ក្រុមភ្ញៀវទេសចរជាច្រើននាក់បានរិះគន់កងយោធពលខេមរភូមិន្ទកម្ពុជា មួយចំនួនដែលបាននាំគ្នាឈរចាំសុំលុយពីភ្ញៀវទេសចរនៅលើប្រាសាទព្រះវិហារ។ ពួកគាត់ចោទថា ការឈរសុំលុយបណ្តាក់គ្នារបស់កងទាហានខ្មែរនៅលើប្រាសាទព្រះវិហារនេះ គឺកើតមានឡើងនៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ចាប់ពីថ្ងៃទី១៣ រហូតថ្ងៃទី១៥ ខែមេសា ឆ្នាំ២០១២។
ភ្ញៀវទេសចរជាច្រើនពាន់នាក់ដែលបានធ្វើដំណើរទៅកំសាន្តនៅរមណីយដ្ឋានប្រាសាទព្រះវិហារ បានថ្លែងនៅថ្ងៃច័ន្ទ ទី១៦ ខែមេសា ថា នៅលើប្រាសាទព្រះវិហារនោះមានកងទាហានខ្មែរជាច្រើនក្នុងឯកសណ្ឋានកងយោធពលខេមរភូមិន្ទ បានឈរបណ្ដាក់គ្នាពីកន្លែងមួយទៅកន្លែងមួយដើម្បីសុំលុយពីភ្ញៀវទេសចរ។
ភ្ញៀវទេសចរទាំងនោះបានបន្តថា ការដែលកងទាហានខ្មែរនាំគ្នាទៅឈរនៅតំបន់ទេសចរណ៍ចាំសុំលុយដូច្នេះ មើលទៅពុំសមរម្យនោះទេ ព្រោះនៅតំបន់នោះជាតំបន់ទេសចរណ៍ដែលមានភ្ញៀវជាតិ និងអន្តរជាតិទៅទស្សនា៖ «ពួកកងទ័ពខ្មែរយើងហ្នឹងកម្សត់ណាស់! គាត់ដើរសុំលុយសុំអីពីអ្នកដែលទៅទស្សនា សុំលុយ មកសុំ ១ពាន់ សុំ ២ពាន់ សុំថ្លៃបន្លែ ទិញបន្លែថ្ងៃនេះ ខ្លះទៅសុំទិញស្រាកន្លះលីត្រមក គាត់ដើរសុំ ហើយគាត់ដាក់គ្រប់ច្រកទាំងអស់នៅកន្លែងទស្សនាលើប្រាសាទព្រះវិហារ គាត់ដាក់គ្រប់កន្លែង ដាក់រាយគ្នា...»។
ទេសចរម្នាក់ទៀតបានថ្លែងថា នេះជាលើកដំបូងហើយដែលគាត់បានធ្វើដំណើរទៅទស្សនានៅប្រាសាទព្រះវិហារ នៅឆ្នាំ២០១២ នេះ ប៉ុន្តែនៅតំបន់ទេសចរណ៍ជាច្រើនទៀតគាត់ធ្លាប់ឃើញតែជនពិការជើងដៃ ក្មេងតូចៗ និងជនក្រីក្រជាអ្នកនៅចាំឈរសុំទានគេ។ ដោយឡែកនៅឆ្នាំ២០១២ នេះ នៅលើប្រាសាទព្រះវិហារ បែរជាសំបូរទៅដោយកងទាហានខ្មែរជាអ្នកឈរចាំសុំលុយពីភ្ញៀវទេសចរទៅវិញ៖ «ខ្ញុំយល់ឃើញថា ដល់ធ្វើអ៊ីចឹង ដូចថា អត់មានអារម្មណ៍ចង់ដើរលេងសប្បាយចិត្តអីទេ ណាមួយថវិកាយើងវាខ្សត់ខ្សោយផង បើថា មិនឲ្យទៅវាអាណិត បើថាឲ្យទៅវាពិបាកក្នុងខ្លួនយើង។ មានអារម្មណ៍ចង់ដើរទៅឲ្យសប្បាយ ទោះចង់អង្គុយហូបអីក៏មិនហ៊ានដែរ បើឃើញគ្នាដើរមក បើយើងមិនឲ្យទៅដូចវាមិនកើត»។
លោក ស្រី ឌឹក មេបញ្ជាការកងពលធំលេខ៣ ការពារនៅតំបន់ប្រាសាទព្រះវិហារ។ លោកថ្លែងថា អង្គភាពកងទ័ពប្រចាំការនៅតំបន់នោះ ពុំបានអនុញ្ញាតឲ្យមានទាហាននាំគ្នាទៅឈរចាំសុំលុយពីភ្ញៀវទេសចរទេ ប៉ុន្តែលោកថា វត្តមានទាហាននាំគ្នាឈរចាំសុំលុយពីភ្ញៀវទេសចរនោះ គឺរឿងបុគ្គលផ្ទាល់ខ្លួនរបស់ពួកគេ។
លោក ស្រី ឌឹក៖ «វាអត់សមរម្យទេរឿងអ៊ីចឹង។ យើងខ្ញុំទាំងអស់មិនបានដឹកនាំទៅធ្វើអ៊ីចឹងទេ ប៉ុន្តែបុគ្គលទេដែលខូច ប៉ុន្តែភាគច្រើនបងប្អូនមិនអាចធ្វើអ៊ីចឹងទេ នៅក្រោមការដឹកនាំរបស់ខ្ញុំទាំងអស់ មិនដឹងថា អង្គភាពណាទេ ភាគច្រើននិយាយមានវិធានការពង្រឹងរឿងការងារទាំងអស់ហ្នឹងនោះ»។
លោក គង់ វិបុល ប្រធានមន្ទីរទេសចរណ៍ខេត្តព្រះវិហារ។ ទាក់ទិនបញ្ហាទាហាននាំគ្នាឈរសុំលុយពីភ្ញៀវទេសចរនៅលើប្រាសាទព្រះវិហារនោះ លោកថ្លែងថា មន្ទីរទេសចរណ៍ខេត្តព្រះវិហារ មានកត់សម្គាល់ឃើញមានទាហានឈរសុំលុយដូច្នេះមែន ប៉ុន្តែលោកថា កិច្ចការងារនេះ ថ្នាក់ដឹកនាំនឹងធ្វើការកែសម្រួលនៅពេលដែលកម្ពុជា អនុវត្តខ្លឹមសារនៃសេចក្ដីសម្រេចរបស់តុលាការទីក្រុងឡាអេ ក្នុងការដកកងកម្លាំងចេញពីតំបន់ប្រាសាទព្រះវិហារ។
លោក គង់ វិបុល៖ «បញ្ហានេះយើងសង្ឃឹមថា ទៅមុខនឹងមានការកែសម្រួលឲ្យមានសណ្ដាប់ធ្នាប់សម្រាប់ភ្ញៀវជាតិ និងអន្តរជាតិ ព្រោះឥឡូវនេះភ្ញៀវគាត់ទៅលេង មិនមែនដូនមុនទេ ភ្ញៀវទៅលេង គឺដើម្បីកំសាន្តសប្បាយ ដើម្បីទៅលំហែកាយ ដើម្បីចង់ដឹង ចង់ស្គាល់បេតិកភណ្ឌពិភពលោករបស់ជាតិយើង វាខុសប្លែកអំពីការទៅសាកសួរសុខទុក្ខកងកម្លាំងដូចកាលយើងមានបញ្ហាប្រឈមគ្នាកន្លងមកនេះ អ៊ីចឹងបញ្ហានេះនឹងមានការកែសម្រួលនៅពេលខាងមុខនេះ ហើយថ្នាក់ដឹកនាំក៏បានគិតគូរដែរពីបញ្ហានេះ មិនមែនថា មិនបានចាប់អារម្មណ៍ទេ»។
ភ្ញៀវទេសចរដែលបានទៅទស្សនានៅប្រាង្គប្រាសាទព្រះវិហារនៅឆ្នាំ២០១២នេះ មានការកើនឡើងជាងឆ្នាំ២០១១ កន្លងទៅ។ លោកថា ចាប់ពីថ្ងៃទី១៣ ដល់ថ្ងៃទី១៥ ខែមេសា ភ្ញៀវទេសចរជាតិដែលធ្វើដំណើរទៅទស្សនានៅប្រាសាទព្រះវិហារ មានការកើនចំនួន ៥.៣៦៥នាក់។ ចំណែកឯភ្ញៀវអន្តរជាតិដែលទៅទស្សនាប្រាសាទព្រះវិហារ មាន ៤៣នាក់ ក្នុងរយៈពេលបីថ្ងៃ បើប្រៀបធៀបទៅពិធីបុណ្យចូលឆ្នាំប្រពៃណីជាតិខ្មែរ កាលពីឆ្នាំ២០១១ កន្លងទៅ គឺមានការកើនឡើង ៣៥នាក់។
លោកបន្តថា នៅរមណីយដ្ឋានប្រាសាទព្រះវិហារ និងកន្លែងទេសចរជាច្រើនកន្លែងផ្សេងទៀត នៅពេលមានបុណ្យទានដូច្នេះ មានភ្ញៀវទៅទស្សនាច្រើន។ នៅឆ្នាំនេះចំនួនភ្ញៀវទេសចរមានការកើនឡើង ដោយសារស្ថានភាពនៅតំបន់នោះមានអំណោយផលល្អ។ លោកថា ការប្រឈមបញ្ហានានាជាមួយប្រទេសថៃ នៅតំបន់នោះ មានភាពស្ងប់ស្ងាត់ ជាពិសេសនៅតាមបណ្តោយព្រំដែនមានអំណោយផលល្អដល់សុវត្ថិភាពភ្ញៀវទេសចរជាតិ និងទេសចរបរទេស៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។