សាលា​បញ្ញា​សាស្ត្រ​គ្រោង​បំបួស​យុវជន ៣០០​នាក់

ពុទ្ធិក​បណ្ឌិត​សភា​នៃ​សកល​វិទ្យាល័យ​បញ្ញា​សាស្ត្រ​កម្ពុជា នៅ​ទីក្រុង​ភ្នំពេញ បាន​គ្រោង​នឹង​ធ្វើ​ពិធី​បំបួស​យុវជន យុវតី ប្រមាណ ៣០០​នាក់ នៅ​ដើម​ខែ​ឧសភា ឆ្នាំ​២០១២ ខាង​មុខ​នេះ។
ដោយ កែវ​ពេជ្រ មេត្តា
2012-04-21
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
puc305
សកល​វិទ្យាល័យ​បញ្ញា​សាស្ត្រ​កម្ពុជា
(Source: puc.edu.kh)

យុវជន យុវតី ប្រមាណ ៣០០​រូប ដែល​ភាគ​ច្រើន​ជា​សិស្ស និស្សិត​នៅ​ទីក្រុង​ភ្នំពេញ និង​នៅ​តាម​បណ្ដា​ខេត្ត​ផ្សេងៗ បាន​នាំ​គ្នា​ត្រៀម​សាង​ផ្នួស​បួស​ជា​បព្វជិត និង​ជា​ដូនជី ឬ​ជា​សីលវន្ត សីលវតី ក្នុង​សំណាក់​ព្រះ​ពុទ្ធ​សាសនា។

គោល​បំណង​នៃ​ការ​បួស​របស់​យុវជន​យុវតី​ទាំង​នោះ ក៏​ដើម្បី​បង្កើន​នូវ​ចំណេះ​ដឹង​ផ្នែក​សីលធម៌​រស់​នៅ​ឲ្យ​ប្រកប​ដោយ​គុណធម៌​ល្អ​ប្រសើរ​ផង និង​ក៏​ដើម្បី​សិក្សា​ស្វែង​យល់​អំពី​ព្រះ​ពុទ្ធ​សាសនា​ឲ្យ​បាន​ស៊ី​ជម្រៅ​ផង។

ក្នុង​ចំណោម​យុវជន យុវតី ដែល​ត្រៀម​បួស​ជា​បព្វជិត យុវជន​មួយ​រូប​ឈ្មោះ សួន សុខ​រើន ជា​និស្សិត​វិស្វករ​ផ្នែក​អគ្គិសនី​នៃ​សាលា​ព្រះកុសុមៈ ភ្នំពេញ បាន​ឲ្យ​ដឹង​ថា សព្វ​ថ្ងៃ​នេះ​កូន​ខ្មែរ​ភាគ​ច្រើន ក្នុង​នោះ​រួម​ទាំង​រូប​គេ​ផ្ទាល់ គឺ​ជា​ពុទ្ធ​សាសនិក ប៉ុន្តែ​ការ​យល់​ដឹង​អំពី​ធម៌​វិន័យ ឬ​ពាក្យ​ប្រៀន​ប្រដៅ​របស់​ព្រះ​ពុទ្ធ​អង្គ គឺ​ពួក​គេ​បាន​យល់​ដឹង​តិច​តួច​ណាស់។ និស្សិត​រូប​នោះ​បាន​បន្ថែម​ថា ដើម្បី​ឲ្យ​បាន​យល់​ដឹង​ច្រើន​ពី​ពុទ្ធវចនៈ ឬ​ពាក្យ​ប្រៀន​ប្រដៅ​របស់​ព្រះ​សម្មាសម្ពុទ្ធ​ថា​មាន​សារសំខាន់​យ៉ាង​ណា​នោះ គេ​គួរ​តែ​ទៅ​បួស​ជា​ព្រះ​សង្ឃ​មួយ​រយៈ​សិន ៖ "ទី​១ គឺ​ចង់​បួស​សង​គុណ​មាតា​បិតា​ខ្ញុំ ដែល​មាតា​ខ្ញុំ​បាន​ចែក​ស្ថាន​ទៅ​ហើយ ខ្ញុំ​មិន​បាន​សង​គុណ​អ្វី​គាត់​សោះ។ អ៊ីចឹង​ខ្ញុំ​ចង់​យក​ខណៈ​ពេល​ខ្ញុំ​បួស​ហ្នឹង គឺ​ជូន​មគ្គផល​គាត់ ឬ​ក៏​បួស​ដើម្បី​សង​គុណ​គាត់។ ចង់​អោយ​ប្រជា​ជន​ខ្មែរ​យើង ជា​ពិសេស​ចំពោះ​សិស្សានុសិស្ស និង​និស្សិត ដែល​គាត់​បាន​ទទួល​កម្មវិធី​បួស​អោយ​បាន​ច្រើន ដើម្បី​យល់​ដឹង​ពី​វិន័យ និង​អប់រំ​ចិត្ត​ខ្លួន​ឯង​ឲ្យ​ធ្វើ​អ្វី​ដែល​ល្អ​សម្រាប់​ខ្លួន​ឯង សម្រាប់​គ្រួសារ និង​សម្រាប់​សង្គម​ជាតិ។ ការ​អភិវឌ្ឍ​ខ្លួន​ក្នុង​ផ្នែក​ពុទ្ធចក្រ និង​ផ្នែក​អាណា​ចក្រ"

យុវតី​មួយ​រូប​ទៀត​ឈ្មោះ វិសេស សុទ្ធារ័ត្ន ដែល​កំពុង​ត្រៀម​ខ្លួន​ចូល​បួស​ជា​សីលវតី ឬ​ជា​ដូនជី​ដែរ​នោះ បាន​បញ្ជាក់​ប្រាប់​ស្រដៀង​គ្នា​ថា នាង​ចង់​បួស​ក៏​ដើម្បី​សង​គុណ​ឪពុក​ម្ដាយ ហើយ​ក៏​ដើម្បី​បាន​ផល​ប្រយោជន៍​ផ្ទាល់​ខ្លួន ក្នុង​ការ​សិក្សា​ព្រះធម៌ ឬ​ឱវាទ​របស់​ព្រះពុទ្ធ ពិសេស​គឺ​គោលការណ៍​ធម៌​នៃ​ការ​រក្សា​សីល​៥ ឬ​សិក្ខា​បទ​៥។

យុវតី​ដដែល​បាន​បន្ត​ថា ការ​ចង់​ដឹង​អំពី​សីល​៥ ពី​ព្រោះ​នាង​ធ្លាប់​ឮ​ចាស់​ទុំ ដូច​ជា​ជីដូន​របស់​នាង​ជា​ដើម បាន​ប្រាប់​ថា ការ​រក្សា​សីល​៥ គឺ​ជា​ធម៌​មួយ​ជួយ​អប់រំ​មនុស្ស​ឲ្យ​យល់​ពី​តម្លៃ​នៃ​ជីវិត​មនុស្ស សត្វ​គ្រប់​រូប​ទាំង​អស់ និង​ឲ្យ​យល់​អំពី​ការ​គោរព​សិទ្ធិ​គ្នា​ទៅ​វិញ​ទៅ​មក ដូច​ជា​ក្នុង​សីល​ទី​១ គឺ​មិន​សម្លាប់ សីល​ទី​២ មិន​ឲ្យ​លួច​ទ្រព្យ​របស់​គេ សីល​ទី​៣ មិន​ប្រព្រឹត្ត​ខុស​ក្នុង​កាម ឬ​បំពាន​ទៅ​លើ​ប្ដី ប្រពន្ធ កូន​របស់​គេ សីល​ទី​៤ មិន​ពោល​ពាក្យ​កុហក និង​សីល​ទី​៥ មិន​សេព​គ្រឿង​ស្រវឹង គ្រឿង​ញៀន។

យុវតី​រូប​នោះ​បាន​បន្ថែម​អំពី​សារសំខាន់​នៃ​គុណ​ប្រយោជន៍​សីល​៥ ៖ "ខ្ញុំ​យល់​ថា សីល​៥​អប់រំ​យើង​ល្អ។ យើង​អត់​ប្រព្រឹត្ត​អំពើ​ដូច​ជា​ការ​សម្លាប់​អី​អ៊ីចឹង។ រាល់​ថ្ងៃ​ហ្នឹង ខ្ញុំ​កាន់​សីល​៥​ទៀត។ ខ្ញុំ​អត់​ដែល​សម្លាប់​សត្វ អត់​ដែល​អី​ទេ។ ការ​បំបួស​រើស​កុលបុត្រ កុលធីតា​ហ្នឹង​វា​ល្អ។ ដើម្បី​ឲ្យ​យុវជន យុវតី​យើង​ហ្នឹង​ជួយ​សង្គម​យើង"

កម្មវិធី​បំបួស​កុលបុត្រ កុលធីតា​នេះ គឺ​រៀបចំ​ឡើង​ដោយ​ពុទ្ធិក​បណ្ឌិត​សភា​នៃ​សកល​វិទ្យាល័យ​បញ្ញា​សាស្ត្រ​កម្ពុជា ដែល​នឹង​ប្រព្រឹត្ត​នៅ​ថ្ងៃ​១២​កើត ខែ​ពិសាខ ឆ្នាំ​រោង ត្រីស័ក ពុទ្ធសករាជ​២៥៥៥ ត្រូវ​និង​ទី​២ ខែ​ឧសភា ឆ្នាំ​២០១២ នៅ​វត្ត​ព្រះ​ពុទ្ធ​ឃោសា​ចារ្យ ឃុំ​គងជ័យ ស្រុក​អូររាំងឪ ខេត្ត​កំពង់ចាម។

ប្រធាន​ការិយាល័យ​ពុទ្ធិក​បណ្ឌិត​សភា​នៃ​សកល​វិទ្យាល័យ​បញ្ញា​សាស្ត្រ​កម្ពុជា លោក ហ៊ាត ណាហំ បាន​មាន​ប្រសាសន៍​ថា កម្មវិធី​បំបួស​យុវជន​យុវតី​នេះ គឺ​មាន​រយៈ​ពេល​មួយ​សប្ដាហ៍ ជា​រយៈ​ពេល​ខ្លី​ដើម្បី​ផ្ដល់​ឱកាស​ឲ្យ​យុវជន យុវតី​មាន​លទ្ធភាព​អាច​ចូល​មក​បួស​បាន ពីព្រោះ​ពួក​គេ​សុទ្ធ​តែ​ជា​អ្នក​សិក្សា​រៀន​សូត្រ។

លោក​បាន​បន្ត​ទៀត​ថា បើ​ទោះបី​ជា​ការ​បួស​នេះ​មាន​រយៈ​ពេល​ខ្លី ប៉ុន្តែ​យ៉ាង​ហោច​ណាស់ កម្មវិធី​បំបួស​នោះ​នឹង​ជា​ជំនួយ​មួយ​ជួយ​បណ្ដុះ​គំនិត​បញ្ញា​ស្មារតី​យុវជន យុវតី​ឲ្យ​ស្ថិត​នៅ​ក្នុង​ការ​ធ្វើ​អំពើ​ជា​កុសល ពោល​គឺ​ធ្វើ​អំពើ​ជា​ប្រយោជន៍​សម្រាប់​សេចក្ដី​សុខ​ដល់​ខ្លួន​ផង និង​អ្នក​ដទៃ​ផង ៖ "ក្នុង​រយៈ​ពេល ២០​ថ្ងៃ យើង​បាន​អប់រំ​ជាប់​ការ​សន្ទនា​ព្រះធម៌ ការ​អប់រំ​គុណធម៌ សីលធម៌ ចរិយា​ធម៌ និង​នៅ​ក្នុង​នោះ​មាន​លោក​គ្រូ​អគ្គ ប៊ុត សាវង្ស គាត់​ចូល​រួម​ផ្ដល់​ជា​ឱវាទ ការ​អប់រំ​យុវជន"

ការ​បង្កើត​នូវ​កម្មវិធី​បំបួស​យុវជន​យុវតី ដែល​រៀបចំ​ឡើង​ដោយ​ពុទ្ធិក​បណ្ឌិត​សភា​នៃ​សកល​វិទ្យាល័យ​បញ្ញា​សាស្ត្រ​កម្ពុជា គឺ​គេ​បាន​ធ្វើ​ជា​លើក​ទី​២ ហើយ រាប់​ទាំង​លើក​នេះ​ដែល​គេ​គ្រោង​នឹង​ធ្វើ​នៅ​ថ្ងៃ​ទី​២ ខែ​ឧសភា នេះ។

កម្មវិធី​បំបួស​លើក​ទី​១ កាល​ពី ២​ឆ្នាំ​មុន គេ​បាន​ឃើញ​ថា​មាន​យុវជន​យុវតី​មួយ​ចំនួន​បាន​ផ្លាស់​ប្ដូរ​ទម្លាប់​របស់​គេ ក្រោយ​ពី​បាន​សាង​ផ្នួស​ក្នុង​រយៈ​ពេល​មួយ​សប្ដាហ៍​រួច​មក។

យុវតី​មួយ​រូប​ឈ្មោះ កែប សុខ​សុភា នៅ​ភ្នំពេញ ដែល​ធ្លាប់​បាន​សាង​ផ្នួស​ជា​សីលវតី ឬ​ដូនជី នៅ​ក្នុង​កម្មវិធី​បំបួស​លើក​ទី​១ របស់​ពុទ្ធិក​បណ្ឌិត​សភា​នៃ​សកល​វិទ្យាល័យ​បញ្ញា​សាស្ត្រ​កម្ពុជា បាន​បញ្ជាក់​ថា កាល​ពី​នាង​មិន​ទាន់​សាង​ផ្នួស គឺ​នាង​បាន​ធ្វើ​ខុស​ច្រើន​ទៅ​លើ​មាតា បិតា ដូច​ជា​មិន​សូវ​ស្ដាប់​ដំបូន្មាន​ជា​ដើម។ ប៉ុន្តែ​បន្ទាប់​ពី​នាង​បាន​ទទួល​ការ​អប់រំ​ទូន្មាន​ជា​ច្រើន​នៅ​ក្នុង​កម្មវិធី​បំបួស​សីលវន្ត សីលវតី នោះ ហើយ​នាង​បាន​ផ្សឹក​មក​វិញ សព្វ​ថ្ងៃ​នេះ គឺ​នាង​បាន​កែ​ចិត្ត​គំនិត​ឲ្យ​ទៅ​ជា​កូន​ល្អ ដើម្បី​សង​គុណ​លោក​អ្នក​មាន​គុណ​ទាំង​ពីរ ៖ "យើង​មាន​កំហុស​ច្រើន​ចំពោះ​ពួក​គាត់ តែ​ពេល​នេះ​ខ្ញុំ​ចង់​កែ​ខ្លួន កសាង​ខ្លួន​សា​ជា​ថ្មី​សង​អ្វី​គ្រប់​យ៉ាង​ទៅ​គាត់​វិញ ឲ្យ​គាត់​សប្បាយ​ចិត្ត។ ម៉្យាង​ទៀត​ខ្ញុំ​ចង់​ថា​ទៅ​ថ្ងៃ​មុខ​ទៀត មាន​ព្រះ​ធម៌​នៅ​ក្នុង​ខ្លួន​សម្រាប់​ជា​ស្ពាន​ចម្លង​ទៅ​ថ្ងៃ​មុខ"

ក្រៅ​ពី​យុវជន​យុវតី​មួយ​ចំនួន​ដែល​បាន​លើក​ឡើង​អំពី​ផល​ប្រយោជន៍​នៃ​ការ​បួស​ជា​សីលវន្ត សិលវតី ក្នុង​សំណាក់​ព្រះ​ពុទ្ធ​សាសនា ក្នុង​នោះ​មាតា​បិតា​ខ្លះ ដែល​មាន​កូន​ចៅ​បាន​បួស ដែល​រៀបចំ​ដោយ​ពុទ្ធិក​បណ្ឌិត​សភា​នៃ​សកល​វិទ្យាល័យ​បញ្ញា​សាស្ត្រ​កម្ពុជា ក៏​បាន​យល់​ឃើញ​ប្រហាក់​ប្រហែល​គ្នា​ដែរ​ថា កម្មវិធី​បំបួស​កុលបុត្រ កុលធីតា​នេះ គឺ​បាន​ជួយ​សម្រួល​ច្រើន​ដល់​ការ​អប់រំ​ទូន្មាន​កូន​ចៅ​របស់​គេ។

ក្នុង​ចំណោម​មាតា​បិតា​ទាំង​នោះ ស្ត្រី​ជា​ម្ដាយ​មួយ​រូប​ឈ្មោះ ច្រឹង ចាន់​ធឿន រស់​នៅ​ខេត្ត​កំពង់ចាម បាន​បញ្ជាក់​ថា កូន​ស្រី​របស់​គាត់​ម្នាក់ អាយុ​១៥​ឆ្នាំ បាន​កែ​ប្រែ​ទម្លាប់​ច្រើន​គួរ​ឲ្យ​កត់​សំគាល់ ក្រោយ​ពី​គេ​បាន​ផ្សឹក​ពី​បួស​ជា​សីលវតី​រួច​មក។

ស្ត្រី​រូប​នោះ​បាន​បន្ថែម​ថា កាល​ពី​កូន​មិន​ទាន់​បាន​បួស គឺ​មាន​ការ​ពិបាក​ខ្លាំង​ណាស់ ពីព្រោះ​គេ​ច្រើន​តែ​សេព​គប់​មនុស្ស​មិន​ល្អ មិន​សូវ​ចង់​រៀន​សូត្រ គេច​វេះ​សាលា​រៀន​ជា​ដើម ៖ "តាម​មើល​ទៅ​គេ​កែ​ច្រើន។ ទឹក​ចិត្ត​ម្តាយ​ពេល​ដែល​កូន​បួស​ហើយ​មាន​ការ​ទូន្មាន​ព្រាន​ប្រដៅ​ទៅ​វា​ល្អ​ជាង​មុន​អ៊ីចឹង មាន​ការ​សប្បាយ​ចិត្ត គេ​ចេះ​គោរព​ចាស់​ទុំ។ មុន​និយាយ​ត្រមង់ត្រមោច​អត់​ដឹង​អី​ទេ។ បាន​ទៅ​បួស​ហើយ​មាន​ការ​សិក្សា​ធម៌​ផង បដិបត្ដិ​នូវ​ធម៌​ផង។ អ៊ីចឹង​លោក​គ្រូ​ប្រដៅ​អប់រំ​ផង​អ៊ីចឹង​ទៅ គេ​អាច​ក្លាយ​ជា​មនុស្ស​ល្អ​បាន"

លោក ហ៊ាត ណាហំ ប្រធាន​ការិយាល័យ​ពុទ្ធិក​បណ្ឌិត​សភា​នៃ​សកល​វិទ្យាល័យ​បញ្ញា​សាស្ត្រ​កម្ពុជា បាន​មាន​ប្រសាសន៍​ថា ការ​បំបួស​កុលបុត្រ​កុលធីតា​នេះ គឺ​ជា​ប្រពៃណី​ព្រះ​ពុទ្ធ​សាសនា ដែល​មាន​មក​ដ៏​យូរ​លង់​តាំង​ពី​សម័យ​ព្រះ​ពុទ្ធ​គង់​ធរមាន​នៅ​មក​ម្ល៉េះ ហេតុ​ដូច្នេះ​ហើយ ប្រពៃណី​នេះ​បាន​ធ្វើ​បន្ត​ជា​រៀង​រហូត​មក មិន​ថា​តែ​នៅ​កម្ពុជា​ទេ ពិធី​នេះ​ក៏​មាន​ធ្វើ​ដូច​គ្នា​ដែរ​សម្រាប់​ប្រទេស​ដែល​គោរព​ព្រះ​ពុទ្ធ​សាសនា​ក្នុង​សកល​លោក ដូច​ជា​នៅ​ប្រទេស​ថៃ ភូមា សិរីលង្កា​ជា​ដើម។

លោក​បាន​បញ្ជាក់​ទៀត​ថា កម្មវិធី​បំបួស​យុវជន​យុវតី​របស់​ពុទ្ធិក​បណ្ឌិត​សភា​នៃ​សកល​វិទ្យាល័យ​បញ្ញា​សាស្ត្រ​កម្ពុជា​នេះ គឺ​មាន​រយៈ​ពេល​ខ្លី​តែ​មួយ​សប្ដាហ៍​ប៉ុន្តែ ប្រសិន​យុវជន យុវតី​ណា​មាន​សទ្ធា​ជ្រះ​ថ្លា​ចង់​បន្ត​ការ​បួស​របស់​គេ​ត​ទៅ​មុខ​ទៀត​នោះ គឺ​គណៈកម្មការ​របស់​សាលា​គេ​នឹង​ជួយ​ជ្រោមជ្រែង​បំពេញ​ការ​ងារ​នេះ៕

កំណត់​ចំណាំ៖ ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ ដើម្បី​រក្សា​សេចក្ដី​​ថ្លៃថ្នូរ យើង​​ខ្ញុំ​នឹង​ផ្សាយ​តែ​មតិ​ណា​ដែល​មិន​​ជេរ​​ប្រមាថ​​ដល់​​អ្នក​​ដទៃ​តែ​ប៉ុណ្ណោះ។

មតិ (3)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

គួរតែបញ្ជូននាយកហ៊ុន សែននិងរដ្ឋមន្រ្តីលោកទាំងអស់
ទៅភ្នំទ្រុងមាន់ឱ្យបាន១០ថ្ងៃដើម្បីធ្វើវិបាសនាមុនបំបួស
សិស្សក្នេងៗទាំងនេះ។លទ្ធផលនិងបានមកដោយប្រសើរ
ខ្ពង់ខ្ពោះ ហើយសកលលោកគេនិងទទួលស្គាល់ថាកម្ពុជា
ជាប្រទេសកាន់ពុទ្ធសាសនាប្រសើរជាងគេលើពិភពលោក
នេះ។

Apr 21, 2012 07:05 PM

អ្នក​អាន​អនាមិក

ខ្ញុំបាទជាខ្មែរមួយរូបសូមគាំទ្រ១០០ភាគរយនូវទង្វើនេះ។តែ
ខ្ញុំយល់ថាពពួកមនុស្សដែលត្រូវអបរំឬត្រូវបំបួសមុនគេនោះ
គឺរដ្ឋមន្រ្តី;មន្រ្តីរាជការទាំងអស់ក្នុងរដ្ឋាភិបាលហ៊ុន សែន។
ធំបំផុតគឺលោកនាយកហ៊ុន សែនគួរឈានមុខដើរជាគំរូ
សម្រាប់កូនចៅក្នុងរដ្ឋាភិបាលលោកសព្វថ្ងៃ។

Apr 21, 2012 06:35 PM

អ្នក​អាន​អនាមិក

គំនិតនេះត្រូវនឹងការគិតរបស់ខ្ញុំយូរមកហើយ ខ្ញុំគិតថារដ្ឋគួរតម្រូវ
ច្បាប់មួយឲ្យយុវជននិងយុវតីខ្មែរបួសមួយវស្សា
ក្រោយបញ្ចប់ការសិក្សា ក៏ដូចជាមានការអប់រំផ្នែកសាសនា
សិនមុននឹងចូលកាន់ការងារក្នុងក្រសួងណាមួយ នោះសង្គម
ខ្មែរនឹងមានមនុស្សប្រកបដោយសីលធម៌ក្នុងវិជ្ជាជីវៈរបស់ខ្លួន។

Apr 21, 2012 03:11 PM