ស្នងការនគរបាលរាជធានីភ្នំពេញ លោក ទូច ណារ៉ុថ បានឲ្យដឹងនៅល្ងាចថ្ងៃអង្គារ ទី៣០ ខែវិច្ឆិកាថា ក្រុមប៉ូលិសបានប្រមូលសម្លៀកបំពាក់ ស្បែកជើង និងមួកជាដើមរបស់អ្នករបួស និងអ្នកស្លាប់នៅក្នុងហេតុការណ៍អាក្រក់លើស្ពានកោះពេជ្រ កាលពីថ្ងៃបុណ្យអុំទូកចុងក្រោយទៅថែរក្សាទុកនៅស្នងការដ្ឋានរាជធានីភ្នំពេញ ដើម្បីរង់ចាំការសម្រេចពីគណៈកម្មការទទួលបន្ទុកដោះស្រាយករណីឧបទ្ទវហេតុថា តើនឹងយកវត្ថុតាងទាំងនោះទៅធ្វើអ្វីទៀត។
លោក ទូច ណារ៉ុថ មានប្រសាសន៍ថា លោកមិនទាន់ប្រាកដនៅឡើយទេ ចំពោះការប្រមូលវត្ថុតាងនេះ ក៏ប៉ុន្តែទោះជាយ៉ាងណា មន្ត្រីរបស់លោកកំពុងរាប់ចំនួនស្បែកជើង និងសម្លៀកបំពាក់ រួមទាំងរបស់របរទាំងនោះហើយ ៖ «នៅពេលដែលយើងពិនិត្យទៅថា មានស្អីខ្លះហើយ យើងសុំយោបល់ទៅថ្នាក់លើ ទៅឯកឧត្ដមអភិបាល និងឯកឧត្ដមអគ្គថា តើយើងសម្រេចយ៉ាងណា? យើងសម្រេចធ្វើជាស្តូបមួយនៅខាងត្បូងនៃស្ពានពេជ្របន្តិចហ្នឹង ដូច្នេះស្តូបហ្នឹងដាក់រូបថត ឬតម្កល់អ្វីខ្លះ»។
លោក ទូច ណារ៉ុថ បានបន្តទៀតថា ក្រៅពីរបស់ដែលប្រមូលបាននៅលើស្ពាននោះ លោកថា ថ្ងៃកើតហេតុមន្រ្តីរបស់លោកប្រមូលបានដូចជាទូរស័ព្ទ និងនាឡិកាជាដើម ក៏ប៉ុន្តែបានប្រគល់ជូនដល់ក្រុមគ្រួសារសព និងអ្នករងគ្រោះវិញហើយ។ រីឯម៉ូតូមានតែប្រមាណជាង ១០គ្រឿងប៉ុណ្ណោះ ដែលលោកប្រមូលបាន ហើយបច្ចុប្បន្ននៅសល់ ៦គ្រឿងទៀតនៅខណ្ឌដូនពេញ និងខណ្ឌចំការមន។
ទាក់ទងបញ្ហានេះ អធិការនគរបាលខណ្ឌចំការមន លោក ហ៊ាង ថារ៉េត បានឲ្យដឹងថា តាំងពីថ្ងៃកើតហេតុមក នៅក្នុងខណ្ឌរបស់លោកមានម៉ូតូតែជាង ១០គ្រឿងប៉ុណ្ណោះរបស់ជនរងគ្រោះ ដែលបានរក្សាទុកនៅទីនោះ ក៏ប៉ុន្តែរហូតមកដល់ថ្ងៃទី៣០ ខែវិច្ឆិកា គឺនៅសល់តែ ១គ្រឿងប៉ុណ្ណោះ។
លោក ហ៊ាង ថារ៉េត បន្ថែមថា ៖ «ម៉ូតូគេប្រមូលតាមស្តង់គេផ្ញើមក គេប្រគល់ឲ្យប៉ុស្តិ៍ ប៉ុស្តិ៍គេដឹកមកខណ្ឌ ខណ្ឌធ្វើឯកសារគ្រប់គ្រាន់ប្រគល់ឲ្យជនរងគ្រោះវិញ»។
អ្នកស្រី ជិន ឌឿន ភូមិចក ឃុំត្រពាំងសាប ស្រុកបាទី ខេត្តតាកែវ ដែលមានក្មួយពីរនាក់អាយុ ១១ឆ្នាំ និងអាយុ ១២ឆ្នាំបានស្លាប់នៅក្នុងឧបទ្ទវហេតុរត់ជាន់គ្នានៅលើស្ពានកោះពេជ្រនោះ បានរៀបរាប់ទាំងសំឡេងក្ដុកក្ដួលពីការបាត់បង់អាយុជីវិត និងទ្រព្យខ្លះដែលនៅជាប់ខ្លួនក្មួយរបស់គាត់។
អ្នកស្រី ជិន ឌឿន បន្តថា ៖ «ម្នាក់នោះពេលទៅផ្ទះវាសួរថា លុយឲ្យទុកនៅកាបូបហ្នឹង ១១ម៉ឺន មានឃើញលុយឬអត់? ហើយដល់ហើយមកដល់សពហ្នឹងអត់មានឃើញអីទេ ឃើញតែកាបូបមួយតូច»។
ប្រធានសមាគមនិស្សិតឧត្តរមានជ័យ លោក អ៊ិន សូដា បានថ្លែងថា ក្នុងសមាគមរបស់លោកមាននិស្សិតចំនួន ២នាក់ជាសមាជិកបានស្លាប់នៅក្នុងហេតុការណ៍នោះ។ លោកថា និស្សិតឆ្នាំទី៤ ផ្នែកទីផ្សារម្នាក់ឈ្មោះ ទឹម រដ្ឋមុន្នី បានស្លាប់ ហើយមិត្តភ័ក្ដិដែលស្នាក់នៅក្នុងអន្តេវាសិកដ្ឋានជាមួយគ្នាបានដឹងថា សពនេះបានបាត់កាបូបលុយ។
លោក អ៊ិន សូដា ថ្លែងបន្ថែមថា ៖ «ទូរស័ព្ទអត់អីទេ តែរកអត់ឃើញកាបូបលុយ ដោយសារទៅហ្នឹងគឺមានកាបូបលុយ ដើរលេងវាមិនដែលអត់ទេ ធម្មតានៅក្នុងហោប៉ៅតែងតែមានកាបូបលុយ ប៉ុន្តែលុយតិច ឬច្រើនយើងអត់ដឹងមានប៉ុណ្ណា»។
នៅក្នុងឧបទ្ទវហេតុរត់ជាន់គ្នាលើស្ពានកោះពេជ្រនោះ បានបណ្ដាលឲ្យមានអ្នកស្លាប់ចំនួន ៣៥១នាក់ និងរបួសចំនួន ៣៩៥នាក់ ដែលគ្មាននរណាដឹងពិតប្រាកដទេថា តើក្រៅពីការបាត់បង់ជីវិត តើពួកគេនឹងបាត់បង់ទ្រព្យសម្បត្តិអ្វីទៀតនោះទេ៕