ប្រជាពលរដ្ឋដែលរុករករ៉ែមាសជាលក្ខណៈគ្រួសារនៅស្រុករវៀង ខេត្តព្រះវិហារ បានប្រតិកម្មចំពោះសកម្មភាពរបស់សមត្ថកិច្ចខេត្តថា បានរឹបអូសយកឧបករណ៍រុករករ៉ែមាសរបស់ពួកគាត់ ដើម្បីជំរិតទារលុយ។
ពលរដ្ឋម្នាក់ ឈ្មោះ ឌី ជឿន រស់នៅភូមិរំដេង ឃុំរុំទុំ ស្រុករវៀង ឲ្យដឹងនៅថ្ងៃទី២៥ មេសា ថា ក្រុមសមត្ថកិច្ចដែលមានទាំងប៉ូលិស ប៉េអិមជាច្រើននាក់ បានធ្វើសកម្មភាពរឹបអូសយកឧបករណ៍រករ៉ែមាស និងម៉ាស៊ីនបូមទឹករបស់ពួកគាត់ ដែលប្រកបរបររករ៉ែមាសជាលក្ខណៈគ្រួសារសរុបប្រមាណ ៣០គ្រឿងក្នុងឃុំរុំទុំនេះ។ គាត់បន្តថា ក្រុមសមត្ថកិច្ចធ្វើទៅតាមបញ្ជាក្រុមហ៊ុនចិន ដែលមានឈ្មោះហៅកាត់ថា ដាប់ប៊ែលយូ.ស៊ី.អេស (WCS) និងបានចោទប្រកាន់ពួកគាត់ថា ធ្វើអាជីវកម្មខុសច្បាប់។
ពលរដ្ឋម្នាក់ទៀតឈ្មោះ ម៉ៅ សុគន្ធ ដែលអះអាងសមត្ថកិច្ចបានរឹបអូសម៉ាស៊ីនបូមដីរបស់គាត់ដែរថ្លែងថា ពួកគាត់រុករករ៉ែមាសនេះ គឺមានចម្ងាយជាង ៣គីឡូម៉ែត្រពីការដ្ឋានរបស់ក្រុមហ៊ុនចិន គឺមិនបានប៉ះពាល់ដល់ក្រុមហ៊ុនចិននោះទេ។
ឆ្លើយតបទៅនឹងការចោទប្រកាន់នេះ ស្នងការខេត្តព្រះវិហារ លោក ម៉ៅ ពៅ មានប្រសាសន៍ថា ក្រុមការងារនេះចុះធ្វើកិច្ចការនេះគឺយោងទៅតាមការស្នើសុំរបស់ក្រុមហ៊ុនចិន ឈ្មោះហៅកាត់ថា WCS និងបញ្ជាពីអភិបាលខេត្ត។ លោកថា អាជីវកម្មមួយចំនួនដែលមានទ្រង់ទ្រាយធំនេះ គឺពុំមានច្បាប់អនុញ្ញាតទេ។ ទន្ទឹមនឹងគ្នានេះ លោកបដិសេធថា គ្មានមន្ត្រីណាពាក់ព័ន្ធនិងការជំរិតទារលុយពីពលរដ្ឋជាថ្នូរទៅនឹងការរឹបអូសយកឧបករណ៍នោះទេ។
ប្រជាពលរដ្ឋបានរិះគន់រដ្ឋាភិបាលថា បានសម្បទានតំបន់រ៉ែឲ្យក្រុមហ៊ុនឯកជន ធ្វើអាជីវកម្មបានធ្វើឲ្យប៉ះពាល់ដល់ការរុករករ៉ែមាសជាលក្ខណៈគ្រួសាររបស់ពួកគាត់ជាយូរលុងណាស់មកហើយ និងបានធ្វើឲ្យប៉ះពាល់បរិស្ថាននៅតំបន់នោះ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។