សវនាការនេះបានធ្វើទ្បើងដោយមានលោក ឆាយ គង់ ជាចៅក្រមកាត់សេចក្តី លោក ប៉ាល់ ចាន់ដារ៉ា ជាមេធាវីរបស់រដ្ឋាភិបាល លោក សំ សុគង់ ជាមេធាវីរបស់លោក មឿង សុន លោក ឯក ឆេងហួត ព្រះរាជអាជ្ញានិងតំណាងអង្គការក្រៅរដ្ឋាភិបាល ព្រមទាំងអ្នកកាសែតបានចូលរួមតាមដានសវនាការនេះ។
លោក ឆាយ គង់ ជាចៅក្រមជម្រះក្តី និងជាអនុប្រធាននៃតុលាការសាលាដំបូងរាជធានីភ្នំពេញ ដែលបានជម្រះក្តីលើសំណុំរឿងនេះ បានអានសាលក្រមកំបាំងមុខលោក មឿង សុន ថា តុលាការសម្រេចតម្កល់សាលក្រមកាលពីថៃ្ងទី១៤ ខែកក្កដា ដែលបានជម្រះដោយកំបាំងមុខនោះ ចាត់ទុកជាបានការ។ លោកបានបញ្ជាក់ថា តុលាការបានបើកផ្លូវឲ្យលោក មឿង សុន បន្តប្តឹងទាស់ទៅតុលាការសាលាឧទ្ធរណ៍ទៀត។
លោក ប៉ាល់ ចាន់ដារ៉ា ជាមេធាវីការពារក្តីឲ្យរដ្ឋាភិបាលកម្ពុជា ជាដើមបណ្តឹង បានមានប្រសាសន៍ក្រោយពីការប្រកាសសាលក្រមនោះថា លោកពេញចិត្តចំពោះការសម្រេចនេះ។
លោក ប៉ាល់ ចាន់ដារ៉ា មានប្រសាសន៍ដូច្នេះ ៖ «ខ្ញុំគិតថា តុលាការបានផ្ដល់យុត្តិធម៌ដល់រាជរដ្ឋាភិបាល។ រឿងពាក់ព័ន្ធនឹងលោក មឿង សុន នេះ រាជរដ្ឋាភិបាលគឺជាអ្នករងគ្រោះប្រាកដមែន»។
លោក សំ សុគង់ ជាមេធាវីការពារក្តីឲ្យលោក មឿង សុន បានមានប្រសាសន៍នៅខាងក្រៅតុលាការថា វាជាការសម្រេចដោយគ្មានយុត្តិធម៌ទ្បើយសម្រាប់កូនក្តីរបស់លោកនោះ។ លោកនឹងបន្តប្តឹងទាស់ទៅតុលាការសាលាឧទ្ធរណ៍ទៀតនាពេលឆាប់ៗនេះ។
លោក សំ សុគង់ បានឲ្យដឹងដូច្នេះថា ៖ «គឺជាការតម្កល់មួយមិនមានភាពយត្តិធម៌ចំពោះកូនក្ដីខ្ញុំទេ។ ខ្ញុំចង់ឲ្យមានការសម្រុះសម្រួលទាក់ទងនឹងការសុំទោសដែរ ដើម្បីបញ្ចប់បញ្ហានេះ»។
ចំណែកឯលោក មឿង សុន ផ្ទាល់ បានមានប្រសាសន៍ប្រាប់វិទ្យុអាស៊ីសេរីតាមទូរស័ព្ទពីប្រទេសបារាំងមកថា ៖ «តុលាការបើកផ្លូវឲ្យខ្ញុំប្ដឹងទៅឧទ្ធរណ៍ ហើយក្នុងពេលហ្នឹងខ្ញុំនឹងធ្វើលិខិតម្ដងទៀត សុំការអនុគ្រោះពីខាងអាជ្ញាធរអប្សរា ដែលមានឯកឧត្ដម សុខ អាន ជាប្រធាន ហើយនិងប្រមុខរដ្ឋាភិបាលសម្ដេច ហ៊ុន សែន។ តុលាការសុំការវិច្ឆ័យឲ្យយល់អំពីសន្ដានចិត្តរបស់ខ្ញុំឲ្យច្បាស់លាស់»។
លោក អំ សំអាត ជាប្រធានក្រុមស៊ើបអង្កេតនៃអង្គការការពារសិទ្ធិមនុស្សលីកាដូ ដែលបានតាមដានសវនាការនេះ បានមានប្រសាសន៍អត្ថាធិប្បាយនៅក្រៅតុលាការថា ៖ «គាត់(មឿង សុន) រិះគន់ដើម្បីឲ្យមានការស្ថាបនានៃការដាក់អំពូលភ្លើង ហើយគាត់បែរទៅជារងគ្រោះជាប់ពន្ធនាគារនិងពិន័យចំពោះរូបគាត់វិញ»។
តុលាការសាលាដំបូងរាជធានីភ្នំពេញ នៅថៃ្ងអង្គារ ទី២៤ ខែវិច្ឆិកា បានបដិសេធការទទូចរបស់មេធាវី ដែលសុំឲ្យតុលាការលើកលែងការចោទប្រកាន់ និងបញ្ឈប់ការតាមចាប់ខ្លួន ឬឃុំខ្លួនលោក មឿង សុន នោះ។
សវនាការជម្រះក្តីលើសំណុំរឿងលោក មឿង សុន នៅថៃ្ងអង្គារ ទី២៤ ខែវិច្ឆិកា ជាការជម្រះក្តីសាទ្បើងវិញ ដែលធ្លាប់បានផ្តន្ទាទោសកំបាំងមុខរួចម្តងទៅហើយ កាលពីថៃ្ងទី១៤ ខែកក្កដាកន្លងទៅនេះ ឲ្យលោក មឿង សុន ជាប់គុក២ឆ្នាំនិងបានផាកពិន័យជាប្រាក់ចំនួន១៥លានរៀល ក្រោមបទផ្សាយព័ត៌មានមិនពិតនិងញុះញង់៕