លោក ថា ប៊ុនថាក់ សមាជិកគណៈគ្រូពេទ្យថ្នាក់ជាតិនិងជាអនុប្រធានមន្ទីរសុខាភិបាលខេត្ត ឲ្យដឹងថា ៖ «មន្ទីរបានធ្វើលិខិតបិទគ្លីនិកហ្នឹងក្នុងលក្ខណៈដែលមានការស៊ើបអង្កេតហ្នឹង។ ខាងប៉ូលិសគាត់ថា ព្រះរាជអាជ្ញាបានប្រគល់ឲ្យគាត់ហើយ»។
បុរសកសិករម្នាក់បានស្រែកយំនិងទាមទាររកយុត្តិធម៌ចំពោះមុខសាកសពភរិយាទើបស្លាប់ បន្ទាប់ពីទទួលការព្យាបាលពីគ្លីនិកចិនមួយ ឈ្មោះ ប៉េកាំង។ ភរិយាគាត់ស្លាប់កាលពីវេលាម៉ោង៥ភ្លឺ ព្រឹកថ្ងៃសៅរ៍ ទី២១ ខែវិច្ឆិកា ឆ្នាំ២០០៩ ពេលនាំពីភូមិមកដល់មន្ទីរពេទ្យខេត្តបានតែ១៥នាទីតែប៉ុណ្ណោះ។
ឈុន សឿន ឲ្យដឹងថា ភរិយាគាត់ឈ្មោះ ជីវន មានជំងឺគ្រុនញាក់កាលពីថ្ងៃទី១៦ ខែវិច្ឆិកា ឆ្នាំ២០០៩ គាត់បាននាំទៅកាន់គ្លីនិកចិនដែលបើកសេវាកម្មព្យាបាលជំងឺឯកជននៅក្រុងបានលុង ហើយគ្រូពេទ្យចិនបានទទួលព្យាបាលដោយថតអេកូសាស្ត្រនិងចាក់សេរ៉ូម ហើយប្រគល់ថ្នាំពេទ្យនិងសេរ៉ូមផ្លាកសញ្ញាជាភាសាចិនសម្រាប់ព្យាបាលនៅផ្ទះចំនួនបីថ្ងៃ ក៏ប៉ុន្តែការព្យាបាលនៅផ្ទះ ជំងឺភរិយាគាត់កាន់តែដុនដាបទើបគាត់ដឹកជញ្ជូនមកមន្ទីរពេទ្យ តែជាអកុសលគ្រូពេទ្យខេត្តមិនអាចសង្គ្រោះភរិយាគាត់បាន ៖ «ប្រពន្ធខ្ញុំមកនៅដើររួច ដល់មកដល់ណេះស្រាប់តែទៅជាស្លាប់»។
ម្ចាស់គ្លីនិកជាជនជាតិចិននៅព្រឹកថ្ងៃទី២១ ខែវិច្ឆិកា ឆ្នាំ២០០៩ មិនព្រមធ្វើអត្ថាធិប្បាយអ្វីទាំងអស់ទាក់ទិននឹងការស្លាប់អ្នកភូមិខាងលើនេះ។
លោក ផេង លីន វេជ្ជបណ្ឌិតផ្នែកសង្រ្គោះបន្ទាន់នៃមន្ទីរពេទ្យខេត្តរតនគិរី មានប្រសាសន៍ថា គ្រូពេទ្យមិនអាចវាយតម្លៃមូលហេតុនៃការស្លាប់របស់អ្នកភូមិបានទេ។
លោក ផេង លីន បានបញ្ជាក់ថា ៖ «ព្រោះដោយសារជំងឺអ៊ីចេះ រៀបចូលមកគឺជិតស្លាប់ហើយ នៅតែខ្យល់ដង្ហើម»។
ក្រុមសមត្ថកិច្ចខេត្តរតនគិរីមានមន្ត្រីមន្ទីរសុខាភិបាល នគរបាល និងព្រះរាជអាជ្ញារងតុលាការ ចុះមកអង្កេតភ្លាមៗនៅទីតាំងគ្លីនិកនៅឯភូមិមួយក្នុងក្រុងបានលុង នៅព្រឹកថ្ងៃសៅរ៍ ហើយតម្រូវឲ្យគ្លីនិកនោះបិទទ្វារនិងនាំខ្លួនម្ចាស់គ្លីនិកទៅកាន់ស្នងការដ្ឋាន ប៉ុន្តែមន្ត្រីទាំងនោះមិនធ្វើអត្ថាធិប្បាយអ្វីទាំងអស់ជុំវិញហេតុការណ៍ទាំងអស់នោះ។
លោក សាំង សារី អគ្គនាយករងបច្ចេកទេសនៃក្រសួងសុខាភិបាល មានប្រសាសន៍ថា មន្ទីរសុខាភិបាលខេត្តត្រូវតែចេញលិខិតបិទគ្លីនិកខុសច្បាប់នេះជាមួយវិធានការដាក់ពិន័យផង។
លោក សាំង សារី បានថ្លែងថា ៖ «ចាំខ្ញុំតេបញ្ជាទៅគាត់ឲ្យបិទជាបន្ទាន់។ គឺជនបរទេសមិនអាចបើកជាបន្ទប់ពិគ្រោះជំងឺបានទេ គាត់អត់ដែលមានសញ្ញាបត្រអីទេ!»។
កាលពីថ្ងៃទី១១ ខែវិច្ឆិកា មន្ត្រីមន្ទីរសុខាភិបាលខេត្តរតនគិរីនិងសមត្ថកិច្ចប៉ូលិសបានធ្វើការត្រួតពិនិត្យគ្លីនិកចិនឈ្មោះប៉េកាំងនេះម្តងរួចទៅហើយ ដោយរកឃើញមានប្រើប្រាស់ថ្នាំពេទ្យនាំចូលពីប្រទេសចិន គ្មានទិដ្ឋាការពីក្រសួងសុខាភិបាលសម្រាប់ព្យាបាលជំងឺ មានបុគ្គលិកមិនមែនជាគ្រូពេទ្យតែស្លៀកពាក់ឯកសណ្ឋានពេទ្យ ម្ចាស់គ្លីនិកគ្មានសញ្ញាបត្រ និងការអនុញ្ញាតឲ្យបើកគ្លីនិក រួមទាំងផ្សព្វផ្សាយពាណិជ្ជកម្មតាមវិទ្យុ។
ការស្លាប់របស់អ្នកភូមិរូបនេះត្រូវមន្ត្រីពេទ្យរាយការណ៍ថា ជាករណីទី៣ហើយបន្ទាប់ពីមានអ្នកភូមិ២នាក់ទៀតរងគ្រោះដោយសារការព្យាបាលនៅគ្លីនិកប៉េកាំងនេះ៕