន់ ឈឿន ជាគណៈអធិបតីទៀតទេ។
បើទោះជាដូច្នេះក្ដី លោក ហូ វ៉ាន់ ប្រធានក្រុមប្រឹក្សារាជធានីភ្នំពេញ និងជាសមាជិកសភាពីគណបក្សសមរង្ស៊ីថ្លែងថា ប្រសិនបើលោក ម៉ាន់ ឈឿន ផ្លាស់ប្ដូរកាយវិការ និងពាក្យសម្ដីដូចលើកនេះ គណបក្សសមរង្ស៊ីនឹងនៅតែសហការជាមួយ៕