មន្ត្រីមជ្ឈមណ្ឌលសិទ្ធិមនុស្សកម្ពុជា លោក ឈឹម សាវុធ បានឲ្យដឹងថា វេទិកាសាធារណៈបើកនៅថ្ងៃ២៤ ខែធ្នូ ក្នុងភូមិត្រពាំងឈើទាល ឃុំច្រេស ស្រុកជុំគីរី ខេត្តកំពត ត្រូវក្រុមយោធាវរៈ១១២ រារាំង។
លោក ឈឹម សាវុធ បន្តថា ៖ «ពេលដែលតំណាងរាស្ត្រមកដល់ ឥឡូវនេះគេអត់ឃាត់ទេ ប៉ុន្តែពីព្រឹកមិញគេឃាត់ខ្ញុំតាំងពីម៉ោង៤ ហើយរោងដែលខ្ញុំដឹកទៅត្រូវគេកាក់អត់ឲ្យទៅតែម្ដង»។
តំណាងរាស្ត្រគណបក្សសិទ្ធិមនុស្ស លោក យែម ប៉ុញ្ញារិទ្ធ មានប្រសាសន៍ថា ៖ «ឥឡូវយើងមិនទាន់បានជួបប្រជាពលរដ្ឋផង ពីព្រោះវេទិកានេះមិនបានធ្វើ មិនគួរណាអាជ្ញាធរលោកមានសមត្ថកិច្ចទៅជាឃាត់ឃាំងមិនឲ្យមជ្ឈមណ្ឌលសិទ្ធិមនុស្សកម្ពុជា រៀបចំវេទិកានេះទៅវិញ។ នេះជារឿងមួយគួរឲ្យសោកស្ដាយមែនទែន»។
លោក យឹម សុវណ្ណ តំណាងរាស្ត្រគណបក្ស សម រង្ស៊ី បានថ្លែងថា ៖ «ហាមឃាត់បែបនេះ គឺអ្នកដែលហាមឃាត់គេហ្នឹង គឺត្រូវទទួលខុសត្រូវចំពោះមុខច្បាប់ ហើយគឺមិនមែនជាទង្វើត្រឹមត្រូវនៅក្នុងរបបដែលប្រកាន់លទ្ធិប្រជាធិបតេយ្យ សេរីពហុបក្សទេ»។
តំណាងរាស្ត្រគណបក្សហ៊្វុនស៊ិនប៉ិច លោក សាប៊ូ បាចារ មានប្រសាសន៍ថា ការឈរស្តាប់សេចក្តីរាយការណ៍របស់ប្រជារាស្ត្រនៅកណ្ដាលផ្លូវត្រង់កន្លែងយោធារារាំងនោះ ព្រោះតែយោធារងការចោទថា បានបំពានដីប្រជាជន ក្នុងឃុំច្រេស ដើម្បីសង់បន្ទាយ។
លោក សាប៊ូ បាចារ បន្តថា ៖ «មិនងាយដោះស្រាយទេ បើគ្មានក្រសួងការពារជាតិមកជួយអន្តរាគមន៍ទេ ហើយអាជ្ញាធរដែនដីហាក់ដូចជាមិនសូវហ៊ានប៉ុន្មានទេ ហើយដូចថ្ងៃនេះអ៊ីចឹង ការប្រជុំមិនបានកំណត់នៅចំកន្លែងទីតាំងទេ ឲ្យប្រជុំនៅទីតាំងសាធារណៈ»។
អតីតមេយោធាខ្មែរក្រហម លោក ស្រី ម៉ៅ ឲ្យដឹងថា តំបន់បាក់នឹម ដែលយោធាកំពុងសង់បន្ទាយនេះ ជាទីតាំងខ្មែរក្រហមស្នាក់នៅ។ ក្រោយពីធ្វើសមាហរណកម្មឆ្នាំ១៩៩៤ គាត់បានស្នើសុំដី ១៥០ហិកតាពីអតីតអាជ្ញាធរស្រុកជុំគីរី គឺលោក ទិត្យ ឌឿន និងមេឃុំនៅតំបន់បាក់នឹមនោះ ដើម្បីបែងចែកដីឲ្យអតីតទាហានខ្មែរក្រហម ក្រោមឱវាទលោករស់នៅសង់ជាភូមិឋានដីស្រែចម្ការ។ ប៉ុន្តែយោធាកងពលតូចលេខ១១ ទើបមកសង់បន្ទាយនៅឆ្នាំ២០០០នេះទេ បានព័ទ្ធយកដីដែលគាត់ស្នើសុំទាំងនោះ។
លោក ស្រី ម៉ៅ បន្តថា ៖ «ប៉ុន្តែឥឡូវវាមានការអាក់ខាន ដោយទាហានគេឃាត់ដំណើរនៅពាក់កណ្ដាលផ្លូវអ៊ីចឹង យើងខ្ញុំទាំងអស់គ្នាក៏មកចូលរួមគ្នាកណ្ដាលថ្ងៃក្ដៅ»។
ប្រជាជនឈ្មោះ សេង បានឲ្យដឹងថា វេទិកាសាធារណៈនេះជាឱកាសដែលគាត់ប្រាប់តំណាងរាស្ត្រពីទុក្ខកង្វល់ដីធ្លីដែលគេព័ទ្ធយកសង់បន្ទាយ ៖ «ប៉ុន្តែទាហានគេព័ទ្ធនៅរាយគ្នាជុំវិញពួកខ្ញុំហ្នឹង»។
តំណាងក្រសួងមហាផ្ទៃ លោក រាជ សុភទ្ទ អគ្គនាយករងនៃអគ្គនាយកដ្ឋានរដ្ឋបាលមូលដ្ឋានមានប្រសាសន៍ថា វេទិកាបើកនៅខេត្តកំពតដែលមានការរំខាននោះ ព្រោះអង្គការនោះមិនបានទាក់ទងអាជ្ញាធរមូលដ្ឋាន ដើម្បីសុំទីតាំងបើកវេទិកា ៖ «ព្រោះបើមានការអនុញ្ញាតពីខេត្ត អ៊ីចឹងហើយអាជ្ញាធរណាដែលនៅជិតជាងគេ លោកអ្នកមានសមត្ថកិច្ចខាងដោះស្រាយ»។
លោក ឈឹម សាវុធ បានឲ្យដឹងថា វេទិកា និងការបើកសិក្ខាសាលាបង្រៀនអំពីច្បាប់ និងសិទ្ធិអ្នកបោះឆ្នោត ដែលរៀបចំដោយមជ្ឈមណ្ឌលសិទ្ធិមនុស្សកម្ពុជា សុទ្ធតែត្រូវបានរំខានពីសំណាក់អាជ្ញាធរ។
លោក ឈឹម សាវុធ បន្តថា ក្រោយពីសាលាខេត្តកំពត ចេញច្បាប់អនុញ្ញាតឲ្យបើកវេទិកា គាត់បានស្នើសុំទៅអាជ្ញាធរឃុំច្រេស ស្រុកជុំគីរី តាំងពីថ្ងៃទី៧ ខែធ្នូ ឆ្នាំ២០១០ សុំផ្ទះប្រជាជនឈ្មោះ គី ហ៊ន នៅភូមិត្រពាំងឈើទាល សម្រាប់បើកវេទិកាឈ្មោះសិទ្ធិមនុស្ស និងការអភិវឌ្ឍ ប៉ុន្តែក្រោយពីបានទទួលលិខិតស្នើសុំបែរជាអាជ្ញាធរភូមិ ឃុំ និងមានយោធាវរៈ១១២ផង បានទៅប្រាប់ម្ចាស់ទីតាំង មិនឲ្យផ្ដល់កន្លែងឲ្យបើកវេទិកា។
ម្ចាស់ទីតាំងគឺលោក គី ហ៊ន នៅតែឲ្យបើកវេទិកានៅផ្ទះគាត់ តែមជ្ឈមណ្ឌលខ្លាចគាត់មានបញ្ហាជាមួយអាជ្ញាធរនៅទីនោះ ក៏បង្វែរការសុំទីតាំងមកកន្លែងសាធារណៈក្នុងភូមិនោះវិញ។ ស្រាប់តែដល់ថ្ងៃបើកវេទិកា គឺថ្ងៃ២៤ ខែធ្នូ ឆ្នាំ២០១០ មានយោធាប្រមាណ ២០នាក់ មកឃាត់ឡានដឹករោង និងគោយន្តដឹកកៅអីមិនឲ្យចូលកន្លែងរៀបចំបើកវេទិកា ទើបតំណាងរាស្ត្រ ៣គណបក្សនយោបាយក្រុមប្រឹក្សាខេត្តកំពត និងប្រជាជនជួបគ្នាលើថ្នល់មុខទីបញ្ជាការដ្ឋានកងពលតូចលេខ១១នោះ បានជាង ១ម៉ោង ក៏រំសាយវេទិកាទៅជាការជួបពិភាក្សារាស្រ្ត និងមន្ត្រីកណ្ដាលផ្លូវបែបនេះ៕