សង្គមស៊ីវិលសាទរគោលនយោបាយរួមថ្នាក់តំបន់ទន្លេមេគង្គក្រោមដើម្បីស្ត្រី

រដ្ឋមន្ត្រី អនុរដ្ឋមន្ត្រី និងមន្ត្រីអង្គការមិនមែនរដ្ឋាភិបាលមកពីស្ថាប័នពាក់ព័ន្ធ និងកិច្ចការនារី សុខភាព អប់រំ បរិស្ថាន និងផ្នែកអភិវឌ្ឍហេដ្ឋារចនាសម្ព័ន្ធ បានជួបពិភាក្សារយៈពេល២ថ្ងៃ នៅក្នុងខេត្តសៀមរាប កាលពីសប្ដាហ៍មុន។

ដោយ សុ ជីវី
2012-07-20

h071912in.mp3

រដ្ឋមន្ត្រី និងអនុរដ្ឋមន្ត្រី នៃបណ្ដាប្រទេសទន្លេមេគង្គក្រោមទាំង៥ ជួបពិភាក្សាគ្នាលើគោលនយោបាយលើកទី១ ស្តីពីសមភាពយេនឌ័រ និងការលើកកម្ពស់ភាពអង់អាចរបស់ស្ត្រី នាសណ្ឋាគារសូហ្វីតែល (Sofitel Hotel) ខេត្តសៀមរាប កាលពីព្រឹកថ្ងៃទី១២ ខែកក្កដា ឆ្នាំ២០១២។

RFA/Hang Savyouth

ដោយមានការគាំទ្រពីសហរដ្ឋអាមេរិក កិច្ចសន្ទនានោះមានបំណងស្វែងយល់ពីបញ្ហារបស់ស្ត្រី ដើម្បីបង្កើតនូវគោលនយោបាយរួម ជំរុញសមភាពយេនឌ័រ និងការផ្ដល់សិទ្ធិអំណាចដល់ស្ត្រី។

មន្ត្រីរដ្ឋាភិបាលកម្ពុជា ចាត់ទុកគម្រោងការណ៍បង្កើតអោយមានគោលនយោបាយរួមថ្នាក់តំបន់ គឺមានសារប្រយោជន៍សម្រាប់ការតស៊ូមតិ ដើម្បីសិទ្ធិស្ត្រី។

ក្រុមអ្នកតស៊ូមតិដើម្បីសិទ្ធិស្ត្រី ដែលមកពីប្រទេសក្នុងតំបន់ទន្លេមេគង្គក្រោម រួមមាន កម្ពុជា វៀតណាម ឡាវ ថៃ បូកនឹងប្រទេសភូមាផង បានព្រមព្រៀងគ្នាថា ដើម្បីជំរុញអោយស្ត្រីចូលរួមបានច្រើននៅក្នុងផ្នែកសំខាន់ៗនៅក្នុងការដឹកនាំសង្គម គឺត្រូវកែលម្អអោយវិស័យសំខាន់ចំនួន៤ បានផ្ដល់ប្រយោជន៍អោយបានច្រើនដល់ស្ត្រី។

សេចក្ដីថ្លែងការណ៍រួម ស្ដីពីកិច្ចសន្ទនាគោលនយោបាយពាក់ព័ន្ធនឹងស្ត្រី និងសមភាពយេនឌ័រ ក្រោមគំនិតផ្ដួចផ្ដើមសហរដ្ឋអាមេរិក និងប្រទេសនៃទន្លេមេគង្គក្រោម បានបង្ហាញថា សង្គមគ្រួសារ ក៏ដូចសង្គមជាតិ អាចរឹងមាំទៅបានល្គឹកណា ស្ត្រី និងក្មេងស្រី ទទួលបានការថែទាំសុខភាព ដែលមានប្រសិទ្ធភាព ក្មេងស្រីវ័យជំទង់បានបញ្ចប់ការសិក្សា មានទឹកស្អាតប្រើប្រាស់ ទទួលបានប្រយោជន៍ពីការប្រើប្រាស់ថាមពលដីព្រៃ និងមានលទ្ធភាពប្រើប្រាស់សម្ភារៈបច្ចេកវិទ្យា។

សេចក្ដីថ្លែងការណ៍រួមដដែលចេញនៅថ្ងៃទី១៣ ខែកក្កដា កន្លងទៅ អោយដឹងទៀតថា ក្រុមនេះគ្រោងនឹងបង្កើតគោលនយោបាយថ្មីមួយជារួមសម្រាប់តំបន់ទន្លេមេគង្គក្រោម ទៅតាមការផ្ដល់យោបល់ពីកិច្ចពិភាក្សានេះ។

រដ្ឋមន្ត្រីកិច្ចការនារី អ្នកស្រី អ៊ឹង កន្ថាផាវី មានប្រសាសន៍ថា ការបង្កើតគោលនយោបាយរួមនេះ គឺនឹងធ្វើសំឡេងនៃការទាមទារ ឬការតស៊ូមតិ ដើម្បីសិទ្ធិស្ត្រីបានរួមជាសំឡេងតែមួយនឹងមានឥទ្ធិពល។ អ្នកស្រី អ៊ឹង កន្ថាផាវី បន្តថា រដ្ឋាភិបាលនៃប្រទេសនីមួយៗអាចនឹងឆាប់ចាប់អារម្មណ៍ចំពោះការទាមទាររួមគ្នា។

ស្របគ្នានេះដែរ គេគ្រោងនឹងបង្កើតអោយមានក្រុមការងារយេនឌ័រ នៃគំនិតផ្ដួចផ្ដើមទន្លេមេគង្គក្រោម ដែលមានការចូលរួមពីបុរស និងស្ត្រី នៃប្រទេសទាំងនេះ ដើម្បីបំពេញការងារទៅតាមគោលដៅ។

មន្ត្រីសង្គមស៊ីវិល និងគណបក្សប្រឆាំងនៅកម្ពុជា បានសាទរចំពោះការបង្កើតគោលនយោបាយថ្មីនេះ ប៉ុន្តែបានបញ្ជាក់ថា កម្ពុជានឹងពិបាកក្នុងការទាញយកផលប្រយោជន៍ពីគោលនយោបាយរួមនេះ នៅពេលដែលកម្ពុជាមានភាពប្រសើរតែនៅក្នុងក្រដាស ចំណែកការអនុវត្តមិនទាន់បានត្រឹមត្រូវ។

នាយិកាអង្គការ សីលកា អ្នកស្រី ធីតា ឃិះ មានប្រសាសន៍ថា កម្ពុជាត្រូវត្រៀមរៀបចំរចនាសម្ព័ន្ធមួយចំនួនសម្រាប់ទាញយកផលពីគម្រោងការណ៍នេះ។

សហរដ្ឋអាមេរិក ដែលគាំទ្រគម្រោងគំនិតផ្ដួចផ្ដើមទន្លេមេគង្គក្រោម បានសម្រេចផ្ដល់ជំនួយជាទឹកប្រាក់ ៥០លានដុល្លារ សម្រាប់គម្រោងអភិវឌ្ឍរយៈពេល៣ឆ្នាំ ទៅដល់បណ្ដាប្រទេសនៃបណ្ដាទន្លេមេគង្គក្រោមទាំងនេះ។

អ្នកតំណាងរាស្ត្រស្ត្រីនៃគណបក្ស សម រង្ស៊ី អ្នកស្រី មូរ សុខហួរ មានប្រសាសន៍ថា ចំពោះស្ថានភាពនៅកម្ពុជា គឺត្រូវអោយមានការផ្លាស់ប្ដូរមួយចំនួន ដែលនឹងជំរុញអោយស្ត្រីនៅកម្ពុជា អាចទទួលបានប្រយោជន៍ពីជំនួយរបស់សហរដ្ឋអាមេរិក នេះ។

ស្របគ្នានេះដែរ រដ្ឋមន្ត្រីការបរទេសសហរដ្ឋអាមេរិក អ្នកស្រី ហ៊ីលឡារី គ្លិនតុន (Hillary Clinton) ជំរុញរដ្ឋាភិបាលនៃប្រទេសក្នុងតំបន់ទន្លេមេគង្គក្រោម រួមទាំងកម្ពុជា អោយយកចិត្តទុកដាក់ដោះស្រាយបញ្ហាជួបប្រទះរបស់ស្ត្រី ក្នុងការចូលរួមអោយបានពេញលេញក្នុងសេដ្ឋកិច្ចសង្គម ដែលមានន័យថា ផ្ដល់ឱកាសដល់ស្ត្រី គឺជួយក្នុងការបង្កើនសេដ្ឋកិច្ចជាតិ។ អ្នកស្រីបន្តថា ក្របខណ្ឌច្បាប់កម្ពុជា គួរគិតគូរអោយបានម៉ត់ចត់ពីអត្ថប្រយោជន៍របស់ស្ត្រី ជាពិសេសស្ត្រីនៅក្នុងវិស័យការងារ។

ទោះជាយ៉ាងនេះក្ដី រដ្ឋមន្ត្រីក្រសួងកិច្ចការនារីកម្ពុជា អ្នកស្រី អ៊ឹង កន្ថាផាវី អះអាងថា រដ្ឋាភិបាលកម្ពុជាបានយកចិត្តទុកចំពោះការជំរុញ និងលើកកម្ពស់សិទ្ធិស្ត្រី ដែលប្រទេសមួយចំនួនក្នុងតំបន់យកជាគំរូ។

ដោយឡែករហូតមកដល់ពេលនេះ ក្រុមអង្គការសង្គមស៊ីវិល នៅកម្ពុជាបានរិះគន់ថា ការអភិវឌ្ឍដោយគ្រប់រូបភាពនៅកម្ពុជា គឺពុំទទួលការចូលរួមអោយបានពេញលេញពីក្រុមស្ត្រី នៅតាមមូលដ្ឋានឡើយ។ ហើយការអភិវឌ្ឍទាំងនោះ ធ្វើអោយប៉ះពាល់ច្រើនទៅលើស្ត្រី និងកុមារី ជាពិសេស គឺការបណ្ដេញចេញពីលំនៅឋាន និងការផ្ដល់ដីសម្បទានគ្រប់ប្រភេទ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។