អ្នកវិភាគនយោបាយស្ដីពីស្ថានភាពទំនាក់ទំនងកម្ពុជា-ថៃ បានបង្ហាញថា ក្រោយពីប្រទេសទាំងពីរបានភ្ជាប់ចំណងការទូតជាមួយគ្នាឡើងវិញនោះ ការដោះស្រាយជម្លោះនៃប្រទេសទាំងពីរកំពុងស្ថិតនៅក្នុងស្ថានភាពទ្រឹង ដោយពុំទាន់មានសភាពការណ៍ណាមួយដែលគេមើលឃើញថា មានការវិវឌ្ឍន៍ទៅមុខនោះឡើយ រហូតមកដល់ពេលនេះ។
ទន្ទឹមគ្នានេះដែរ អ្នកតាមដានស្ថានការណ៍ជម្លោះកម្ពុជា-ថៃ មិនរំពឹងថា ជំនួបមេដឹកនាំខ្មែរ លោក ហ៊ុន សែន និងមេដឹកនាំថៃ លោក អាភីស៊ិត វេតឆាឈីវ៉ាក់ (Abhisit Vejjajiva) នៅសហរដ្ឋអាមេរិក នៅប៉ុន្មានថ្ងៃខាងមុខទៀតនេះ នឹងទទួលបានលទ្ធផលជាវិជ្ជមាននោះឡើយ។
លោកបណ្ឌិត សុខ ទូច អ្នកជំនាញខាងវិទ្យាសាស្ត្រនយោបាយ ហើយតែងតែធ្វើការតាមដានយ៉ាងដិតដល់លើបញ្ហាខ្មែរ-ថៃ បានមានប្រសាសន៍ពន្យល់ថា តាមការសិក្សារបស់លោក ការជួបគ្នារវាង នាយករដ្ឋមន្ត្រីខ្មែរ លោក ហ៊ុន សែន និងលោក អាភីស៊ិត វេតឆាឈីវ៉ាក់ នាយករដ្ឋមន្រ្តីថៃ នៅពេលឆាប់ៗខាងមុខនេះ គឺពុំអាចឲ្យសង្ឃឹមបានថា នឹងមានលទ្ធផលល្អជាដុំកំភួននោះទេ។
លោកបណ្ឌិតបន្តថា ពីព្រោះលោក អាភីស៊ិត ពុំមែនជាកូនសោសំខាន់ក្នុងការដោះស្រាយវិបត្តិខ្មែរថៃនោះឡើយ ៖ «នយោបាយនេះខ្ញុំជឿជាក់ថា ការចរចាថ្នាក់ប្រមុខរដ្ឋនិងប្រមុខរដ្ឋមានភាពលំបាក។ នៅពេលណាដែលមួយដើរចេញធ្វើជាតួចរចា ប៉ុន្តែពន្លិចតួមួយទៀតដើម្បីធ្វើនយោបាយអមិត្តក្នុងប្រទេសទាំងពីរ ឃើញថាមានភាពលំបាក វាទាល់តែតួអង្គថ្មីរបស់ប្រមុខរាជរដ្ឋាភិបាលថៃហ្នឹង ថាជាតួអង្គមួយក្លាយទៅជាអ្នកដឹកនាំរយៈពេល ៥ឆ្នាំ ឬ ៤ឆ្នាំក្នុងអាណត្តិរបស់ប្រទេសថៃហ្នឹងតែម្ដង ហើយបើសិនជាតួអង្គ អាភីស៊ិត កំពុងតែធ្លាក់ប្រជាប្រិយភាព វាគ្រាន់តែជាជំនួបមួយដើម្បីបង្ហាញពិភពលោកថា ប្រទេសទាំងពីរចង់រកដំណោះស្រាយ ប៉ុន្តែអ្នកទាំងពីរកំពុងតែកេងយកផលចំណេញនយោបាយរៀងៗខ្លួន ពិសេសខាងភាគីថៃ»។
តំណាងរាស្ត្រគណបក្ស សម រង្ស៊ី លោក សុន ឆ័យ ក៏ពុំមានជំនឿថា កិច្ចពិភាក្សារវាងមេដឹកនាំខ្មែរ- ថៃ ដែលគេគ្រោងជួបគ្នានៅសហរដ្ឋអាមេរិកនោះ នឹងមិនមានលទ្ធផលជាវិជ្ជមានក្នុងការរកដំណោះស្រាយពីបញ្ហាឈ្លានពានចូលទឹកដីខ្មែរនៅតំបន់ប្រាសាទព្រះវិហារពីសំណាក់ភាគីប្រទេសថៃ ដែលគួរឲ្យសាធារណជនរំពឹងទុកនោះដែរ។
ប៉ុន្តែលោក ផៃ ស៊ីផាន មន្ត្រីអ្នកនាំពាក្យនៃទីស្ដីការគណៈរដ្ឋមន្ត្រី មានប្រសាសន៍ថា ជំនួបរវាងមេដឹកនាំកម្ពុជា លោកនាយករដ្ឋមន្ត្រី ហ៊ុន សែន ជាមួយលោក អាភីស៊ិត បានស្នើឡើងដោយភាគីថៃ ហើយកន្លងមកថ្មីៗនេះ គេឃើញថា ថៃបានបន្ទន់ឥរិយាបថច្រើន នេះជាហេតុផលមួយបញ្ជាក់ថា ជំនួបនេះនឹងមានពន្លឺជាវិជ្ជមានល្អទៅមុខជាមិនខានឡើយ។
លោក សុន ឆ័យ នៅតែប្រកាន់ជំហរថា ដំណោះស្រាយដែលប្រសើរ ហើយចំណេញពេលវេលា និងថវិកានោះ គឺការប្ដឹងទៅអង្គការសហប្រជាជាតិ ដើម្បីឲ្យគេធ្វើជាអាជ្ញាកណ្ដាលរកយុត្តិធម៌ក្នុងរឿងជម្លោះព្រំដែនជាមួយប្រទេសជិតខាងនេះ។
លោកបណ្ឌិត សុក ទូច បានពន្យល់ដែរថា ការដោះស្រាយជម្លោះខ្មែរ-ថៃ ទាំងឡាយណាអាចមានប្រសិទ្ធភាពទៅបាន លុះត្រាតែស្ថានភាពនៅប្រទេសថៃ មានភាពប្រាកដប្រជាខាងនយោបាយផ្ទៃក្នុងជាមុនសិន។
អ្នកនាំពាក្យអង្គភាពព័ត៌មានប្រតិកម្មរហ័សនៃទីស្ដីការគណៈរដ្ឋមន្ត្រី កាលពីថ្ងៃ២០ ខែកញ្ញា បានច្រានចោលយុទ្ធនាការដែលហៅថា ការបំពុលបរិយាកាស ដើម្បីទម្លាក់កំហុសមកកម្ពុជា និងយកកម្ពុជាធ្វើជាចំណាប់ខ្មាំងក្នុងវិបត្តិនយោបាយផ្ទៃក្នុងថៃ ហើយយុទ្ធនាការនេះ បានធ្វើឡើងតាមរយៈការផ្សព្វផ្សាយលើទំព័រកាសែត ឌឹ ណេសិន (The Nation) កាលពីថ្ងៃទី១៦ ខែកញ្ញា ឆ្នាំ២០១០ ដែលមានចំណងជើងថា សន្តិសុខត្រូវបានរឹតបន្តឹង ដោយសារពាក្យចចាមអារ៉ាមអំពីផែនការលួចធ្វើឃាតនាយករដ្ឋមន្ត្រីថៃ លោក អាភីស៊ិត វេតឆាឈីវ៉ាក់។
កាសែតដដែលនេះបានសរសេរថា លោក សាន់ថន ឆៃយ៉ាណន់ (Santhan Chayanont) ធ្លាប់បានអះអាងថា មានក្រុមបុរសឈុតខ្មៅធ្លាប់បានទទួលការបណ្ដុះបណ្ដាលនៅកម្ពុជា សម្រាប់ប្រយុទ្ធ កំពុងឃ្លាំមើលផ្ទះរបស់លោក អាភីស៊ិត វេតឆាឈីវ៉ាក់។
តែទោះយ៉ាងណាក្តី លោក ផៃ ស៊ីផាន មានប្រសាសន៍ថា ការចោទប្រកាន់របស់ថៃនេះ នឹងមិនប៉ះពាល់ដល់ជំនួបរវាងមេដឹកនាំទាំងពីរនេះទេ។
នៅក្នុងសុន្ទរកថា លោក ហ៊ុន សែន ក្នុងពិធីសម្ពោធស្ពានព្រែកព្នៅ កាលពីថ្ងៃទី២០ ខែកញ្ញា បានរក្សាការស្ងៀមស្ងាត់ ដោយពុំបានអត្ថាធិប្បាយចំអំពីការចោទប្រកាន់របស់ថៃខាងលើនេះទេ។
លោក ហ៊ុន សែន នាយករដ្ឋមន្ត្រីកម្ពុជា នឹងចូលរួមកិច្ចប្រជុំថ្នាក់ដឹកនាំអាស៊ាន-សហរដ្ឋអាមេរិក នៅថ្ងៃទី២៤ ខែកញ្ញា ឆ្នាំ២០១០ នៅទីក្រុងញូវយ៉ក សហរដ្ឋអាមេរិក តបតាមការអញ្ជើញរបស់ប្រធានាធិបតីសហរដ្ឋអាមេរិក លោក បារ៉ាក់ អូបាម៉ា (Barack Obama) ហើយលោកក៏នឹងជួបជាមួយលោកនាយករដ្ឋមន្ត្រីថៃ អាភីស៊ិត វេតឆាឈីវ៉ាក់ ដើម្បីពិភាក្សាគ្នាជាលក្ខណៈទ្វេភាគី។
មន្ត្រីនាំពាក្យក្រសួងការបរទេសកម្ពុជា នៅថ្ងៃអង្គារ ទី២១ ខែកញ្ញា លោក កុយ គួង មានប្រសាសន៍បញ្ជាក់បន្ថែមយ៉ាងដូច្នេះ ៖ «ដូចបានបញ្ជាក់អ៊ីចឹង គឺលោក (ហ៊ុន សែន) នឹងជួបប្រជុំទ្វេភាគីជាមួយភាគីថៃ ប៉ុន្តែប្រធានបទលម្អិតនោះខ្ញុំអត់បានទទួលទេ...»។
នៅថ្ងៃអង្គារ ទី២១ ខែកញ្ញា វ៉ឹបសៃថ៍ ឬគេហទំព័ររបស់រដ្ឋាភិបាលថៃ ឈ្មោះ www.thaigov.go.th បានផ្សព្វផ្សាយ កម្មវិធីលោក អាភីស៊ិត វេតឆាឈីវ៉ាក់ ក្នុងអំឡុងកិច្ចប្រជុំមេដឹកនាំអាស៊ាននិងសហរដ្ឋអាមេរិក នៅថ្ងៃទី២៤ ខែកញ្ញា ខាងមុខនេះ ដែលចេញដោយការិយាល័យអ្នកនាំពាក្យរដ្ឋាភិបាលថៃ ផ្នែកទំនាក់ទំនងកិច្ចការអន្តរជាតិ បានឲ្យដឹងថា នាយករដ្ឋមន្ត្រីថៃ នឹងមានឱកាសជួបជាមួយស្ថាប័នអ្នកវិនិយោគនៅសហរដ្ឋអាមេរិក នៅឯកិច្ចប្រជុំក្រុមប្រឹក្សាពាណិជ្ជកម្មសហរដ្ឋអាមេរិក និងអាស៊ាន។
ក្រៅពីនេះ នឹងមានវគ្គសំណួរចម្លើយ ដែលនាយករដ្ឋមន្ត្រីថៃ នឹងឆ្លើយតបទៅនឹងការសួរដេញដោលលើបញ្ហាជាច្រើន ក្នុងនោះមានពាក់ព័ន្ធនឹងរឿងជម្លោះដែនដីជាមួយកម្ពុជាផងដែរ។ ប៉ុន្តែក្នុងនោះ ពុំមានបង្ហាញពីកម្មវិធីណាមួយក្នុងការណាត់ជួបពិភាក្សាជាមួយ លោក ហ៊ុន សែនទេ៕