ប្រធានមន្ទីរទេសចរណ៍ខែត្របន្ទាយមានជ័យ លោក ជុង លឹម បានថ្លែងប្រាប់វិទ្យុអាស៊ីសេរីនៅព្រឹកថ្ងៃទី២១ ខែវិច្ឆិកា ថា វគ្គបំពាក់បំប៉ននោះផ្តោតជាសំខាន់លើរបៀបធ្វើបដិសណ្ឋារកិច្ចពីអ្នកបើកបរតាក់ស៊ីចំពោះភ្ញៀវទេសចរណ៍អន្តរជាតិ។
លោក ជុង លឹម បានឲ្យដឹងថា ៖ «អ្នកតាក់ស៊ីគឺនឹងហៅរៀនវគ្គបដិសណ្ឋារកិច្ចដើម្បីបំពាក់បំប៉នអំពីរបៀបរបបនៃការទទួលភ្ញៀវ»។
លោកបានបន្តថា អ្នករត់តាក់ស៊ីជាសមាជិកសមាគមនឹងទទួលបានអាជ្ញាប័ណ្ណពីមន្ទីរទេសចរណ៍មានសុពលភាពរយៈពេលមួយឆ្នាំចាប់ផ្តើមផ្តល់ជូននៅថ្ងៃទី១ ខែធ្នូ ឆ្នាំ២០០៨។ អ្នកបើកតាក់ស៊ីទាំងអស់តម្រូវឲ្យមានឯកសណ្ឋានអាវពណ៌ពងក្រសានិងខោជើងវែងពណ៌ទឹកប៉ិចនៅពេលបើកបរដឹកទេសចរណ៍ភ្ញៀវអន្តរជាតិ។
លោក ជុង លឹម បានបញ្ជាក់ថា ៖ «ក្នុងតាក់ស៊ីខ្ញុំដាក់ទៀត ហើយសមាគមដែលមានសិទ្ធិលក់សំបុត្រឲ្យភ្ញៀវរាយគឺមានឈ្មោះអ្នកបើកបរ មានលេខទូរស័ព្ទ មានម៉ាកឡាន មានស្លាកលេខ មានចំនួនភ្ញៀវទេសចរណ៍ដែលត្រូវជិះ ប្រុសស្រីប៉ុន្មាន ជនជាតិអីខ្លះ ហើយថ្ងៃចេញដំណើរថ្ងៃណា ចេញវេលាម៉ោងប៉ុន្មាន»។
លោក ដួង វិបុល អគ្គលេខាធិការសមាគមទេសចរណ៍ ឧត្តមរិទ្ឋី និងដឹកជញ្ជូន បានថ្លែងថា ចំនួនតាក់ស៊ីដែលស្ថិតនៅក្រោមការគ្រប់គ្រងរបស់សមាគមបច្ចុប្បន្នមានចំនួន៧០គ្រឿង ហើយសមាគមគ្រោងនឹងបញ្ជូនឈ្មោះម្ចាស់តាក់ស៊ីទៅមន្ទីរទេសចរណ៍ក្នុងពេលឆាប់ៗដើម្បីធ្វើអាជ្ញាប័ណ្ណ។
លោកបានបន្តថា ម្ចាស់តាក់ស៊ីមួយចំនួនដែលបានចូលរួមក្នុងកិច្ចប្រជុំកាលពីថ្ងៃព្រហស្បតិ៍ ទី២០ ខែវិច្ឆកា ក៏បានតវ៉ាដែរពីចំនួនទឹកប្រាក់ដែលតម្រូវឲ្យទិញអាជ្ញាប័ណ្ណពីមន្ទីរទេសចរណ៍នោះ។
លោក ដួង វិបុល បានមានប្រសាសន៍ថា ៖ «ប្រធានមន្ទីរគាត់បានសួរយោបល់ទៅខាងតាក់ស៊ី តើមានលទ្ធភាពក្នុងការបង់ទៅលើ License មួយឆ្នាំប៉ុន្មាន អ្នកខ្លះគេថាមានលទ្ធភាព២០ម៉ឺនរៀល អ្នកខ្លះថាគេមានលទ្ធភាព៥ម៉ឺនរៀល»។
ទោះជាយ៉ាងនេះក្តី លោក ជុង លឹម ប្រធានមន្ទីរទេសចរណ៍ខែត្របន្ទាយមានជ័យមិនបានបញ្ជាក់ពីចំនួនថវិកាដែលតម្រូវឲ្យទិញអាជ្ញាប័ណ្ណនោះទេ។
ចំណែកឯអ្នករត់តាក់ស៊ីនៅប៉ោយប៉ែតម្នាក់ដែលមិនបានចូលជាសមាជិករបស់សមាគមតាក់ស៊ីបានសម្តែងការយល់ឃើញផ្ទាល់ខ្លួនថា ៖ «គិតទៅដូចជាមិនល្អទេ ភ្ញៀវរអ៊ូរទាំច្រើនដែរ។ ភ្ញៀវគេចង់ជិះឡានសេរី ហើយពួកហ្នឹងភ្ញៀវមក អត់មានឲ្យដើរជិះឡានណាផ្សេងក្រៅបានទេ គឺមានតែឡានក្រុមហ៊ុនគេហ្នឹង ទី១។ ទី២ទៀត ឡានក្រៅពីឡានសមាជិកដែលគេបង់ចូលជាសមាជិករបស់គេហ្នឹង គឺមិនអាចដឹកបានទេ អ្នកណាដឹកគេផាក»។
ទោះជាយ៉ាងនេះក្តី លោក ជុង លឹម ប្រធានមន្ទីរទេសចរណ៍ខែត្របន្ទាយមានជ័យបានថ្លែងថា វិធានការកែលម្អសេវាដឹកជញ្ជូនភ្ញៀវទេសចរណ៍អន្តរជាតិរបស់អ្នករត់តាក់ស៊ីនៅច្រកទ្វារអន្តរជាតិប៉ោយប៉ែតនេះ គឺអាចជួយលើកស្ទួយមុខមាត់ប្រទេសជាតិឲ្យមានភាពប្រសើរឡើងមួយកម្រិតទៀត៕