ការបើកឲ្យធ្វើចរាចរឡើងវិញនេះ គឺចាប់តាំងពីវេលាម៉ោងប្រមាណ ៧ យប់ថ្ងៃទី៣១ ខែមីនា ឆ្នាំ២០១២។
ការបិទផ្លូវ បានកើតមានកាលពីវេលាម៉ោងជាង ១២ ថ្ងៃត្រង់ ថ្ងៃទី ៣១ មីនា ប្រជាពលរដ្ឋប្រមាណ ៨០០ នាក់ នៅឃុំ ២ ធ្នួ ស្រុកស្នួល ខេត្តក្រចេះ បាននាំគ្នាដាក់របាំងបិទកំណាត់ផ្លូវនេះ ជាលក្ខខណ្ឌទាមទារឲ្យអាជ្ញាធរដោះស្រាយបញ្ហាទំនាស់ដីធ្លីជូនប្រជាពលរដ្ឋ។
តំណាងប្រជាពលរដ្ឋអ្នកតវ៉ា អ្នកស្រី ហេង អូន មានប្រសាសន៍បញ្ជាក់ថា ក្រុមមន្ត្រីអាជ្ញាធរស្រុក និងខេត្ត បានជួបចរចាជាមួយអ្នកតវ៉ាបិទផ្លូវ ហើយបានធ្វើកិច្ចសន្យាថា រយៈពេលបីថ្ងៃទៀត ក្រុមអាជ្ញាធរ នឹងដោះស្រាយសំណើជូនប្រជាពលរដ្ឋ។ ហេតុនេះអ្នកភូមិបានយល់ព្រមបើកផ្លូវ នៅយប់ថ្ងៃទី ៣១ មីនា ដើម្បីឲ្យរថយន្តចរាចរជាធម្មតាឡើងវិញ។
ក៏ប៉ុន្តែ អ្នកភូមិនៅបន្តប្រមូលផ្ដុំគ្នា នៅត្រង់កំណាត់ផ្លូវនោះដដែល រង់ចាំរហូតដល់ថ្ងៃ ដែលក្រុមអាជ្ញាធរបានសន្យា។
អ្នកស្រី ហេង អូន៖ «គាត់ចុះកិច្ចសន្យាជាមួយប្រជាពលរដ្ឋផ្ដិតមេដៃឲ្យប្រជាពលរដ្ឋថា បើថ្ងៃ ៣ គាត់មិនមកដោះស្រាយឲ្យប្រជាពលរដ្ឋទេ គាត់ឲ្យប្រជាពលរដ្ឋធ្វើមួយសាទៀត។អត់ទាន់រំសាយទេប្រជាពលរដ្ឋនៅរង់ចាំត្រៀបនៅហ្នឹង។ ប៉ុន្តែ គេគ្រាន់តែបើកផ្លូវទេ។ប្រជាពលរដ្ឋកន្លែងហ្នឹងមានផ្ទះឯណានៅ ក្រុមហ៊ុនឈូសអស់ហើយនោះ។ ចងតង់ដេកនៅមាត់ចិញ្ចើមថ្នល់ហ្នឹងនៅ ៤០០ នាក់។ នៅទីនោះអត់ទៅណាទេ ប្រជាពលរដ្ឋនៅក្រាញទីហ្នឹង»។
នេះគឺជាការតវ៉ាបិទកំណាត់ផ្លូវជាតិលើកទីបីហើយ បន្ទាប់ពីប្រជាពលរដ្ឋឃុំ ២ ធ្នូ ៥០០ គ្រួសារ បានដាក់សំណើទៅអាជ្ញាធរពាក់ព័ន្ធសុំកាន់កាប់ដីភូមិ និងដីចម្ការដែលពួកគេបានរានព្រៃរួច តាំងពីឆ្នាំ ២០០៨។ ប៉ុន្តែ នៅមិនទាន់បានទទួលចម្លើយផ្លូវការណាមួយឡើយ។ មកដល់ពេលថ្មីៗនេះក៏មានក្រុមហ៊ុនចំនួន ៤ បានមកឈូសឆាយដីអ្នកភូមិ ដោយសំអាងថា គេទទួលបានដីសម្បទានពីរដ្ឋាភិបាល ដោយរួមទាំងដីចម្ការរបស់ប្រជាពលរដ្ឋ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។