ពួកគេបានបង្ហាញប្រតិកម្មដោយមិនចំហថា ប្រាក់ហិរញ្ញប្បទាន ដែលពួកគេធ្លាប់បានទទួល គឺបានបាត់ចំនួន ៣ ខែមកហើយ ដែលធ្វើឱ្យជីវភាពរបស់ពួកគេខ្លះ ប្រឈមមុខនឹងការខ្វះខាត។
អ្នកគ្រប់គ្រងមន្ទីរពេទ្យបង្អែកខេត្តសៀមរាប បានបញ្ជាក់ថា គេមានគោលការណ៍ឱ្យបុគ្គលិកទាំងឡាយណា ដែលមានជីវភាពដុនដាបខ្លាំង អាចខ្ចីលុយរបស់អង្គភាព យកទៅដោះស្រាយជីវភាពបាន នៅពេលដែលប្រាក់ខែ ឬប្រាក់ហិរញ្ញប្បទានមានការយឺតយ៉ាវ ហើយអាចធ្វើឱ្យប៉ះពាល់ដល់ស្ថានភាពរស់នៅប្រចាំថ្ងៃនោះ។
លោក ប៉ែន ផល្គុន ជាប្រធានមន្ទីរពេទ្យបង្អែកខេត្តសៀមរាប។ លោកមានប្រសាសន៍កាលពីល្ងាចថ្ងៃសៅរ៍ទី ៥ ខែឧសភាថា ក្នុងចំណោមបុគ្គលិកដែលកំពុងបម្រើការងារ គឺមួយចំនួនមានជីវភាពដុនដាប ដែលត្រូវការបើកប្រាក់ខែ ឬប្រាក់ហិរញ្ញប្បទានឱ្យបានទៀងទាត់ មិនយឺតយ៉ាវ។
ក៏ប៉ុន្តែ នៅក្នុងរយៈពេលប្រមាណ ៣ ខែកន្លងមកនេះ លោកទទួលស្គាល់ថា គឺបុគ្គលិករបស់មន្ទីរពេទ្យប្រមាណ ១៦០ នាក់ នៅមិនទាន់បានទទួលប្រាក់ហិរញ្ញប្បទាននៅឡើយទេ។
លោក ប៉ែន ផល្គុន៖ «ប្រាក់ហិរញ្ញប្បទានហ្នឹងអត់ទាំងអស់គ្នា មិនមែនអត់តែមន្ទីរពេទ្យខេត្តសៀមរាបមួយនោះទេ។ លុយមូលនិធិសមធម៌វាអត់ធ្លាក់។ វាមិនមែនជាប្រាក់បៀវត្សទ។ អាហ្នឹងគេហៅថា ប្រាក់លើកទឹកចិត្ត។ ប្រហែលជាធ្លាក់ឆាប់នេះ។ លុយវាអត់ទាន់ធ្លាក់មក មិនដឹងធ្វើម៉េច។ លុយយើងបើកត្រឹមខែ ២ នៅសល់ខែ ៣ និងខែ ៤ ហើយអ្នកខ្លះមានជីវភាពដុនដាបខ្លាំង អាចខ្ចីបានមន្ទីរពេទ្យមានលុយឱ្យខ្ចី»។
ការបញ្ជាក់របស់អ្នកគ្រប់គ្រងមន្ទីរពេទ្យបែបនេះ គឺឆ្លើយតបទៅនឹងការរិះគន់មិនចំហរបស់បុគ្គលិកខ្លះ ដែលរអ៊ូរទាំអំពីបញ្ហាបើកប្រាក់ហិរញ្ញប្បទានយឺតយ៉ាវ។
កាលពីថ្ងៃទី ៤ ខែឧសភាកន្លងទៅ ក្រុមបុគ្គលិកស្រីៗ របស់មន្ទីរពេទ្យខេត្តសៀមរាបខ្លះ ដែលមិនហ៊ានបញ្ចេញឈ្មោះ បានផ្ញើសារអេឡិចត្រូនិក (E-Mail) មកកាន់វិទ្យុអាស៊ីសេរី។ ក្នុងសារអេឡិចត្រូនិកនោះ គេនិយាយថា ពួកគេមិនបានទទួលប្រាក់ហិរញ្ញប្បទានរយៈពេល ៣ ខែហើយ ដោយគេមិនបានដឹងអំពីមូលហេតុនៃការយឺតយ៉ាវនោះទេ។
ទោះជាយ៉ាងណាក្ដី មន្ត្រីមន្ទីរសុខាភិបាលខេត្តសៀមរាប បានអះអាងថា ប្រាក់ទាំងនោះ គឺមិនបាត់បង់ទេ ថ្វីត្បិតតែមានការយឺតយ៉ាវបន្តិចក៏ដោយ។
លោកវេជ្ជបណ្ឌិត ក្រូស សារ៉ាត់ ជាប្រធានមន្ទីរសុខាភិបាលខេត្តសៀមរាប។ លោកមានប្រសាសន៍ថា ប្រាក់ហិរញ្ញប្បទាននោះ គឺចេញពីមូលនិធិសមធម៌របស់រដ្ឋាភិបាល ហើយមន្ទីរពេទ្យ និងមន្ទីរសុខាភិបាលខេត្ត កំពុងប្រឹងប្រែងធ្វើការងារជាច្រើនក្នុងការពន្លឿនប្រាក់ហិរញ្ញប្បទាននោះឱ្យបានឆាប់រហ័ស។
លោកវេជ្ជបណ្ឌិត ក្រូស សារ៉ាត់៖ «ធម្មតាគេបើកត្រីមាសម្ដង ព្រោះប្រាក់ហិរញ្ញប្បទានហ្នឹង គេហៅទីភ្នាក់ងារប្រតិបត្តិការពិសេស ហើយអ៊ីចឹងការងារហ្នឹងត្រូវធ្វើរបាយការណ៍ឡើងទៅ បានគេទៅបើកមកម្ដង ៣ ខែ ហើយគេមានគុណអីត្រឹមត្រូវ។ តើអ្នកណាត្រូវបានប៉ុន្មាន? អ៊ីចឹងធម្មតាយើងត្រូវទូទាត់ទៅតាមហ្នឹង។ ប៉ុន្តែ វាមិនដែលបាត់លុយគេទេ តែគេទម្លាក់មក គឺបញ្ចូលកុងរៀងៗ ខ្លួន។ វាគ្មានអ្នកណាទៅស៊ី ទៅកាត់អីរបស់អ្នកណាបានទេ»។
មន្ត្រីមន្ទីរសុខាភិបាល បានឱ្យដឹងថា បុគ្គលិកដែលបម្រើការនៅតាមមន្ទីរពេទ្យគ្រប់រូប សុទ្ធតែបានទទួលប្រាក់ហិរញ្ញប្បទានគ្រប់ៗ គ្នា ដោយគិតទៅតាមតួនាទី និងឋានៈ និងយ៉ាងហោចណាស់ ក៏បុគ្គលិកម្នាក់អាចទទួលបានលុយហិរញ្ញប្បទានប្រហាក់ប្រហែល ១០០ ដុល្លារសហរដ្ឋអាមេរិកបន្ថែមពីលើប្រាក់បៀវត្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។