ជាក់ស្តែងដូចជាអ្នកជំងឺឈ្មោះ ស្វាយ រុន អាយុ៥២ឆ្នាំ នៅភូមិតាអ៊ួក ឃុំរក្សជ័យ ត្រូវបានបញ្ជូនមកកាន់មន្ទីរពេទ្យកាល់ម៉ែត ក្រុងភ្នំពេញទាំងកណ្តាលអធ្រាត្រ ដោយសារតែលោកកើតជំងឺរាករូសយ៉ាងធ្ងន់ធ្ងរ។
កូនស្រីលោក ស្វាយ រុន ឈ្មោះ ស៊្រុន សំអូន ដែលកំពុងកំដរឪពុកឈឺក្នុងមន្ទីរពេទ្យកាល់ម៉ែតបានបញ្ជាក់ថា គ្រូពេទ្យបានប្រាប់ថា ឪពុករបស់ខ្លួនកើតជំងឺអាសន្នរោគ។
ស្រ៊ុន សំអូន បានរៀបរាប់អំពីស្ថានភាពជំងឺរបស់ឪពុកដូច្នេះ ៖ «រាកហូរដូចទឹកទៅ ដាក់សេរ៉ូមប៉ុន្មានហូរមកប៉ុណ្ណឹងវិញដដែល។ ធ្វើទុក្ខឡើងស្វិត ខ្សោះជាតិទឹកពីខ្លួនតែម្ដង។ អ្នកភូមិនៅជិតៗខ្ញុំឈឺគ្រប់តែគ្នា រាកដូចគ្នា រាកខ្លាំង»។
មេឃុំរក្សជ័យ លោក ហុង សុផល មានប្រសាសន៍ថា លោកមិនទាន់ដឹងថា ជំងឺនេះជាជំងឺអ្វីពិតប្រាកដនៅឡើយទេ គ្រូពេទ្យនិងប្រធានភូមិនៅតាមភូមិនីមួយៗកំពុងតាមដានជំងឺនេះ ប៉ុន្តែនៅពេលនេះគេគ្រាន់តែសង្ស័យថា អាចជាជំងឺអាសន្នរោគ។
លោកបន្តថា អ្នកស្រុកបានធ្លាក់ខ្លួនឈឺភ្លាមៗពីម្នាក់ទៅម្នាក់ និងពីភូមិមួយទៅភូមិមួយយ៉ាងឆាប់រហ័ស ចាប់តាំងពីយប់ថ្ងៃទី១ កុម្ភៈ មកទល់ថ្ងៃទី៣ កុម្ភៈ ហើយអ្នកជំងឺត្រូវបានបញ្ជូនទៅមន្ទីរពេទ្យជាបន្តបន្ទាប់ចាប់តាំងពីយប់ថ្ងៃច័ន្ទ ទី១ កុម្ភៈ មកម្ល៉េះ។
មេឃុំរក្សជ័យ លោក ហុង សុផល បានឲ្យដឹងដូច្នេះ ៖ «តាំងពីយប់ថ្ងៃទី១ កុម្ភៈ មករហូតដល់ថ្ងៃហ្នឹង(៣ កុម្ភៈ) អស់បីបួនប្រាំនាក់ហើយ។ ប្រធានភូមិខ្ញុំ ម្សិលមិញអង្គុយៗនៅក្នុងសាលាឃុំហ្នឹង ស្រាប់តែថា ចុកពោះ ទៅជារាក យប់មិញដាក់សេរ៉ូមអស់បួនប្រាំប្លោក។ ៤នាក់ ២នាក់ពីម្សិលបានបញ្ជូនទៅដល់ពេទ្យកាល់ម៉ែតហើយ នៅម៉ោង១២យប់ យប់មិញមួយទៀត បញ្ជូនទៅអស់ហើយ ហើយនៅ២ទៀត មួយគ្រាន់បើហើយ អស់សេរ៉ូម២០ប្លោក»។
លោកមេឃុំបានចាត់ឲ្យពេទ្យនិងមេភូមិគ្រប់ភូមិឲ្យប្រចាំការតាមដានជំងឺនេះយ៉ាងដិតដល់ដើម្បីចាត់វិធានការសង្គ្រោះបន្ទាន់ ៖ «តាមដានខ្លាចវារីករាលដាលអី ឲ្យពេទ្យចុះអង្កេតមើល ក្រៅពីហ្នឹងប្រាប់មេភូមិថា បើមានការអីឲ្យរាយការណ៍ជាបន្ទាន់មក។ គ្រាន់តែឲ្យដឹង យើងនឹងរាយការណ៍ទៅពេទ្យបង្អែកដើម្បីចុះរកវិធីសង្រ្គោះបន្ទាន់»។
ទន្ទឹមពេលនេះដែរ មានសេចក្តីរាយការណ៍ថា អ្នកស្រុកខេត្តកណ្តាលនិងខេត្តតាកែវ ខ្លះក៏បានកើតជំងឺអាសន្នរោគនេះដែរ ហើយបានទៅព្យាបាលនៅមន្ទីរពេទ្យប្រទេសវៀតណាម។
លោក លី សូវ៉ាន់ អនុប្រធាននាយកដ្ឋានប្រយុទ្ធជំងឺឆ្លងនៃក្រសួងសុខាភិបាល បានអំពាវនាវឲ្យប្រជាជនទាំងអស់រក្សាអនាម័យដើម្បីបង្ការជំងឺអាសន្នរោគ។
លោក លី សូវ៉ាន់ មានប្រសាសន៍ដូច្នេះ ៖ «ដើម្បីអប់រំដល់ប្រជាពលរដ្ឋ ទី១ ដោយសារមានជំងឺរាករូសច្រើន សូមឲ្យគាត់ផ្អាកការហូបអាហារឆៅ ទាំងបន្លែសាច់អីហ្នឹងសូមឲ្យឆ្អិន។ ទី២ទឹកយើងត្រូវដាំឲ្យពុះដើម្បីកុំឲ្យមានជំងឺរាករូស បើសិនជារាករូស សូមមេត្តាប្រើម្សៅអូរ៉ាលីតដែលមាននៅក្នុងមូលដ្ឋានហ្នឹង ឬមួយនៅមណ្ឌលសុខភាពធ្វើការព្យាបាល។ បើសិនជាសុខភាពហ្នឹងមិនបានធូរស្បើយទេ សូមអញ្ជើញទៅមណ្ឌលសុខភាព ឬមន្ទីរពេទ្យបង្អែកជាបន្ទាន់ដើម្បីធ្វើការព្យាបាល»៕